អ្នកចាំទីមួយរូបថា Ronaldo ដំបូងព្រមដោះដូរអាវ ដល់តែស៊ុតប៉េណាល់ទីអត់ចូល ខឹងលែងព្រមវិញ
អតីតអ្នកចាំទីនៅក្របខ័ណ្ឌ Serie A បានទម្លាយពីរឿងរ៉ាវដែល Cristiano Ronaldo មិនព្រមដោះដូរអាវជាមួយខ្លួន ទាំងដែលដំបូងបាននិយាយគ្នារួចហើយនោះថា ព្រមដោះដូរក្រោយចប់ការប្រកួត។
នោះគឺអ្នកចាំទីធ្លាប់លេងឲ្យក្លឹប Chievo នៅឯលីគកំពូលអ៊ីតាលី គឺកីឡាករ Stefano Sorrentino ដែលបច្ចុប្បន្នលោកមានវ័យ ៤២ ឆ្នាំ និងកំពុងឈរទំនេរជើង តែមិនទាន់ប្រកាសចូលនិវត្តនៅឡើយ។ អ្នកចាំទី Stefano ធ្លាប់បានប្រកួតតតាំង Ronaldo នៅរដូវកាលដំបូងដែលលោកផ្ទេរមកដល់ Juve ពោលគឺនៅឆ្នាំ ២០១៩។
ប្រកួតនោះដ្បិតអី Juventus យកឈ្នះ ៣-០ តែ CR7 បានខកខានការស៊ុតបាល់ប៉េណាល់ទី ក្រោយពីសង្រ្គោះបានដោយអ្នកចាំទីខាងលើនៅនាទី ៥២។ និយាយប្រាប់ Sky Sports Italia កាលពីពេលកន្លងទៅ Stefano ថា៖ "ដើមឡើយយើងបានព្រមព្រៀងដោះដូរអាវគ្នាហើយ តែក្រោយគេខកខានការស៊ុតបាល់ប៉េណាល់ទី គេបានខឹងសម្បាជាខ្លាំង"។
លោកបន្ត៖ "ព្រោះតាំងពីមកលេងនៅអ៊ីតាលី លើកទីមួយហើយដែលគេស៊ុតមិនចូលកាលនោះ លុះទៅដល់បន្ទប់ផ្លាស់សំលៀកបំពាក់ គេបានព្រមចាប់ដៃខ្ញុំ ហើយនិយាយអបអរខ្ញុំ ជាមួយនឹងទឹកមុខមិនល្អ ហើយគេក៏មិនបានប្រគល់អាវមកឲ្យខ្ញុំដែរ"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
