Khabib ទម្លាយសារសម្ងាត់ ដែលខ្លួនជជែកជាមួយ Ronaldo ដូចអ្វីអ្នកគាំទ្រភាគច្រើនគិត
តារាឆ្នើម UFC លោក Khabib Nurmagomedov គឺជាមិត្តជិតស្និទ្ធរបស់ Cristiano Ronaldo ហើយកន្លងមក គេធ្លាប់និយាយហើយថា រឿង CR7 ចង់ផ្ទេរមក Man Utd គឺគេបានដឹងមុនតាំងពីមុនមួយខែនៃការប្រកាសមកម្ល៉េះ។
ដល់តែថ្ងៃនេះ Khabib ក៏បានបន្ថែមនៅសារពិសេស ដែលខ្លួនបានជជែកជាមួយកីឡាករព័រទុយហ្គាល់ ពាក់ព័ន្ធនឹងការមិនពេញចិត្តអំពីការប្រកួតនៅលីគកំពូលអ៊ីតាលី។ អតីតម្ចាស់ជើងឯក UFC និយាយប្រាប់ RT Sport MMA នៅសប្តាហ៍នេះថា៖ "ខ្ញុំតាមថាមិនចង់ទម្លាយឆាតសម្ងាត់របស់ពួកយើងទេ តែការពិតគឺគាត់បានប្រាប់ខ្ញុំ ថាគាត់ធុញទ្រាន់ណាស់នឹងការលេងបាល់នៅអ៊ីតាលី អ៊ីចឹងហើយទើបគាត់ចង់ផ្ទេរទៅលីគអង់គ្លេស"។
អត្តពលិកសញ្ជាតិរុស្ស៊ីបន្ត៖ "ជាការពិត ពេលខ្ញុំមើលបាល់អ៊ីតាលីលេងគឺបែបហ្នឹងមែន ខ្ញុំមិនមែនជាអ្នកគាំទ្រធំនៅទីនោះទេ តែបើបាល់អង់គ្លេសវិញ គឺខ្ញុំមិនដែលប្តូរប៉ុស្តិ៍ឡើយ មិនថាក្រុមណាលេងទេ គឺវាតែងតែជក់ចិត្តជានិច្ច"។
បញ្ជាក់ថាការលើកឡើងនេះ គឺដូចទៅនឹងអ្វីដែលអ្នកគាំទ្រភាគច្រើនយល់ឃើញអ៊ីចឹងដែរ ដោយថាដ្បិតក្រុមនៅបាតតារាង Premier League ប្រកួតគ្នា ក៏សម្រុកទៅមកល្អមើលដែរ តែបើទៅមើល Juventus លេង ពេលមាន Ronaldo ក៏ពេលខ្លះសឹងតែធុញទ្រាន់ម្តងម្កាល។ យ៉ាងណានេះគ្រាន់ជាការយល់ឃើញរបស់មតិមួយចំនួន ដោយគ្រប់យ៉ាងគឺមានការចូលចិត្តខុសៗគ្នា៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
