ហេតុអ្វី ត្រូវមកយកស្រីមេម៉ាយ ដែលលែងប្ដី? មនុស្សគគោក រកមិនបានឬ?
ជាសំណួរដែលមិត្តភក្តិ មនុស្សជុំវិញខ្លួនរបស់ខ្ញុំតែងតែសួរខ្ញុំ ជាពិសេសគឺ សូម្បីតែមនុស្សក្នុងគ្រួសារ សាច់ញាតិបងប្អូន ក៏មិនពេញចិត្តដែរ ... ។ គេថាមនុស្សស្រីមួយគំនរគរជើងគ្នា វាខ្វះស្រីណាស់ទៅអី បានជាមកយកស្រីមេម៉ាយចំណាយមាត់ញាតិ ស្រីដែលលែងប្ដីបែបហ្នឹង? តែគ្រប់យ៉ាងវាជាគំនិត ជាការគិត និងការនិយាយរបស់អ្នកទាំងអស់គ្នា ប៉ុន្តែអ្នកទាំងអស់មិនមែនជាខ្ញុំ ហើយខ្ញុំក៏មិនមែនជាអ្នកទាំងអស់គ្នា ដូច្នេះ ការគិត សម្រេចចិត្តរបស់យើងក៏មិនដូចគ្នាដែរ។ ម្យ៉ាងទៀត ជីវិតគូ វាជាការសម្រេចចិត្តរស់នៅរវាងខ្ញុំ និងដៃគូរបស់ខ្ញុំ មិនមែនដើម្បីផ្គាប់តម្រូវចិត្តនរណាម្នាក់ឡើយ ហើយក៏មិនមែនអ្នកទាំងអស់គ្នាមករស់នៅ រ៉ាប់រងលើជីវិតរបស់ពួកខ្ញុំដែរ។
- ខ្ញុំសុខចិត្តជ្រើសយកមេម៉ាយ ទោះបីគាត់ត្រូវចំណាយមាត់ញាតិដៀលថា សើចចំអកគាត់ តែវាក៏ល្អជាងដែលខ្ញុំព្រមទៅយកក្រមុំ ដែលខ្ញុំមិនស្រឡាញ់ ដើម្បីផ្គាប់ញាតិមាត់ចោលម្សៀតមួយចំនួន ដែលមួយថ្ងៃៗ ចាំតែពេបជ្រាយ និយាយដើមគេនោះឡើយ។
- ខ្ញុំសុខចិត្តជ្រើសយកស្ត្រីមេម៉ាយ ព្រោះគាត់ល្អ មិនមែនឱ្យតែមេម៉ាយសុទ្ធតែមិនល្អ ទើបលែងប្ដីនោះទេ គាត់លែងប្ដី មិនមែនប្ដីលែងគាត់ទេ។ ម្យ៉ាងទៀត ព្រោះតែប្ដីមុនរបស់គាត់គ្មានសំណាង មិនបានមនុស្សល្អដូចជាគាត់ជាគូមួយជីវិត ដូច្នេះ ខ្ញុំគួរតែក្ដោបឱកាសនេះ ព្រោះគូជីវិតខ្ញុំត្រូវការមនុស្សដែលល្អពិត តាំងចរិត អាកប្បកិរិយា មិនមែនសំដៅលើស្ថានភាពក្រមុំ ឬមេម៉ាយនោះឡើយ។
- ខ្ញុំយកមេម៉ាយព្រោះគាត់ល្អ ប្រសើរជាងយកក្រមុំខ្លះ ដើរតែលេង ស៊ីផឹក ពួកម៉ាកលិចកើតជើងត្បូង មិនចេះសូម្បីតែដាំបាយនោះទេ។ មិនថាក្រមុំ ឬមេម៉ាយ សុទ្ធតែមានល្អ និងអាក្រក់ដូចគ្នា ចុះបើយើងជួបមនុស្សល្អហើយ មាននិស្ស័យនឹងគាត់ហើយ ហើយយើង និងគាត់ក៏ស្រឡាញ់គ្នា ចុះចាំបាច់អីត្រូវទៅខ្វល់រឿងស្ថានភាព និងអតីតកាលរបស់គាត់? ទោះយ់ាងណាគាត់ក៏មានឈ្មោះថាជាមេម៉ាយពេញសិទ្ធិ ដែលអាចជ្រើសគូជីវិតថ្មី មិនមែនជាមនុស្សស្រីដែលនៅមានប្ដី ឬមនុស្សស្រីដែលទាក់ទងប្ដីគេ ហើយឆ្លើយថាខ្លួននៅទំនេរនោះឡើយ។
- ខ្ញុំជ្រើសយកមេម៉ាយ ព្រោះខ្ញុំសប្បាយចិត្តនឹងជីវិតដែលមានគាត់ ខ្ញុំពេញចិត្តនឹងជីវិតដែលបានជួបគាត់ ចាប់ផ្ដើមជាមួយគាត់។ ម្យ៉ាងទៀត ក៏អាចនិយាយបានថា ប្រហែលជាទេវតាបានចារវាសនាខ្ញុំ ជាមួយនឹងមនុស្សស្រីដែលធ្លាប់មានប្ដី ហើយលែងលះបែបហ្នឹង ទើបធ្វើឱ្យខ្ញុំមានចិត្ត អាណិតស្រឡាញ់ និងចង់មើលថែគាត់ពេញមួយជីវិតទៅមុខទៀតបែបហ្នឹង។
ចុងក្រោយ ខ្ញុំគ្រាន់តែចង់ឱ្យគ្រប់គ្នាដឹងថា ការសម្រេចចិត្តជ្រើសយកគូជីវិតរបស់នរណាម្នាក់ វាជាការសម្រេចចិត្តរបស់បុគ្គល មិនមែនដើម្បីតែហេតុផលឱ្យសមភ្នែកញាតិ ឬផ្គាប់ចិត្តអ្នកដទៃដែលនៅជុំវិញខ្លួននោះឡើយ។ ខ្ញុំជ្រើសយកមនុស្សដែលខ្ញុំស្រឡាញ់ពេញចិត្ត ចង់សាងជីវិតមួយជាមួយគាត់រហូតទៅ មិនមែនដើម្បីរស់នៅតម្រូវចិត្តអ្នកណានោះឡើយ។ មិនថាក្រមុំ ឬមេម៉ាយ សំខាន់ឱ្យតែអាចចំណាយពេលមួយជីវិតរស់នៅជួបជុំគ្នា មានក្ដីសុខសុភមង្គល អាចជួយជ្រោមជ្រែងគ្នាទៅវិញទៅមក រឹតតែសំខាន់គឺ ចាប់កាន់ដៃគ្នា តស៊ូពុះពារ ព្យាយាមថែរក្សាគ្នាឱ្យបានល្អ នោះហើយទើបជាគូជីវិតពិតប្រាកដ៕
អត្ថបទ ៖ ភី អេក / ក្នុងស្រុករក្សាសិទ្ធិ
ព័ត៌មានថ្មីៗ
