សៀវភៅល្អៗ ១០ក្បាល ដែលអ្នកអាចចំណាយពេលអានពេលនៅផ្ទះ
ភ្នំពេញ៖ ក្នុងអំឡុងនៃការបិទខ្ទប់ នៅផ្ទះដើម្បីសុវត្ថិភាព ជឿច្បាស់ថាមនុស្សជាច្រើនប្រាកដជាមានអារម្មណ៍តានតឹង និងអផ្សុក ខណៈមិនសូវមានអ្វីធ្វើបន្លប់អារម្មណ៍ និងចង់ចេញទៅក្រៅ។
ថ្ងៃនេះ ក្នុងស្រុក ចង់លើកយកសៀវភៅប៉ុន្មានក្បាលដែល Admin បានអាន ហើយគិតថាជាសៀវភៅដ៏ល្អគួរចែករំលែកឱ្យអ្នកទាំងអស់គ្នាស្វែងរកវាមកអាន ដើម្បីជាចំណេះ និងទទួលបានអារម្មណ៍ថ្មីៗ ពីសៀវភៅទាំងនេះ៖
១. ទៅទីណាមិនសំខាន់ សំខាន់ទៅដើម្បីអ្វី - សុខចាន់ផល
សៀវភៅ ទៅទីណាមិនសំខាន់ សំខាន់ទៅដើម្បីអ្វី A Moment of Exploration ជាសៀវភៅមួយក្បាលដែលអ្នកនិបន្ធ សុខ ចាន់ផល ចែករំលែកអំពីបទពិសោធន៍នៃដំណើរកម្សាន្តរបស់គាត់ ទៅគ្រប់ទីកន្លែង ដែលលោកបានលើកយកពីអនុស្សាវរីយ៍ និងមេរៀនជីវិត ក៏ដូចជាបទពិសោធន៍ថ្មីៗ ពីកន្លែងផ្សេងគ្នា ហើយនៅពេលអ្នកបានអានសៀវភៅនេះ វានឹងនាំអារម្មណ៍អ្នកហាក់ដូច កំពុងបានទៅដល់ទីកន្លែងដែលគាត់បាននិទានអ៊ីចឹង ព្រោះគ្រប់សាច់រឿងនីមួយៗ សុទ្ធតែភ្ជាប់មកជាមួយរូបថតដែលផ្ដិតបានយ៉ាងស្រស់ស្អាត មកជាមួយផង។
២. និទានម៉ែ - តុន ច័ន្ទរិទ្ធ
សៀវភៅមួយក្បាលដែលមានរូបស្រីម្នាក់ញញឹមយ៉ាងស្រស់នៅលើក្របនេះ ជាស្នាដៃរបស់អ្នកនិពន្ធវ័យក្មេង តុន ច័ន្ទរិទ្ធ ដែលលើកយកឃ្លាដ៏ល្អវិសេសរបស់អ្នកម្ដាយ មកចែករំលែកដល់មិត្តអ្នកអាន។ គ្រប់ភាគដែលលោកបានលើកយកមកបង្ហាញសុទ្ធតែមានអារម្មណ៍យ៉ាងជ្រាលជ្រៅពីម្ដាយមួយរូបចំពោះកូនៗគ្រប់គ្នា។
៣. មនុស្សបាក់ទឹកចិត្ត - គឹម ឌីណា
មនុស្សបាក់ទឹកចិត្ត? សៀវភៅមួយក្បាលនេះ មិនមែនមានបំណងឱ្យអ្នកអានកាន់តែបាក់ទឹកចិត្តទៅតាមចំណងជើងនៃក្របនេះឡើយ តែសៀវភៅនេះនឹងលើកយកសាច់រឿងខ្លីជាច្រើន បង្ហាញពីការបាក់ទឹិកចិត្ត អមជាមួយឃ្លាលើកទឹកចិត្តជាច្រើនទៅវិញ។
គ្រប់រឿងខ្លីនៅក្នុងនោះ សុទ្ធតែផ្ដល់នូវខ្លឹមសារអប់រំ និងលើកទឹកចិត្តឱ្យអ្នកងើបឡើងវិញទោះបីស្ថិតក្នុងស្ថានភាពលំបាកយ៉ាងណាក៏ដោយ ហើយក៏ផ្ដល់សារលើកទឹកចិត្តឱ្យអ្នកអាចញញឹម ដើរទៅមុខបន្តបានផងដែរ។
៤. ហឫទ័យ - កែវ សេងរដ្ឋា
បណ្ដុំរឿងខ្លី ពីអ្នកនិពន្ធ កែវ សេងរដ្ឋា នឹងនាំអ្នកឯកាទៅអានពីរឿងខ្លីជាច្រើន និងសំណេរដួងចិត្តរបស់អ្នកនិពន្ធ ធ្វើឱ្យអ្នកបាត់អស់ភាពអផ្សុក និងលង់ទៅតាមសាច់រឿងខ្លីនីមួយៗរបស់រឿងនោះផងដែរ។
៥. មនោសញ្ចេតនា - សុខ ចាន់ផល
