ខាតជិត ១ ទ្វេជា ៧ ហ៊ានអត់? បើព្រម Liverpool នឹងចុះហត្ថលេខាយកម្នាក់នេះ ចេញពី Barcelona
ក្លឹបហង្សក្រហម Liverpool ហាក់កំពុងសកម្មខ្លាំងក្នុងការស្វែងរកអ្នកថ្មី មកត្រៀមជំនួស Mohamed Salah ព្រោះក្លឹបជឿថា អនាគតរបស់កីឡាករអេហ្សីបទៅពេលខាងមុខ គឺមិនប្រាកដប្រជាឡើយ។ ណាមួយគួបផ្សំតំបន់ប្រយុទ្ធ ស្ទើរកីឡាករផង ដូច្នេះការនាំចំណូលថ្មីមកបន្ថែមក៏មិនជារឿងខុសដែរ។
បើតាមសារព័ត៌មាន El Nacional ចុះផ្សាយថា ក្រុមដឹកនាំដោយលោក Jurgen Klopp បានសម្លឹងឃើញ Ousmane Dembele របស់ក្លឹប Barcelona ដែលកីឡាករបារាំងត្រូវផុតកុងត្រានៅចុងខែមិថុនា ឆ្នាំ ២០២២ ខាងមុខ។ យ៉ាងណាហង្សចង់នាំយកគេមក Anfield ត្រឹមខែមករា ពោលគឺមុន ៦ ខែនៃការផុតកុងត្រា ហើយហ៊ានឲ្យដល់ទៅ ២០ លានអឺរ៉ូឯណោះ។
នេះជាទំហំខាតបង់ជិត ១ ទ្វេជា ៧ ដែលដើមឡើយ អ្នកមានបុណ្យបានទម្លាក់លុយ ១៣៥ លានអឺរ៉ូ យក Dembele ចេញពី Dortmund កាលពីឆ្នាំ ២០១៧។ កីឡាករវ័យ ២៤ ឆ្នាំមិនសូវបានបង្កើតផ្លែផ្កាជោគជ័យអ្វីឡើយឲ្យអ្នកមានបុណ្យ ដោយសរុប ១១៩ ប្រកួតនៃការបង្ហាញខ្លួន រកបានតែ ៣០ គ្រាប់និង Assist ២១ លើកប៉ុណ្ណោះ។ អ៊ីចឹងចាំអុតមើល តើ Barcelona ព្រមកើបលុយ ២០ លានចូលក្លឹបឬយ៉ាងណា?
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
