ក្រុមហ៊ុនគ្រីសអេនើជី ឈានដល់ដំណាក់កាលសំខាន់មួយទៀត ក្នុងការអភិវឌ្ឍន៍អណ្តូងប្រេងកាតអប្សរា ក្នុងប្លុក A កម្ពុជា ខណៈពេលដែលផ្លាតហ្វម កំពុងត្រូវបានដឹកចេញទៅកាន់ទីតាំងគម្រោង
សិង្ហបុរី ថ្ងៃទី ២៦ សីហា ២០២០ - ក្រុមហ៊ុនគ្រីសអេនើជី អិលធីឌី (តទៅនេះហៅថា “គ្រីសអេនើជី” ឬ “ក្រុមហ៊ុន”) ដែលជាក្រុមហ៊ុនរុករកប្រេង និងឧស្ម័នឯករាជ្យមួយ មានសេចក្តីសោមនស្សរីករាយ សូមប្រកាសថា ការកសាងផ្លាតហ្វមក្បាលអណ្ដូងផលិតកម្ម (“Mini-Platform”) សម្រាប់ការអភិវឌ្ឍន៍អណ្តូងប្រេងកាតអប្សរា ក្នុងប្លុក A ដែលស្ថិតក្នុងដែនសមុទ្រកម្ពុជា បានបញ្ចប់ជាស្ថាពរ ហើយផ្នែកខាងលើ និងជើងទម្រផ្លាតហ្វមខ្នាតតូចនេះកំពុងត្រូវបានដឹកជញ្ជូនទៅកាន់ដែនទឹកនៃប្រទេសកម្ពុជា ដែលស្ថិតក្នុងឈូងសមុទ្រថៃ ដើម្បី ធ្វើការតម្លើង។
ការកសាងផ្លាតហ្វមខ្នាតតូច សម្រាប់ការអភិវឌ្ឍន៍អណ្ដូងប្រេងកាតដំបូងគេបង្អស់របស់ប្រទេសកម្ពុជាបានចាប់ផ្ដើមកាលពីដើមខែធ្នូ ឆ្នាំ ២០១៩ នៅឯរោងចក្ររបស់ NOV’s PT Profab ដែលស្ថិតនៅកោះបាតាម (Batam Island) ប្រទេសឥណ្ឌូនេស៊ី ។ ការលើកដាក់ និងការដឹកចេញផ្លាតហ្វមខ្នាតតូចនេះ បានចប់សព្វគ្រប់ នៅថ្ងៃទី ២៥ ខែសីហា ឆ្នាំ ២០២០ ។
លោក Kelvin Tang នាយកប្រតិបត្តិ និងជាប្រធានក្រុមហ៊ុនគ្រីសអេនើជីប្រចាំកម្ពុជា បានមានប្រសាសន៍ថា៖ “គិតចាប់ពីការរៀបចំកាត់ដែកដំបូង រហូតដល់ការដឹកចេញផ្លាតហ្វមខ្នាតតូចនេះ គឺមានរយៈពេល ៩ ខែ ហើយសមិទ្ធផលនេះរឹតតែវិសេសវិសាលថែមទៀត បើទោះបីជាមានការលំបាក និងបម្រាមនានា ដែលក្រុមការងាររបស់យើង និងសហការីនៅឯ NOV Profab បានប្រឈមមុខ តាំងពីដើមឆ្នាំ ២០២០ ដោយសារតែមេរោគរាតត្បាតកូរ៉ូណា”។
លោកបានបន្ថែមទៀតថា៖ “សូមថ្លែងអំណរគុណដល់កិច្ចខិតខំប្រឹងប្រែងដ៍ធំធេងពីគ្រប់ភាគីពាក់ព័ន្ធទាំងអស់ រួមទាំងអ្នកផ្គត់ផ្គង់ និងអ្នកម៉ៅការ ដែលបានជំនះរាល់ឧបសគ្គផ្នែកភស្តុភារទាំងទ្បាយ ធ្វើយ៉ាងណាដើម្បីរក្សាការប្រគល់នូវឧបករណ៍ និងសម្ភារនានាពីគ្រប់ទីកន្លែងលើសកលលោក មកឲ្យរោងចក្រនៅ Batam បានទាន់ពេលវេលាតាមកាលកំណត់ ដើម្បីយើងឈានទៅរកគោលដៅនៃការផលិតប្រេងអប្សរាដំបូងឲ្យបានមុនដំណាច់ឆ្នាំនេះ”។
