ព្រះអង្គម្ចាស់ម៉ាឡេស៊ីនៃរដ្ឋ Johor បង្ហាញចំណាប់អារម្មណ៍ទិញក្លិបលីគកំពូលអេស្ប៉ាញ Valencia
ព្រះអង្គម្ចាស់នៃរដ្ឋ Johor ប្រទេសម៉ាឡេស៊ី គឺ Tunku Ismail ibni Sultan Ibrahim បានបង្ហាញចំណាប់អារម្មណ៍ក្នុងការទិញក្លឹបអេស្ប៉ាញ Valencia ពីពាណិជ្ជករសិង្ហបុរី Peter Lim ។
បុរសវ័យ ៣៦ ឆ្នាំរូបនេះបានបង្ហោះរឿងរ៉ាវជាច្រើននៅលើបណ្តាញសង្គម Instagram ដែលរួមបញ្ចូលទាំងអត្ថបទថតចម្លង(screenshots) អំពី Valencia និងទំព័រមួយនិយាយពីដាក់តម្លៃក្លឹបរហូតដល់ ៤០៨ លានផោន អមដោយសេចក្តីថ្លែងការណ៍អំពីមូលហេតុដែលគាត់ចាប់អារម្មណ៍ទិញក្លឹប។
ម្ចាស់ក្លឹបម្ចាស់ជើងឯកនៃលីគកំពូលម៉ាឡេស៊ី Johor Darul Ta'zim ព្រះអង្គម្ចាស់រូបនេះបាននិយាយថាប្រាក់មិនមែនជាការលើកទឹកចិត្តគាត់ទេ តែជា“ ភាពរុងរឿង និងបង្កើតប្រវត្តិសាស្ត្រ” ។
លោកបាននិយាយថា“ ខ្ញុំមិនមែនជាជាមនុស្សថ្មីក្នុងពិភពបាល់ទាត់។ ខ្ញុំបានបង្កើតក្លឹបមួយ (JDTFC) ដែលចាប់តាំងពីប្រកួតប្រជែងរក្សាខ្លួនមិនឲ្យគេកាត់ចោលរហូតបានក្លាយជាម្ចាស់ជើងឯកលីគកំពូលរាល់ៗឆ្នាំ។ ខ្ញុំបានឈ្នះពានរង្វាន់ចំនួន ១៦ គ្រឿងក្នុងរយៈពេល ៨ ឆ្នាំ។ យើងគឺជាក្រុមធំជាងគេនៅអាស៊ីអាគ្នេយ៍ និងជាក្លិបលេងពានរង្វាន់ធំបំផុតមួយនៅអាស៊ី"។
"ខ្ញុំចង់ពង្រីកអាណាចក្ររបស់ខ្ញុំ ពង្រីកស្លាបរបស់ខ្ញុំ និងទៅរកការប្រកួតប្រជែងថ្មីៗ។ ខ្ញុំមិនមែនជាមនុស្សដែលនឹងផ្លាស់ប្តូរឡូហ្គូក្លឹប ឬប្រពៃណីរបស់អ្នកទេ ... ខ្ញុំនៅទីនេះដើម្បីទទួលបានភាពជោគជ័យ និងបង្កើតប្រវត្តិសាស្ត្រ ... អ្នកត្រូវការអ្នកដែលដឹងពីបាល់ទាត់ ស្រេកឃ្លានចង់ទទួលបានជោគជ័យ ងប់ងល់ និងយល់ថាតើ Valencia ជាក្លិបធំប៉ុណ្ណា ” ។
ទោះបីជាយ៉ាងនេះក្ដី! ម្ចាស់ក្លិបចាស់លោក Peter Lim មិនបានបញ្ជាក់ថាគាត់ចាប់អារម្មណ៍លក់ក្លឹបនេះទេ។
គាត់បានទិញ Valencia ដែលជំពាក់បំណុលគេកាលពីឆ្នាំ ២០១៤ ប៉ុន្តែលោកមិនមែនជាមនុស្សដែលមានប្រជាប្រិយភាពនោះទេ ដោយក្លិបត្រូវបានបង្ខំឱ្យលក់កីឡាករកំពូល ៗ របស់ពួកគេជាទៀងទាត់ ដើម្បីកាត់បន្ថយបំណុលខ្ពស់របស់ក្លឹប។ ភាពជាម្ចាស់របស់ Valencia ត្រូវបានគេរិះគន់យ៉ាងខ្លាំងនៅក្នុងប្រទេសអេស្បាញដោយកីឡាករល្បី ៗ មួយចំនួនដូចជា Dani Parejo និង Rodrigo បានលក់កាលពីរដូវក្តៅមុនហើយក្លិបមិនបានចុះហត្ថលេខាយកកីឡាករដើម្បីពង្រឹងក្រុមនោះឡើយ។
មានការអំពាវនាវឱ្យលោក Peter Lim ដែលកម្រមានមុខនៅ Valencia ឱ្យផ្លាស់ប្តូរនិងលក់ក្លឹបចេញ។ ចាប់តាំងពីលោកបានកាន់កាប់ក្លិបមានឈ្មោះក្រៅថា Los Che ក្នុងឆ្នាំ ២០១៤ លោកបានតែងតាំងគ្រូបង្វឹកចំនួន ៧ នាក់ហើយ។ លោក Javi Gracia ដែលជាគ្រូបង្វឹករបស់ក្រុម Valencia កំពុងស្ថិតក្នុងភាពស្រងាកចិត្ត ជាមួយនឹងក្រុមដែលបានឈ្នះត្រឹមតែ ២ ប្រកួតក្នុងលីកចាប់តាំងពីដើមឆ្នាំនេះ។
ខ្សែការពារ Gabriel Paulista មិនអាចទប់ទឹកភ្នែកបានទេ នៅពេលដែលគាត់ត្រូវបានគេសួរអំពីស្ថានភាពក្រុមរបស់គាត់ បន្ទាប់ពីចាញ់ Getafe ៣ទល់០ កាលពីថ្ងៃសៅរ៍។ពេលនេះ Los Che ឈរនៅលេខ ១៤ នៅក្នុងតារាងលីគមាន ៥ ពិន្ទុដាច់ពីតំបន់កាត់ចោលមុនការប្រកួតថ្ងៃសុក្រទល់នឹង Villarreal ៕
ព័ត៌មានថ្មីៗ
