មុនអាយុ ៣០ មនុស្សស្រីបើមានរបស់ទិព្វទាំង ៥ នេះជាប់ខ្លួន អាចរាប់ថាជោគជ័យហើយ
បើអ្នកជាមនុស្សស្រី តើមុនអាយុ ៣០ ឆ្នាំ អ្នកប៉ងចង់ទទួលបានអ្វីខ្លះ? ឈ្មោះជាមនុស្សស្រីចាស់ទុំ ចាស់គំនិត និងឈានទៅដល់ភាពជោគជ័យម្នាក់ តើអ្នកត្រូវការអ្វីខ្លះ យើងធ្វើការបង្ហាញ ៥ ចំណុចសម្រាប់មនុស្សស្រីមុនឈានចូលអាយុ ៣០ ឆ្នាំដូចខាងក្រោម៖
១) ទទួលបានការសិក្សាខ្ពង់ខ្ពស់ និងការងារច្បាស់លាស់
ស្រ្តីត្រូវចងចាំថា ចំណេះដឹងគឺជាកត្តាដែលគេហ៊ានឲ្យតម្លៃអ្នកខ្ពស់បំផុត ហើយវាជាហេតុផលចម្បងមួយដែលទាញឲ្យអ្នកឆ្ពោះទៅរកភាពជោគជ័យ។ ប្រសិនមុនអាយុ ៣០ ឆ្នាំ អ្នកទទួលបានការសិក្សាខ្ពង់ខ្ពស់មួយ ហើយកំពុងបម្រើអាជីពក្នុងការងារសមរម្យមួយ ឬមានរបររកស៊ីផ្ទាល់ខ្លួន នោះរាប់ថាជារឿងល្អបំផុត។
២) អាចដើរតាមក្តីស្រមៃឬចំណង់ចំណូលចិត្ត
មិនថាតែអ្នកបានប្រលូកក្នុងជីវិតអាពាហ៍ពិពាហ៍ ឬស្ថិតក្នុងជីវិតនៅលាវ សំខាន់បំផុតគឺអ្នកអាចដើរតាមក្តីស្រមៃ។ មនុស្សម្នាក់មានជីវិតតែមួយទេ អ៊ីចឹងក្តីប្រាថ្នាឬចំណង់ចំណូលចិត្តអ្វីដែលអ្នកធ្លាប់គិត គួរតែប្រើប្រាស់ពេលវេលាបំពេញវាសម្រាប់ខ្លួនឯង ឧទាហរណ៍៖ ដូចជាស្រលាញ់ការរៀនតន្រ្តីវគ្គខ្លី ឬស្រលាញ់ការវិនិយោគលើផ្នែកណាមួយ។
៣) ពង្រឹងទំនាក់ទំនង
នេះមិនសំដៅតែក្នុងទំនាក់ទំនងស្នេហាមួយមុខទេ ទៀតសោតរាប់ទាំងទំនាក់ទំនងជាមួយសាច់ញាតិ មិត្តភក្តិ ឬមិត្តរួមការងារ និងអ្នកមានឋានៈខ្ពស់ជាងខ្លួន អ្នកត្រូវតែដឹងច្បាស់អំពីរបៀបរបបនៃការនិយាយស្តី ដែលចេញមកថ្លៃថ្នូរ និងធ្វើឲ្យគេស្រលាញ់រាប់អាន។ ត្រូវចាំថាមនុស្សពូកែទំនាក់ទំនង មិនងាយស្លាប់ក្រឡានោះឡើយ។
៤) ចេះគ្រប់គ្រងហិរញ្ញវត្ថុ
អាចថានៅវ័យស្រករ ២០ យើងចូលចិត្តដើរចាយវាយ តែបើចូលមកក្បែរ ៣០ ហើយអ្នកត្រូវតែដឹងច្បាស់ពីការគណនាខ្ទង់ចំណូលចំណាយ ហើយពូកែខាងសន្សំទើបរាប់ថាជាមនុស្សស្រីជោគជ័យ។ អ្នកខ្លះពូកែរក តែមិនពូកែសន្សំ ដល់មួយឆ្នាំៗចាញ់ទាំងអ្នករកបានតិច តែពូកែសន្សំផង។ ដោយឡែកបើស្ថិតក្នុងជីវិតអាពាហ៍ពិពាហ៍ទៀតនោះ អ្នកត្រូវតែកាន់តែពូកែលើការគ្រប់គ្រងផ្នែកហិរញ្ញវត្ថុនេះ។
៥) សុទិដ្ឋិនិយម
សំដៅដល់ការគិតវិជ្ជមាន ការគិតក្នុងគោលបំណងល្អសម្រាប់មនុស្សជុំវិញខ្លួន។ ក្រៅពីលុយ ក្រៅពីសុភមង្គល តម្លៃរបស់មនុស្សគឺនៅត្រង់ការចែករំលែកភាពជោគជ័យទៅកាន់មនុស្សក្បែរខ្លួន។ បែបនេះបើអ្នកអាចជួយខ្លួនឯងបាន ហើយអាចឈានទៅដល់ការជួយអ្នកដទៃទៀតនោះ មិនថាតិចច្រើនក៏រាប់ថាចំណែកជោគជ័យមួយដែរ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
