ជ្រើសរើសរ៉ែថ្មមួយដែលអ្នកពេញចិត្ត ដើម្បីទទួលយកសារលើកទឹកចិត្តសម្រាប់ជីវិត
គ្មាននរណាដែលជោគជ័យសមប្រកបគ្រប់ពេលនោះទេ ហើយក៏មិនអាចរីករាយចិត្តរហូតនោះដែរ ក៏នៅតែមានពេលខ្លះដែលជីវិតធ្លាក់ក្បែរចំណុចសូន្យ ឬពិបាកនឹងស្រោចស្រង់ត្រលប់មកវិញ។
យ៉ាងណាតាមរយៈការជ្រើសរើសនៅរូបភាពរ៉ែថ្ម ១ ក្នុងចំណោម ៤ នេះ យើងអាចបង្ហាញទៅអ្នកនូវសារណែនាំនិងលើកទឹកចិត្តដែលជីវិតគួរតែទទួលបាន៖
រ៉ែថ្មទី ១
មានតែការអត់ធ្មត់ទេ ជាដំណោះស្រាយដ៏ល្អបំផុតសម្រាប់អ្នក ហើយរឿងល្អៗនឹងមកដល់នៅពេលវេលាដែលសក្តិសម។ អ្នកត្រូវមានទម្លាប់ចេះគ្រប់គ្រងអារម្មណ៍ និងមានការអត់ធ្មត់សម្រាប់ជីវិតមួយនេះ ហើយអ្នកត្រូវតែយល់ថា ធម្មជាតិគឺបែបហ្នឹង មានឡើងមានចុះ មិនខុសពីមេឃក៏នៅមានត្រជាក់មានក្តៅ គ្មានអ្វីដែលនឹងនតាមការចង់បានរហូតឡើយ។
ផ្ទុយទៅវិញប្រសិនយើងបោះបង់ វាស្មើនឹងយើងបិទផ្លូវខ្លួនឯង ឬបំផ្លាញនូវគ្រប់យ៉ាងដែលយើងបានខិតខំ និងផ្តួចផ្តើមតាំងពីចំណុចដំបូងរៀងមក។
រ៉ែថ្មទី ២
អ្នកបានមើលឃើញពីចំណុចខ្ពស់របស់អ្នកដទៃខ្លាំងពេក រហូតធ្វើឲ្យខ្លួនឯងភ្លេចស្រលាញ់ខ្លួនឯង ហើយលែងមើលឃើញពីតម្លៃនៃជីវិតរបស់ខ្លួនឯង។
ជាសារណែនាំនិងលើកទឹកចិត្ត តាមពិតទៅជីវិតអ្នកមិនអាក្រក់នោះទេ មានគេផ្សេងដែលប្រាថ្នាចង់បានជីវិតនៅកម្រិតរបស់អ្នក អ៊ីចឹងគួរពេញចិត្តនឹងបច្ចុប្បន្នភាពរបស់ខ្លួនឯង ហើយព្យាយាមដុសខាត់ អភិវឌ្ឍវាទៅតាមដំណាក់កាល ពោលគឺកុំអង្គុយចាក់ស្មុគ ហើយបាក់ទឹកចិត្តលែងធ្វើអ្វីកើតនោះ។
រ៉ែថ្មទី ៣
អ្នកហាក់មិនរឹងមាំទាល់តែសោះមួយរយៈនេះ អ្នកបានឲ្យអ្នកដទៃមកញាំញី និងធ្វើបាបជីវិតអ្នកខ្លាំងពេកហើយ។
ដល់ពេលដែលត្រូវក្រោកឡើង ហ៊ានប្រឈមនឹងបញ្ហាចំពោះមុខហើយ ការដែលព្យាយាមលាក់បាំង មិនមាត់មិនកយូរពេក ក៏មិនប្រាកដថាល្អទាំងអស់នោះដែរ។ នៅស្ថានភាពនិងកាលៈទេសៈខ្លះ ការស្ងាត់ស្ងៀមពេក ធ្វើឲ្យបញ្ហាកាន់តែរីកធំទៅវិញទេ។ ជីវិតអ្នកមិនសក្តិសមនឹងឲ្យពួកគេមកជាន់ឈ្លីបែបហ្នឹងទៀតឡើយ ចូរក្រោកឈរឡើង បង្ហាញពីភាពអង់អាចរបស់ខ្លួនទៅកាន់ពិភពលោក។
រ៉ែថ្មទី ៤
យើងមើលឃើញថាអ្នកបានលះបង់សម្រាប់អ្នកដទៃ និងមនុស្សជាទីស្រលាញ់ខ្លាំងពេក រហូតធ្វើឲ្យពេលខ្លះបាត់បង់ភាពជាខ្លួនឯង និងខ្លួនឯងឈឺចាប់ ហើយគេកំពុងសើចសប្បាយរីករាយ។
វាមិនខុសពីចំណុចខាងលើដែលអ្នកមិនចេះស្រលាញ់ខ្លួនឯងនោះឡើយ ការលះបង់គឺជាធម្មជាតិនៃស្នេហាដែលត្រូវតែមាន តែសូមឲ្យវាស្ថិតនៅចំណុចនៃតុល្យភាពដ៏សមប្រកប ពោលកុំទោរទន់ទៅគេទាំងស្រុង រហូតភ្លេចមើលថែខ្លួនឯង៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
