Ederson ថាបើក្រៅពីអ្នកចាំទី ខ្លួនសុំចូលជំនួសតំណែងកីឡាករកំពូលរូបនេះ
Ederson បានឈរជើងជាអ្នកចាំទីឲ្យក្លឹបមេឃខៀវ Man City ចាប់តាំងពីរដូវក្តៅ ឆ្នាំ ២០១៧ ហើយគិតមកទល់ពេលនេះ រាប់បានជាកីឡាករពោរពេញដោយបទពិសោធន៍មួយរូប ជាពិសេសការប្រជែងពានរង្វាន់ក្នុងលីគ Premier League។
បុរសសញ្ជាតិប្រេស៊ីល ដែលបានឈ្នះពានស្រោមដៃមាសកាលពីរដូវកលាមុន ថ្មីៗនេះគេបាននិយាយថា បើឲ្យឡើងទៅលេងខាងក្រៅ ក្រៅពីប្រអប់អ្នកចាំទី គេមិនប្រាថ្នាតំណែងប្រយុទ្ធនោះទេ ផ្ទុយទៅវិញគឺសុំតំណែងបម្រើ ជំនួសកីឡាករសំខាន់របស់ City។
ប្រាប់ CityTV អ្នកចាំទីវ័យ ២៨ ឆ្នាំនិយាយ៖ "ប្រសិនឲ្យខ្ញុំលេងក្រៅប្រអប់ទី ខ្ញុំមិនសុំតំណែងជាខ្សែប្រយុទ្ធទេ ដោយខ្ញុំសុំយកតំណែងបម្រើ គឺកន្លែងរបស់ Kevin [De Bruyne] វិញ"។
លោកបន្ត៖ "បើឲ្យខ្ញុំរើស ឬគេសុំឲ្យខ្ញុំឡើងទៅក្រៅប្រអប់លេង ខ្ញុំនឹងនិយាយថា ដក De Bruyne ចេញទៅ ហើយដាក់ខ្ញុំចូលវិញ ដោយនឹងមិនមានការផ្លាស់ប្តូរអ្វីទាំងអស់ ជុំវិញការផ្លាស់ប្តូរនេះ"។
បញ្ជាក់ថា នេះគ្រាន់តែជាការផ្តល់បទសម្ភាសន៍បែបលេងសើចប៉ុណ្ណោះ ពោលគេមិនទៅមានភាពល្អក់កករអ្វីជាមួយកីឡាករបែលហ្សិកឡើយ។ ប្រកួតបន្ទាប់របស់ក្រុមដឹកនាំដោយលោក Pep Guardiola គឺត្រូវជួបក្រុមស្ករគ្រាប់ខៀវ Everton នៅវេលាម៉ោង ០៩:០០ នាទីយប់ ថ្ងៃទី ២១ វិច្ឆិកា៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