មនោសញ្ចេតនា ក៏ជាប្រជុំរឿងខ្លីរបស់កវីល្បីឈ្មោះ សុខ ចាន់ផលផងដែរ។ រឿងខ្លីពីប្រលោមលោកនេះ សុទ្ធតែឆ្លុះបញ្ចាំងពីរឿងជាច្រើន ដែលផ្ដល់ជាកម្លាំងចិត្ត និងអារម្មណ៍ល្អៗ ធ្វើឱ្យអ្នក លែងមានអារម្មណ៍ថានៅផ្ទះឯកាទៀតហើយ
៦. ភរិយាខ្ញុំអាយុ ១៨ឆ្នាំ - គឹម ឌីណា
ប្រលោមលោកដ៏ល្បីមួយក្បាលនេះត្រូវបានបោះពុម្ពជាលើកទីពីរ ដែលបង្ហាញពីស្នេហារវាងយុវតីវ័យក្មេង ជាមួយកំលោះចាស់ឈ្មោះវិចិត្រ។ សាច់រឿងនេះនឹងបង្ហាញពីចរិតក្មេងវ័យរបស់តួឯកស្រី ហើយគាប់ជួននឹងពាក្យថា «ស្អប់ជំពប់លើ» ហើយក៏មានសាច់រឿងជាច្រើនទៀត ដែលធ្វើឱ្យអ្នកអានរំភើប និងសើចបិទមិនជិត ទៅតាមអត្តចរិតរបស់តួស្រីផងដែរ។
៧. បេះដូងមួយនេះ - សេន គឹមណេង
បេះដូងមួយនេះសម្រាប់អ្នកណា? ចង់ដឹងទាល់តែចូលទៅអាននៅក្នុងសៀវភៅនេះតែម្ដង ខណៈសៀវភៅដ៏តូចនេះបានលើកយកសាច់រឿងជាស៊េរី ចំនួន ៤រឿងបញ្ចូលគ្នា ភ្ជាប់សាច់រឿងបែបស្នេហាយុវវ័យ ហើយពិតជាគួរឱ្យចង់អាន។
៨. ម៉ឺនឯក - ពៅ មករា
ប្រលោមលោកបែបស្នេហាត្រីកោណរបស់យុវវ័យ ពីអ្នកនិពន្ធវ័យក្មេង ពៅ មករា គឺជាប្រលោមលោកមួយដែលពេញនិយម ពីសំណាក់យុវវ័យជាច្រើន ហើយអ្នកក៏អាចរកអានបាន ដើម្បីឱ្យដឹងពី ជីវិតរបស់ក្មេងស្រីម្នាក់ ដែលពុះពារដើម្បីអាជីព និងស្នេហារបស់ខ្លួនបានផងដែរ។
៩. ស្នេហ៍អស់ពីហឫទ័យ - គឹម ឌីណា
បើម្នាក់ស្រលាញ់ស្មើជីវិត ហើយម្នាក់អាណិតពេញបេះដូង តើគួរជ្រើសយកម្នាក់ណា? សាច់រឿងនេះនឹងនាំអ្នកទៅស្វែងយល់ពីស្នេហាដ៏ជ្រាលជ្រៅ ដែលកើតចេញពីការសរសេររបស់អ្នកនិពន្ធស្រស់ស្អាត គឹម ឌីណា ម្ចាស់ស្នាដៃរឿង ភរិយាខ្ញុំអាយុ ១៩ឆ្នាំនេះឯង។
១០. ព្រិលធ្លាក់កណ្ដាលសមុទ្រខ្សាច់ - សួង ម៉ាក់
ហេតុអ្វីក៏មានព្រិលធ្លាក់នៅកណ្ដាលសមុទ្រខ្សាច់ទៅវិញ? តើវាអាចទៅរួចទេ? ស្នេហារបស់...... ពីរនាក់ នឹងលាតត្រដាងក្នុងប្រលោមលោកមួយនេះ ដែលធ្វើឱ្យអ្នកអាន រំភើប និងហូរទឹកភ្នែក ដោយស្នេហារបស់ពួកគេ។ ចង់ដឹងថារឿងនេះ មានសាច់រឿងអ្វីខ្លះ កុំភ្លេចទៅរកអានទៅ ព្រោះ Admin មិនចង់ Spoil សាច់រឿងគេទេ។
តាមពិតទៅ នៅមានប្រលោមលោកច្រើនក្បាលទៀតដែលអ្នកក៏គួរតែស្វែងរកអាននៅលើទីផ្សារ ប៉ុន្តែ១០ក្បាលខាងលើនេះ គ្រាន់ជាជម្រើសដែល ក្នុងស្រុកបានអានថ្មីៗ ហើយក៏ចង់លើក មកចែករំលែកតែប៉ុណ្ណោះ ប៉ុន្តែយើងក៏មានប្រលោមលោកពីអ្នកនិពន្ធល្បីៗជាច្រើនទៀត ដែលអ្នកអាចស្វែងរកអានដោយខ្លួនឯង ហើយកុំភ្លេចចែករំលែកឱ្យ Admin ដឹងផងណា!
ព័ត៌មានថ្មីៗ
