នេះមែនទេស្នេហាដែលអ្នកឱ្យខ្ញុំ? នេះឬការតបស្នងចំពោះក្ដីស្រឡាញ់របស់មនុស្សស្រីម្នាក់ ដែលបានលះបង់គ្រប់យ៉ាងដើម្បីអ្នក?
ស្នេហាដែលមានតែការសម្តែងបោកប្រាស់ មនោសញ្ចេតនាក្លែងក្លាយ កុហកលួចលាក់ឥតឈប់ឈរ...អ្នកអាចនឹងសប្បាយក្នុងការបោកចិត្តមនុស្សស្រីម្នាក់ឱ្យវង្វេងជាមួយនឹងភាពមិនចេះគ្រប់គ្រាន់របស់ខ្លួនឯង រហូតដល់ភ្លេចថា ត្រូវធ្វេីឱ្យមនុស្សស្រីម្នាក់ដែលស្រឡាញ់អ្នកបំផុត ត្រូវគេងយំយ៉ាងតឹងចិត្តតែម្នាក់ឯង។
មនុស្សស្រីម្នាក់ដែលស្រឡាញ់អ្នកខ្លាំង តែនាងបែរជាត្រូវមកសម្ងំខូចចិត្តព្រោះភាពអាត្មានិយមរបស់អ្នក ហេីយក៏ត្រូវចំណាយពេលវេលាអស់រាប់ខែ រាប់ឆ្នាំដេីម្បីបំភ្លេចមនុស្សម្នាក់ដែលនាងស្រឡាញ់ខ្លាំងបំផុតទៅវិញ។
អ្នកគឺជាមនុស្សម្នាក់ដែលនាងស្រឡាញ់ខ្លាំង ហេីយក៏ជាមនុស្សម្នាក់ដែលហ៊ានក្បត់ចិត្តនាងយ៉ាងឈាមត្រជាក់បំផុត នេះឬ អ្វីអ្នកបានតបស្នងចំពោះក្តីស្រឡាញ់ដ៏ស្មោះត្រង់របស់នាង?
នាងលះបង់គ្រប់យ៉ាង ស្រឡាញ់បំផុត ស្មោះត្រង់ បារម្ភ យកចិត្តទុកដាក់ គិតដល់អ្នកមុនខ្លួននាងទៅទៀត តែងតែធ្វេីឱ្យអ្នកមានអារម្មណ៍ថាពិសេសជាងអ្នកដទៃ តែនាងបែរជាទទួលបានមកវិញត្រឹមការឈឺចាប់ពីអ្នក។
មកដល់ពេលនេះ វេលានេះ នាងក៏មានអារម្មណ៍ថាឆ្អែតឆ្អន់ ទោះស្រឡាញ់យ៉ាងណា ក៏បន្តទ្រាំជាមួយភាពផិតក្បត់របស់អ្នកម្តងហេីយ ម្តងទៀតលែងបានដែរ។ កន្លងមកនាងក៏ធ្លាប់លេីកលែងច្រេីនរាប់មិនអស់ លេីកនេះលេីកចុងក្រោយម្តងទៀត ដែលនាងព្រមលេីកលែង
តែមិនព្រមបន្តនៅក្បែរអ្នកទៀតនោះឡើយ។
កំហុសទាំងអម្បាលម៉ាន ភាពឈឺចាប់ដែលនាងទទួលបាន នាងលេីកលែងឱ្យ ហេីយអញ្ជេីញទៅចុះ ទៅតាមផ្លូវរបស់អ្នកចុះ ខ្ញុំលែងចង់ខាតពេល ខាតក្តីស្រឡាញ់ជាមួយនឹងមនុស្សដូចជាអ្នកទៀតហើយ ថ្ងៃណាមួយអ្នកនឹងនឹកឃេីញខ្ញុំ ហើយអ្នកនឹងដឹងថា អ្នកមិនគួរធ្វេីទង្វេីមិនគប្បីដាក់មនុស្សស្រីដែលស្រឡាញ់អ្នកបំផុតដូចជាខ្ញុំនេះទេ ព្រោះក្តីស្រឡាញ់ដែលខ្ញុំមានឱ្យអ្នក អ្នកមិនអាចរកវាបានពីរដងក្នុងមួយជីវិតនេះឡើយ...។
ថ្ងៃដែលអ្នកនឹកឃើញខ្ញុំ ឃើញតម្លៃរបស់ខ្ញុំ តែខ្ញុំលែងនៅក្បែរឱ្យអ្នកមកសុំទោសទៀតហើយ ថ្ងៃដែលអ្នកចង់ស្រឡាញ់ មើលថែខ្ញុំ តែសុំទោស ថ្ងៃនោះហើយ ជាថ្ងៃដែលខ្ញុំអស់ចិត្តពីអ្នកយ៉ាងពិតប្រាកដ ពីមនុស្សស្រីល្ងង់ម្នាក់នេះ ដែលធ្លាប់ស្រឡាញ់អ្នកខ្លាំង តែលែងល្ងង់ឱ្យអ្នកធ្វើបាបចិត្តទៀតហើយ៕
អត្ថបទ ៖ អេដមីន ហត់ / ក្នុងស្រុកសូមរក្សាសិទ្ធិ
ព័ត៌មានថ្មីៗ
