កំណត់ត្រាថ្មី! ត្រឹម ១២ ម៉ោង អាវ Ronaldo លក់ដាច់បាន ៤៥ លានដុល្លារ តែ United បានលុយសុទ្ធប៉ុណ្ណេះទេ
កាលពីម្សិលមិញ ក្លឹបបិសាចក្រហម Man Utd បានប្រកាសបើកលក់អាវ Cristiano Ronaldo ជាផ្លូវការ ហើយជាលទ្ធផលត្រឹមតែរយៈពេល ១២ ម៉ោង សន្ទុះនៃអ្នកគាំទ្រមកបុកតម្រង់ជួរទិញទាំងនៅហាងផ្ទាល់ និងតាមរយៈគេហទំព័រ Online ឡើងដល់អាចបំបែកកំណត់ត្រាថ្មី។
អាវលេខ ៧ របស់ Ronaldo ហាក់កំពុងបង្កើតផលចំណេញសម្រាប់ក្លឹប និងម្ចាស់ឧបត្ថម្ភជាបណ្តើរៗហើយ ដោយតាមរបាយការណ៍ពី lovethesales បង្ហាញថា អាវ Ronaldo ក្លាយជាអាវមានអ្នកទិញច្រើនបំផុតនៅ Premier League រដូវកាលនេះ នាំមុខទៅលើអាវលេខ ១០ របស់ Jack Grealish, អាវលេខ ១៨ របស់ Bruno Fernandes និងអាវលេខ ៩ របស់ Romelu Lukaku។
ដោយឡែកបើយើងទៅមើលចំណូលជារួមវិញ ប្រភពបានសង្កត់ធ្ងន់ថា រយៈពេល ១២ ម៉ោងដំបូងនោះ គឺប្រាក់ដែលទទួលបានពីការលក់អាវមានដល់ទៅ ៤៥ លានដុល្លារអាមេរិក តែសម្រាប់ក្លឹប Man Utd ផ្ទាល់ទទួលបាន ៧ ភាគរយ/អាវប៉ុណ្ណោះ ហើយសល់ប៉ុន្មានគឺចែកទៅឲ្យក្រុមហ៊ុន Adidas ដែលជាអ្នកផ្គត់ផ្គង់។ នេះបើតាមរបាយការណ៍ពីអ្នកវិភាគលោក Kieran Maguire លើគេហទំព័រ Sports។
បូកចុះឡើងមានន័យថា បិសាចក្រហមត្រឹម ១២ ម៉ោងបានលុយជិត ៣,៥ លានដុល្លារពីការលក់អាវរបស់ Ronaldo ដោយមិនរាប់បញ្ចូលប្រាក់ទទួលបានពីការលក់អាវរបស់កីឡាករដទៃ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
