« បឹងយក្សម៉ាយ » ទេសភាពស្រស់ស្អាតខ្លាំង មិនចាញ់បឹងយក្សឡោមខេត្តរតនគិរីទេ
ខេត្តរតនគិរី គឺជាខេត្តនៅភាគឦសាននៃប្រទេសកម្ពុជា ដែលជាគោលដៅទេសចរណ៍ដ៏មានប្រជាប្រិយ និងអាចទាក់ទាញភ្ញៀវទេសចរណ៍រាប់ពាន់នាក់ជារៀងរាល់ឆ្នាំ ដោយសារតែភោគទ្រព្យធម្មជាតិព្រៃភ្នំ និងបឹងធម្មជាតិជាច្រើនផងដែរ។
ដោយនៅក្នុងខេត្តរតនគិរីនោះ បឹងដែលល្បីជាងគេនោះគឺ បឹងយក្សឡោម មិនត្រឹមតែជាបឹងធម្មជាតិដ៏ស្រស់ស្អាតស្ងប់ស្ងាត់ រហូតមានរឿងនិទានដំណាលតៗគ្នាផងដែរ ពិសេសបឹងនេះថែមទាំងមានរាងរង្វេះមូលដូចបាតខ្ទះ និងទឹកថ្លាឆ្វង់ទៀតផង។ តែការពិតទៅក្រៅពី បឹងយក្សឡោម រតនគិរីមានបឹងធម្មជាតិស្រស់ស្អាតមួយស្រដៀងនឹងបឹងយក្សឡោមដែរនោះគឺ « បឹងយក្សម៉ាយ » ។
« បឹងយក្សម៉ាយ » ស្ថិតនៅក្នុងស្រុកលំផាត់ ខេត្តរតនគិរី ដែលគ្រាន់តែមើលរូបរាងពិតជាស្រដៀងនឹងបឹងយក្សឡោមខ្លាំងណាស់ ជាមួយនឹងទេសភាពព្រៃឈើ រុក្ខជាតិតូចធំខៀវស្រងាត់ មានទឹកថ្លាឆ្វង ដែលអាចងូតទឹកកម្សាន្តយ៉ាងត្រជាក់ចិត្តទៀតផង។
យ៉ាងណាមិញតាមរយៈអ្នកលេងបណ្តាញសង្គមហ្វេសប៊ុកមួយរូបមានឈ្មោះថា Sochea Njang បានរៀបរាប់ថា « យ៉ាក់ ឬ យ៉ាក មានន័យថា យាយ ក្នុងភាសាជនជាតិដើមទំពួុន នៅរតនគិរី។ ប្រជាកណ្តាល តែងក្រឡៃឈ្មោះដើមរបស់ម្ចាស់ស្រុក។ យ៉ាក់ម៉ាយ មានន័យ បឹងយាយម៉ាយ មិនមែនយក្សម៉ាយនើទេ។ បើអាចដូរបាន សុំដូរការយល់ខុស និងការក្រឡៃឈ្មោះដើម ហើយជាងនេះទៀត វាជាបង្ហាញសេចក្តីគោរពដល់ម្ចាស់ស្រុកផងដែរ »។ នេះគ្រាន់តែជាការផ្តល់មតិយោបល់ប៉ុណ្ណោះ រឿងរ៉ាវពិតយ៉ាងណាមានតែតាមដានបន្តទៀត។
គួរឱ្យដឹងផងដែរថា « បឹងយក្សម៉ាយ » មានទីតាំងស្ថិតនៅក្នុងភូមិ កែងសាន់ ឃុំ សេដា ស្រុកលំផាត់ ខេត្តរតនគិរី ដែលមានចំងាយពីក្រុងបានលុងប្រមាណ ៦០គីឡូម៉ែត្រតែប៉ុណ្ណោះ ៕
អត្ថបទ៖ ក្នុងស្រុក
ប្រភពរូបភាពផ្តល់សិទ្ធដោយ៖ L e a r n M o r e
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ Writers
Tel:
ព័ត៌មានថ្មីៗ