លោក Kim Lamb នាយកគ្រប់គ្រងក្រុមហ៊ុន NOV Profab បានមានប្រសាសន៍ថា៖ “យើងខ្ញុំមានសេចក្ដីរីករាយក្នុងការរួមចំណែកដ៏សំខាន់នៅក្នុងគម្រោងដំបូងមួយនេះសម្រាប់ប្រទេសកម្ពុជា។ ទាំងក្រុមការងាររបស់ក្រុមហ៊ុន NOV និង ក្រុមហ៊ុនគ្រីសអេនើជី សុទ្ធតែបានធ្វើការជាមួយគ្នាយ៉ាងជិតស្និទ្ធ ដោយប្រើប្រាស់វិធីសាស្ត្រធ្វើការរួមគ្នាជាក្រុមដ៍ពេញលេញ ដើម្បីផលិតផ្លាតហ្វមដែលមានគុណភាពមួយ ហើយនេះ ជាសក្ខីភាពពិតនៃការប្តេជ្ញាចិត្តរបស់អ្នកពាក់ព័ន្ធទាំងអស់។ យើងទន្ទឹងរង់ចាំធ្វើការជាមួយក្រុមហ៊ុនគ្រីសអេនើជីសាជាថ្មីម្តងទៀតនាពេលអនាគត”។
តំបន់ប្រេងអប្សរា នៅក្នុងប្លុក A កម្ពុជា លាតសន្ធឹងនៅលើបាសាំងខ្មែរ ដែលជាបាសាំងភូគព្ភសាស្ត្រមិនទាន់ត្រូវបានផលិត ស្ថិតក្នុងដែនសមុទ្រកម្ពុជា ឈូងសមុទ្រថៃ។ ដោយសារភាពមិនទាន់ច្បាស់លាស់ នៃសមត្ថភាពផលិតកម្មរបស់បាសាំងនេះ ការអភិវឌ្ឍន៍តំបន់ប្រេងអប្សរានឹងត្រូវធ្វើទ្បើងជាដំណាក់កាលជាច្រើន ដើម្បីកាត់បន្ថយហានិភ័យ និងផ្តល់ពេលវេលាសម្រាប់ការប្រមូល និងវិភាគលើទិន្នន័យសំខាន់ៗ ដើម្បីអនុវត្ត ក្នុងដំណាក់កាលនានាពេលអនាគត។
ដំណាក់កាលអភិវឌ្ឍ Mini Phase 1A នេះ រួមមាន ផ្លាតហ្វមខ្នាតតូច និង អណ្តូងប្រេងអភិវឌ្ឍដំបូងចំនួន៥ ដែលនឹងត្រូវបានភ្ជាប់ទៅកាន់នាវាផលិតកម្ម Ingenium II សម្រាប់ដំណើរការប្រព្រឹត្តិកម្មប្រេង ឧស្ម័ន និងទឹក។ ដំណាក់កាលអភិវឌ្ឍ Mini Phase 1A ត្រូវបានរំពឹងទុកថា នឹងឈានដល់អត្រាផលិតកម្មខ្ពស់បំផុត ៧.៥០០ បារ៉ែលក្នុង១ថ្ងៃ។
ទំនាក់ទំនងព័ត៌មាន៖
លោកស្រី Tanya Pang
ប្រធានទំនាក់ទំនងវិនិយោគិន និងទំនាក់ទំនងសាជីវកម្ម
ទូរស័ព្ទ៖ +៦៥ ៦៨៣៨ ៥៤៣០
អ៊ីមែល៖ tanya.pang[at]krisenergy.com
អំពីក្រុមហ៊ុន គ្រីសអេនើជី (KrisEnergy)
ក្រុមហ៊ុន គ្រីសអេនើជី អិលធីឌី គឺជាក្រុមហ៊ុនរុករកប្រេងកាត និងឧស្ម័នឯករាជ្យមួយ ដែលផ្តោតសំខាន់លើការរុករក អភិវឌ្ឍ និងផលិតប្រេងកាត និងឧស្ម័នក្នុងតំបន់អាស៊ីអាគ្នេយ៍ ។ ក្រុមហ៊ុនមានភាគហ៊ុន ក្នុងតំបន់ផលិតកម្មប្រេងកាត និង/ឬ ឧស្ម័នចំនួនពីរ ដោយក្នុងនោះមួយតំបន់មានទីតាំងនៅក្នុងឈូងសមុទ្រថៃ និងមួយទៀតស្ថិតនៅក្នុងដែនគោកនៃប្រទេសបង់ក្លាដេស។ ក្រុមហ៊ុនក៏មានភាគហ៊ុននៅក្នុងប្លុកចំនួន ៩ ផ្សេងទៀត ដែលកំពុងស្ថិតក្នុងដំណាក់កាលអភិវឌ្ឍ វាយតម្លៃ និងរុករកផ្សេងៗគ្នា នៅក្នុងប្រទេសបង់ក្លាដេស កម្ពុជា ឥណ្ឌូនេស៊ី ថៃ និងវៀតណាមផងដែរ។ ក្រុមហ៊ុនគ្រីសអេនើជីជាប្រតិបត្តិករក្នុងតំបន់កិច្ចសន្យាចំនួន៨។
សម្រាប់ព័ត៌មានបន្ថែម សូមចូលទៅកាន់គេហទំព័រ www.krisenergy.com ៕
ព័ត៌មានថ្មីៗ
