Ronaldo ប្រាប់ឲ្យមិត្តរួមក្រុមកែប្រែចំណុចនេះ ប្រសិនចង់មានគ្រាប់បាល់ច្រើន
តារាឆ្នើម Cristiano Ronaldo នឹងត្រូវចូលជួយក្លឹប Man Utd តតាំងក្លឹបស្ករគ្រាប់ខៀវ Everton នាល្ងាចថ្ងៃសៅរ៍នេះ។ កន្លងទៅនៅ UEFA Champions League កីឡាករវ័យ ៣៦ ឆ្នាំ ទើបតែរកបានគ្រាប់បាល់ជ័យជម្នះឲ្យក្លឹប ទល់ Villarreal ហើយអ្នកគាំទ្រក៏កំពុងទន្ទឹមរង់ចាំចង់ឃើញ CR7 រកគ្រាប់បាល់បន្ថែម។
បញ្ជាក់ថា ស្ថិតិ ៦ ប្រកួតនៅរដូវកាលថ្មី ២០២១/២២ Ronaldo គេរកបាន ៥ គ្រាប់ហើយឲ្យក្លឹប Man Utd។ យ៉ាងណាតាមការចុះផ្សាយរបស់ ESPN បានឲ្យដឹងថា Ronaldo ជឿជាក់ថាក្លឹបអាចបង្កើតស្ថិតិគ្រាប់បាល់ល្អជាងនេះ ប្រសិនក្រុមទាំងមូលមានការកែប្រែនៅចំណុចខ្វះខាតកំឡុងពេលសាងបាល់មកខាងលើ។
ប្រភពសង្កត់ធ្ងន់ Ronaldo ចង់ឲ្យមិត្តរួមក្រុម ពេលទទួលបានបាល់ចូលមកដល់តំបន់គូប្រជែង គួរតែលេងឲ្យបានមុតជាងនេះ ហើយលេងឲ្យរហ័ស និងបញ្ជូនបាល់ចេញពីជើងឲ្យលឿនៗ ជៀសវាងកីឡាករខាងក្រុមគូប្រជែងមកឆក់យកបាល់បានមុន។
យ៉ាងណាពាក់ព័ន្ធនឹងការណែនាំនេះ យើងមិនច្បាស់ថាលោក Ole Gunnar Solskjaer នឹងសម្រេចបែបណាទៀតទេ ដ្បិតអីប្រតិកម្មរបស់លោក បែរជាសូមមិនបញ្ចេញយោបល់អ្វីទាំងអស់៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
