យកសារមុនអត់បាន ចូលខែមករាឆ្នាំក្រោយ ក្លឹប Chelsea ចង់ចរចាម្នាក់នេះជាថ្មី
ក្លឹបតោខៀវ Chelsea ហាក់នៅមានចន្លោះខ្វះខាតតំបន់ការពារ ហើយពួកគេក៏ព្យាយាមណាស់ដែរនៅរដូវក្តៅ លើការតម្រង់ទិសទៅខ្សែការពារ Jules Kounde និង Kalidou Koulibaly ជាដើម ប៉ុន្តែចុងក្រោយចរចាមិនបានសម្រេច។
យ៉ាងណាបើតាមសារព័ត៌មាន football.london បានចុះផ្សាយថា ក្រុមដឹកនាំដោយលោក Thomas Tuchel នៅតែដាក់គោលដៅចង់បានខ្សែការពារថ្មី សម្រាប់ខែមករា ឆ្នាំ ២០២២ ខាងមុខ ពោលជាទីផ្សារដោះដូររដូវរងា។ នោះគឺជាគោលដៅចាស់ Kalidou Koulibaly របស់ក្លឹប Napoli។
បុរសវ័យ ៣០ ឆ្នាំ លេចលឺថាចង់ផ្ទេរចេញពីក្លឹបក្នុងប្រទេសអ៊ីតាលីយូរណាស់មកហើយ តាំងពីតម្លៃខ្លួនគេឡើងកប់ពពក ចុះមកក្រោម ១០០ លានអឺរ៉ូ។ បច្ចុប្បន្នសុពលភាពកុងត្រារបស់ Koulibaly ត្រូវផុតនៅចុងខែមិថុនា ឆ្នាំ ២០២៣។ យើងនឹងរង់ចាំមើលជាថ្មី តើនៅរដូវរងាខាងមុខ Chelsea អាចបន្ថែមប្រព័ន្ធការពារថ្មីបានដែរឬអត់?
គួររំឭកថាអតីតយុវជនរបស់ក្លឹប Metz បានបង្ហាញខ្លួនសរុបឲ្យ Napoli ២៨៥ ប្រកួត ដោយរកបាន ១១ គ្រាប់និង Assist ៥ លើក។ តាមហាងឆេងថ្លៃខ្លួនបច្ចុប្បន្នរបស់ខ្សែការពារខាងលើ គឺថ្លៃប្រមាណ ៤៥ ទៅ ៥០ លានអឺរ៉ូ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
