Ferdinand ថាបើខ្លួនជាកីឡាករ PSG ម្ល៉េះនឹងរត់ទៅធ្វើរឿងនេះ ជំនួស Messi ហើយ
លោក Rio Ferdinand បានបង្ហាញការយល់ឃើញ ក្រោយចប់ការប្រកួតកាលពីយប់មិញថា សកម្មភាពដែលអ្នកចាត់ការបង្គាប់ឲ្យ Lionel Messi ផ្តេកខ្លួនធ្វើជារនាំងការពារខាងក្រោម ពេលខាងក្រុមគូប្រជែងស៊ុត Free-Kick វាជារឿងដែលមិនគួរកើតឡើងទាល់តែសោះ។
ជាការពិតកាលនៅ Barcelona ចាយពេលជាង ១ ទសវត្ស យើងមិនដែលឃើញ Messi ទៅផ្តេកខ្លួនចាំរារាំងបាល់ Free-Kick អ៊ីចឹងទេ ទើបតែមកដល់ PSG ក្លឹបថ្មីនេះ ហាក់ផ្លាស់ប្ដូរទាំងស្រុង។ យ៉ាងណាតាមការយល់ឃើញរបស់អតីតកីឡាករនៅក្លឹបបិសាចក្រហមលោក Ferdinand បាននិយាយថា បើជាខ្លួននៅជាសមាជិកពេលនោះ ម្ល៉េះនឹងទៅផ្តេកខ្លួនជំនួសកីឡាករអាហ្សង់ទីនហើយ។
ប្រាប់ទៅ BT Sport លោក Ferdinand ថា៖ "ពេលដែល Mauricio Pochettino ប្រាប់ឲ្យ Messi គេផ្តេកខ្លួនបែបហ្នឹងលើទីលាន គឺគួរតែមាននរណាទៅប្រាប់គេថា ទេ ទេ Messi មិនគួរធ្វើបែបហ្នឹងឡើយ"។
លោកបន្ត៖ "នេះបង្ហាញពីការមិនគោរព មិនឲ្យតម្លៃ បើជាខ្ញុំ ខ្ញុំមិនឲ្យរឿងហ្នឹងកើតឡើងទេ មិនឲ្យសំលៀកបំពាក់របស់គាត់ប្រឡាក់ទេ ជារួមមិនគួរជាអ្វីដែល Messi ត្រូវធ្វើនោះឡើយ"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
