អត់មាន Ronaldo ទេ តែ Matic ថាកីឡាករ ២ រូបនេះ ពូកែញាក់បំផុតនៅ Man Utd
Nemanja Matic កីឡាករលេងតំណែងបម្រើឲ្យក្លឹបបិសាចក្រហម Man Utd បានបង្ហាញការយល់ឃើញ ពាក់ព័ន្ធនឹងឈ្មោះមិត្តរួមក្រុម ដែលខ្លួនយល់ឃើញថា បណ្តើរបាល់និងញាក់បាល់ល្អបំផុតប្រចាំក្រុម តែពុំមានឈ្មោះ Cristiano Ronaldo នោះទេ។
អាចថាមកពី CR7 រាងចូលវ័យចំណាស់ លោកមិនសូវផ្តោតលើការញាក់បាល់ដូចកាលនៅអាយុស្រករ ២០ ហើយ Matic ក៏បានចុចឈ្មោះខ្សែប្រយុទ្ធជួរមុខ ២ រូបផ្សេងទៀត នោះគឺ Mason Greenwood និង Marcus Rashford។
ប្រាប់កាលពីពេលកន្លងទៅ កីឡាករសញ្ជាតិស៊ែប៊ីប្រាប់ថា៖ "អ្នកបណ្តើរបាល់ល្អបំផុត គឺប្រាកដជាមិនមែនខ្ញុំហើយ ដោយខ្ញុំមិនមែនជាកីឡាករដែលចាំបាច់ត្រូវធ្វើរឿងទាំងអស់ហ្នឹងទេ តំណែងរបស់ខ្ញុំ មិនទាមទារឲ្យបណ្តើរបាល់ច្រើនពេកទេ ដូច្នេះខ្ញុំសុំនិយាយពីខ្សែប្រយុទ្ធរបស់យើងវិញ នោះគឺ Mason Greenwood និង Marcus Rashford ពិតមែនហើយគឺពួកគេទាំងពីរនេះឯង"។
រំឭកថា ខ្សែបម្រើវ័យ ៣៣ ឆ្នាំខាងលើ នឹងត្រូវផុតសុពលភាពកុងត្រាជាមួយក្លឹបម្ចាស់ដី Old Trafford នៅចុងខែមិថុនា ឆ្នាំ ២០២៣។ គេបានផ្ទេរមកចូលរួមនៅ United រយៈពេលជាង ៤ ឆ្នាំហើយ ជាមួយស្ថិតិបង្ហាញខ្លួនសរុប ១៦៨ ប្រកួត រកបាន ៤ គ្រាប់និង Assist ៩ លើក៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
