Legend នៅ Juve រិះគន់ Ronaldo កប់ៗមាត់ ថាទៅស្រួលៗពេក ទាំងមិនបានធ្វើរឿងនេះ
ការផ្ទេរចេញពី Juventus ទៅកាន់ក្លឹប Man Utd សម្រាប់តារាឆ្នើម Cristiano Ronaldo បានទទួលរងការរិះគន់មិនសំចៃដៃពីអតីតវីរបុរសឆ្នើមនៅក្លឹប Juventus ពីររូបគឺលោក Sergio Brio និង Alessio Tacchinardi។
បញ្ជាក់បន្តិច ម្ចាស់ពាន Ballon d'Or ៥ សម័យកាលបានចាយពេល ៣ រដូវកាលនៅក្លឹបក្នុងប្រទេសអ៊ីតាលី ហើយគេរកបាន ១០១ គ្រាប់និង Assist ១៣៤ លើក ដោយបានលើកពានរង្វាន់ Serie A ២ ដង។ យ៉ាងណាការចាកចេញរបស់កីឡាករព័រទុយហ្គាល់គឺបានកើតឡើងភ្លាមៗ ហាក់ដូចគ្មានការរំពឹងទុក ហើយក៏ពុំមានសន្និសីទនិយាយពាក្យ លា អ្វីនោះដែរ។
ប្រាប់ Tuttosport លោក Tacchinardi និយាយ៖ "Ronaldo គួរតែចាកចេញឲ្យល្អជាងនេះ មិនគួរហោះយន្តហោះឯកជនរបស់ខ្លួន ស្របពេលដែល Allegri កំពុងជជែកជាមួយក្រុមមុនបើកការប្រកួតទល់ Empoli នោះទេ ដោយខ្ញុំគិតពីមុនថា គួរតែមានសន្នសីទសារព័ត៌មាននិយាយពាក្យលាទៅអ្នកគាំទ្រ ជារួមអ្នកគាំទ្រគួរតែសក្តិសមទទួលបានការលាបែបនេះពី Ronaldo"។
"នៅ Juve គ្មានពាក្យថាវីរបុរសទៀតនោះទេ ក្រៅពី Del Piero, Totti, Maldini ឬ Zanetti ដោយវាពិតជាពិបាកស្តាប់ការដែលគេនិយាយថា កំពុងវិលត្រលប់ទៅកន្លែងដែលដូចជាផ្ទះរបស់គេ ហើយគេបានដាក់ Juventus ទៅក្នុងស្ថានភាពដ៏លំបាកមួយ"។
ចំណែកឯលោក Brio ក៏បន្ថែម៖ "Juventus សក្តិសមនឹងទទួលបានការគោរពជាងនេះ ខ្ញុំមិនធ្លាប់គិតថា Ronaldo នឹងដើរចោលក្លឹបស្រួលៗបែបនេះទេ ដោយគេជាកីឡាករអាជីពមួយរូប ដូច្នេះការចាកចេញរបស់គេ គួរតែប្រើវិធីផ្សេងពីនេះ"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
