ស្ថានភាពដុនដាបបែបនេះ Laporta ថាមានតែគ្រូម្នាក់នេះទេ អាចមកជំនួស Koeman បាន
ក្លឹប Barcelona ដ្បិតជាក្លឹបយក្សនៅតំបន់អឺរ៉ុប ប៉ុន្តែស្ថានភាពធ្លាក់ចុះនៅពេលបច្ចុប្បន្ន គឺពិតជាមិនងាយមាននរណាចង់មកបន្តការដឹកនាំឡើយ ដ្បិតអីតំណែងរបស់លោក Ronald Koeman ក៏កំពុងតែកៀកដល់ផ្លូវបែក។
បើតាមសារព័ត៌មាន Mundo Deportivo ចុះផ្សាយថា កន្លងមកក្លឹប Barcelona ក៏ចុចគោលដៅ Xavi Hernandez, Roberto Martinez និង Andrea Pirlo ជាដើមផងដែរ តែជឿថាពួកគេនឹងមិនព្រមមកដឹកនាំឡើយ ហើយសមត្ថភាពរបស់ពួកគេក៏មិនអាចដោះស្រាយបញ្ហាដែលអ្នកមានបុណ្យកំពុងជួបប្រទះកើតដែរ។
ដូច្នេះហើយលោក Joan Laporta ក៏បង្វែររ៉ាដាទៅអ្នកចាត់ការថ្មីមួយទៀតគឺលោក Thomas Tuchel ដែលបុរសសញ្ជាតិអាល្លឺម៉ង់ ជាអ្នកធ្លាប់បានជួយឲ្យ Chelsea រួចផុតពីរណ្តៅទុក្ខ ក្រោយការដឹកនាំមិនទទួលបានជោគជ័យរបស់លោក Frank Lampard។ ចូលមករដូវកាលដំបូងភ្លាម Tuchel ជួយឲ្យតោខៀវលើកពានភ្លែត ដូច្នេះហើយ Laporta ក៏សង្ឃឹមរឿងនោះ អាចកើតឡើងដូចគ្នាជាមួយ Barcelona។
គ្រប់យ៉ាងវាស៊ីសងលើការសម្រេចរបស់ Tuchel ដែរ ព្រោះមក Barca ពិតណាស់ក្លឹបនឹងមិនអាចផ្តល់ប្រាក់ឈ្នួលខ្ពស់បានឡើយ ដោយសារកំពុងជួបវិបត្តិហិរញ្ញវត្ថុ។ ទៅមើលសុពលភាពកុងត្រារបស់អ្នកចាត់ការវ័យ ៤៨ ឆ្នាំ ត្រូវផុតនៅចុងខែមិថុនា ឆ្នាំ ២០២៤ ឯណោះ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
