Chelsea សុំម្ចាស់ក្លឹបឲ្យទម្លាក់លុយ ៨៥ លានផោន ដើម្បីយកចំណូលថ្មីម្នាក់នេះចូលក្រុម
នៅទីផ្សារដោះដូររដូវរងាខាងមុខ ឬកំឡុងដើមខែមករា ឆ្នាំ ២០២២ ក្លឹបតោខៀវ Chelsea ដែលដឹកនាំដោយអ្នកចាត់ការលោក Thomas Tuchel ត្រូវបានគេរាយការណ៍ថា កំពុងចាប់អារម្មណ៍ចង់បានខ្សែបម្រើវ័យក្មេងរបស់ក្លឹប Bayer Leverkusen ជាខ្លាំង។
នោះគឺយុវជនវ័យ ១៨ ឆ្នាំ Florian Wirtz ដែលមានហាងឆេងថ្លៃខ្លួនល្បាក់ ៨៥ លានផោន។ នេះបើតាមសារព័ត៌មាន El Nacional បានចុះផ្សាយ។
Wirtz គេបង្ហាញខ្លួនសរុបឲ្យ Leverkusen ៦១ ប្រកួត រកបាន ១៦ គ្រាប់និង Assist ១៥ លើក។ បើរាប់តែស្ថិតិរដូវកាលនេះ ១៤ ប្រកួត រកបាន ៧ គ្រាប់និង Assist ៧ លើក ដោយគេកំពុងត្រូវបានគ្រប់គ្នា ប្រដូចទៅនឹងវីរបុរសឆ្នើមលោក Andres Iniesta ក្នុងនាមជាខ្សែបម្រើលំដាប់ពិភពលោកមួយ។
Wirtz សេសសល់កុងត្រាដល់ចុងខែមិថុនា ឆ្នាំ ២០២៣ ដូច្នេះមិនមែនជារឿងងាយទេ ដែលថា Leverkusen ព្រមលក់គេចេញឬអត់? ក្រៅពីក្លឹបតោខៀវ Chelsea ក៏មានក្លឹបមួយចំនួនផ្សេងទៀតដែរនៅអឺរ៉ុប តួយ៉ាងដូចជា Bayern Munich ដូច្នេះឱកាសនៃការប្រជែងរបស់តោខៀវ ក៏កាន់តែស្តួចស្តើងផងដែរ ប្រសិន Wirtz គេចាប់អារម្មណ៍ក្លឹបរួមលីគ ច្រើនជាងក្លឹបនៅក្រៅតំបន់៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
