អតីតវីរបុរសប្រេស៊ីល Falcao ចុចឈ្មោះកីឡាករនៅ PL មួយរូប សក្តិសមនឹងឈ្នះ Ballon d’Or
ពានរង្វាន់ Ballon d'Or នឹងសម្រេចរកឃើញអ្នកឈ្នះ នៅឆ្នាំ ២០២១ ក្នុងរយៈពេលតែ ១០ ថ្ងៃទៀតប៉ុណ្ណោះ ហើយមកទល់ពេលចុងក្រោយ ក៏មានការយល់ឃើញពីមតិជាច្រើនលើកឡើងជាបន្តបន្ទាប់។
យ៉ាងណាក្រឡេកមកអតីតវីរបុរសប្រេស៊ីល លោក Falcao ឯណោះវិញ ក៏បាននិយាយដល់ឈ្មោះកីឡាករនៅ ក្របខ័ណ្ឌ Premier League ដែលជឿថា នឹងអាចឈ្នះពានឯកត្តជនខាងលើ ហើយនោះមិនមែនជា Jorginho ឬ N'Golo Kante នោះឡើយ។
ផ្ទុយទៅវិញ គឺជាខ្សែប្រយុទ្ធកំពុងឡើងកូដ Mohamed Salah នៃក្លឹបហង្សក្រហម Liverpool។ Falcao និយាយ៖ "Mohamed Salah នៅប៉ុន្មានឆ្នាំចុងក្រោយនេះ គេបានធ្វើឲ្យបាល់ទាត់អេហ្សីបត្រូវបានពិភពលោកស្គាល់ គេមានឱកាសឈ្នះ Ballon d'Or ឆ្នាំនេះ បន្ទាប់ពីគេបង្ហាញទម្រង់លេងយ៉ាងល្អជាមួយ Liverpool"។
លោកបន្ត៖ "ហើយដូចគ្នាទៅនឹងជម្រើសជាតិអេហ្សីប គឺសក្តិសមនឹងទទួលបានឱកាសសម្រាប់លេង World Cup 2022 ក្នុងប្រទេសកាតា ព្រោះពួកគេមានកីឡាករដ៏អស្ចារ្យជាច្រើន"។ គួរបញ្ជាក់ថា ព្រឹត្តិការណ៍ Ballon d'Or បានឆ្លងកាត់ការបោះឆ្នោតពីស្ថាប័ននានារួចរាល់ហើយ ដោយនៅថ្ងៃទី ២៦ វិច្ឆិកាខាងមុខ France Football នឹងរៀបចំប្រកាសជាផ្លូវការ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
