អស់ជំនឿលើ Solskjaer ស្រាប់តែ Ronaldo ទទូចទៅថ្នាក់លើ ឲ្យយកគ្រូថ្មីម្នាក់មកជំនួស
តារាឆ្នើម Cristiano Ronaldo ត្រូវបានគេរាយការណ៍ថា ពុំមានជំនឿទុកចិត្តថា Ole Gunnar Solskjaer នឹងអាចដឹកនាំឲ្យ Man Utd ទទួលបានជោគជ័យនោះទេ ដូច្នេះហើយកុំឲ្យខាតពេល លោកបានសុំឲ្យក្លឹប លៃលកទៅចរចាយកគ្រូចាស់ខ្លួន កាលនៅ R.Madrid មកដឹកនាំជំនួសវិញ។
នោះគឺ លោក Zinedine Zidane បច្ចុប្បន្នជាអ្នកចាត់ការទំនេរជើង គ្មានក្លឹបឈរឈ្មោះ ចាប់តាំងការចាកចេញពីក្លឹប R.Madrid នាបញ្ចប់រដូវកាលមុន។ គោលដៅធំរបស់ Zidane អាចជានៅជម្រើសជាតិបារាំងឯណោះ តែថាមិនត្រូវ ប្រសិនលោកស្រលាញ់ Ronaldo ផង ដូច្នេះការមកដឹកនាំក្លឹបអង់គ្លេស ក៏អាចនឹងក្លាយជាចការពិត។
បើតាមរបាយការណ៍ក្រៅស្រុកចុះផ្សាយថា Ronaldo សុំទាមទារឲ្យ Man Utd ធ្វើការសម្រេចឲ្យបានត្រឹមដើមឆ្នាំក្រោយ ២០២២ ដោយទុកពេលឲ្យ Ole ដឹកនាំតែប៉ុន្មានប្រកួតទៀតប៉ុណ្ណោះនៅពេលខាងមុខ ដូចជាការប៉ះ Watford, Villarreal និង Chelsea រួចបើនៅតែបរាជ័យ ឬទទួលបានលទ្ធផលមិនល្អទៀត ក៏ដល់ពេលល្មមនឹងដកតំណែងគ្រូសញ្ជាតិន័រវេសចេញហើយ។
គួរបញ្ជាក់ថា Zidane ធ្លាប់ដឹកនាំ Ronaldo លើកពាន UCL ៣ លើកជាប់ៗគ្នា ហើយ La Liga ឈ្នះបាន ១ លើក និងពានរង្វាន់តូចៗក្នុងស្រុកមួយចំនួនផ្សេងទៀត៕ ប្រភព៖ បរទេស | ព្រែសម្រួល៖ ក្នុងស្រុក
ព័ត៌មានថ្មីៗ
