កុំលាក់អារម្មណ៍ បើសុខៗបាក់ចិត្តស្រលាញ់មិត្តខ្លួនឯង តោះមកប្រើវិធី ៤ នេះ
ជាមួយការប្រើប្រាស់អារម្មណ៍ គឺពិបាកនឹងគ្រប់គ្រង ជាពិសេសជាមួយមិត្តភក្តិជិតស្និទ្ធខ្លួនឯង ពេលខ្លះសុខៗក៏ធ្លាក់ក្នុងអន្លង់ស្នេហ៍គេ ជាប់ឈ្មោះជាអ្នកបង្កើតភ្លើងស្នេហ៍ជាមួយមនុស្សជិតដិតក៏មាន។
ជឿថាមនុស្សមួយចំនួនខ្លាចនឹងនិយាយទៅកាន់ដៃគូម្ខាងទៀត អ៊ីចឹងថ្ងៃនេះ Knongsrok បង្ហាញវិធី ៤ យ៉ាងដែលអ្នកគួរតែអនុវត្ត ប្រសិនស្ថិតក្នុងស្ថានការណ៍បែបហ្នឹងពិតមែន៖
៤) បើកបេះដូងដើរតាមអារម្មណ៍
ចំណុចនេះចង់និយាយថា សូមកុំដាក់គំនាបលើផ្លូវចិត្តខ្លួនឯងពេក ចូររៀនបើកអារម្មណ៍ខ្លះ ដើម្បីបង្ហាញឲ្យគេឃើញដោយប្រយោល ទោះមិនទាន់ជាទំនាក់ទំនងអី តែបើអារម្មណ៍ប្រាប់ថា ស្រលាញ់ ហើយ អ៊ីចឹងក៏ដំណើរការដោយរបៀបស្រលាញ់ខ្លះទៅ។
មនុស្សមួយចំនួនដោយសារគិតខ្លាំងពេក គិតខ្លាចបាត់បង់មិត្តភាព ខ្លាចគេខឹង រហូតដល់ពេលខ្លះបាត់បង់ក្តីសុខខ្លួនឯង និងជាពិសេសបាត់បង់ឱកាសទទួលយកមនុស្សដែលល្អបំផុត និងយល់ពីអ្នកជាងនរណាទាំងអស់។
៣) បង្ហាញឲ្យកាន់តែច្បាស់
ក្រោយអនុវត្តចំណុចខាងលើហើយ អ្នកប្រាកដជាឃើញសញ្ញាខ្លះហើយ ទោះមិនទាន់បាននិយាយថាស្រលាញ់គេក៏ដោយ។ ជាឧទាហរណ៍ តើគេមានចាប់អារម្មណ៍មកលើអ្នកខ្លះដែរទេ អ្នកបានចាប់អារម្មណ៍អ្នកលើសពីមិត្តភក្តិធម្មតាដែរទេ? មនុស្សពីរនាក់ទៅណាមកណាជាមួយគ្នា ជិតស្និទ្ធគ្នា ងាយនឹងឃើញចរិតរបស់គ្នាឆាប់រហ័សបំផុត គេប្លែកបែបណាក៏ជឿថាអ្នកឆាប់ចាប់បានដែរ។ ប្រសិនចេញភ្លើងខៀវខ្លះហើយ តោះបន្តទៅចំណុចបន្ទាប់!
២) ទម្លាយអារម្មណ៍ពិត
នៅពេលដែលមានពេលវេលាសមស្របមួយ អ្នកគួរតែចាប់យកឱកាសនោះឲ្យបានល្អ តែត្រូវចាំមើលលើបរិយាកាស និងអារម្មណ៍របស់គេផង។ នៅពេលដែលអារម្មណ៍របស់គេស្រឡះ មិនមានរឿងតប់ប្រមល់អ្វីក្នុងចិត្ត តោះអ៊ីចឹងសាកល្បងទៅ សាកនិយាយពាក្យថាស្រលាញ់លមើល សាកសុំគេឡើងតំណែង Promote ពីឈ្មោះជាមិត្តជិតដិត មកជាសង្សារបានអត់?
១) ទទួលយកការផ្លាស់ប្តូរ
ប្រសិនណាគេយល់ព្រមហើយ ក៏ល្មមដល់ពេលដែលអ្នកត្រូវប្រាប់អារម្មណ៍ខ្លួនឯងថា រវាងអ្នកនិងគេ ផ្លាស់ប្តូរមកទំនាក់ទំនងថ្មីផងដែរ។ ទាំងអារម្មណ៍ចេះប្រចណ្ឌ ចេះអន់ចិត្ត ចេះខឹង គឺមានច្រើនជាងពីមុន ហើយសម្រាប់អ្នកដែលអនុវត្តមកដល់ចំណុចចុងក្រោយនេះហើយ យើងមានតែជូនពរឲ្យអ្នកទទួលបានក្តីសុខច្រើនៗជាមួយគេ និងក្លាយជា មិត្ត ១០០ ឆ្នាំ ក្នុងន័យស្នេហាតែម្តងទៅ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
