Ferdinand ថាភ្ញាក់ផ្អើល ដោយឃើញមនុស្ស ៥ នាក់នេះ ប្រចាំការមុខបន្ទប់ Ronaldo ជាប់ជានិច្ច
អតីតកីឡាករជើងចាស់នៅក្លឹបបិសាចក្រហមលោក Rio Ferdinand បានទម្លាយពីការរស់នៅរបស់ Cristiano Ronaldo ដែលនៅខាងក្នុងផ្ទះរបស់លោក គឺតែងតែមានបុគ្គលិកបម្រើការ ៥ ផ្នែកជាចម្បង ហើយប្រចាំការឈរជើងរៀងរាល់ថ្ងៃនៅទីនោះ ពោលក៏ជាដើមចមនៅពីក្រោយភាពជោគជ័យក្នុងនាមជាកីឡាករអាជីពរបស់ CR7 ដូចសព្វថ្ងៃនេះ។
ជាទូទៅកីឡាករ ច្រើនមានត្រឹមតែគ្រូបង្វឹកកាយសម្បទា និងបុគ្គលិកអ្នកចម្អិនអាហារប្រចាំគ្រួសារអ្វីតែប៉ុណ្ណោះ ប៉ុន្តែ Ronaldo មានដល់ទៅ ៥ ផ្នែកឯណោះ។ តាមការឲ្យដឹងពី Ferdinand លោកថា កាលទៅផ្ទះ Ronaldo ដំបូង លោករាងភ្ញាក់ផ្អើលដែរ ព្រោះមនុស្សប្រហែល ៦ ទៅ ៧ នាក់អង្គុយនៅខាងមុខបន្ទប់របស់ Ronaldo។
ដល់តែពេលសួរទៅកីឡាករព័រទុយហ្គាល់ផ្ទាល់ លោកឆ្លើយថា៖ "ពួកគេគឺជាអ្នកបម្រើការឲ្យខ្ញុំផ្នែកម៉ាស្សាផ្ទាល់ខ្លួន អ្នកពិគ្រោះនិងណែនាំពីអាហារបំប៉ន វេជ្ជបណ្ឌិតផ្ទាល់ខ្លួន មេចុងភៅផ្ទាល់ខ្លួន និងអ្នកបង្ហាត់ផ្លូវចិត្តមួយផ្សេងទៀត"។
Ferdinand បាននិយាយថា៖ "Ronaldo គេមើលគ្រប់ជ្រុងជ្រោយទាំងអស់នៃជីវិតរបស់គេ ដោយគ្មាននរណាធ្វើបានដល់នោះទេ ហេតុហ្នឹងហើយទើបគេទទួលបានការពង្រឹងគួរឲ្យកត់សម្គាល់"។ នេះជាពាក្យសម្តីដែល Ferdinand រៀបរាប់ពីផ្ទះរបស់ CR7 កាលលោកនៅឈរជើងឲ្យក្លឹប Juventus ក្នុងប្រទេសអ៊ីតាលី៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
