ខឹងម្នាក់នេះទប់ចិត្តលែងបានហើយ Ancelotti ប្រាប់ឲ្យក្លឹប ប្រញាប់លក់ចេញទៅ
អ្នកចាត់ការក្លឹប Real Madrid លោក Carlo Ancelotti បានអស់ការអត់ធ្មត់ជាមួយកីឡាករលេងតំណែងប្រយុទ្ធ ដោយចង់ឲ្យប្រធានក្លឹបចាត់ចែងដកគេចេញ ឲ្យបានកាន់តែឆាប់កាន់តែល្អ ទន្ទឹមដែលទីផ្សារដោះដូរនៅសល់រយៈពេលជិត ២ ខែទៀត ទើបចូលមកដល់។
នោះគឺ ខ្សែប្រយុទ្ធស្លាប Gareth Bale ដែលរដូវកាលនេះ គេបន្តជួបបញ្ហារបួសជង្គង់ ហើយលេងមិនសូវបានលេងជាប់លាប់ទេ ក្រោមការដឹកនាំរបស់គ្រូសញ្ជាតិអ៊ីតាលី។ យ៉ាងណាកន្លងទៅ គ្រូធំក្លឹប Real Madrid បានណែនាំឲ្យ Bale កុំទាន់អាលទៅលេងនៅជម្រើសជាតិ ព្រោះស្ថានភាពរបួសគេមិនទាន់ជាសះស្បើយ ១០០ ភាគរយ នោះទេ តែកីឡាករនៅតែប្រឆាំងហើយបន្តទៅជួយជម្រើសជាតិ ទើបធ្វើឲ្យ Ancelotti មានការខឹងសម្បាខ្លាំង និងលែងមានការអត់ធ្មត់តទៅទៀត។
ប្រភពពីសារព័ត៌មាន El Nacional ចុះផ្សាយថា Ancelotti បានទទូចឲ្យប្រធានក្លឹបលោក Florentino Perez ព្រមព្រៀងលើការលក់ចេញ Bale នៅទីផ្សារដោះដូរខាងមុខ ឬបញ្ចេញគេ នៅការព្រមព្រៀងបញ្ចប់កុងត្រាមុនកាលកំណត់ ពោលគឺមិនចង់ទុកគេដល់បញ្ចប់រដូវកាល នាចុងខែមិថុនា នោះឡើយ។
គួរបញ្ជាក់ថា លោក Antonio Conte របស់ក្លឹប Tottenham Hotspur ឯណោះ ក៏ដូចជាចាប់អារម្មណ៍មកលើខ្សែប្រយុទ្ធវ័យ ៣២ ឆ្នាំរូបនេះផងដែរ តែមិនច្បាស់ថាប្រធានក្លឹប លោក Daniel Levy អនុញ្ញាតឬអត់ឡើយ។ ទៅមើលស្ថិតិឈរជើងជារួមជាង ៨ ឆ្នាំមកនេះ របស់ Bale នៅ Madrid គឺ ២៥៤ ប្រកួត រកបាន ១០៦ គ្រាប់និង Assist ៦៨ លើក៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
