លោក ឃុន វឌ្ឍនះ ទម្លាប់គ្រប់គ្រងពេលវេលាទាំង១៤ ជួយបង្កើនផលិតភាពការងារ
ការគ្រប់គ្រងពេលវេលា (Time Management) គឺជាជំនាញពិបាកបំផុតមួយ ដែលមនុស្សត្រូវមានជាចាំបាច់ មុនចាប់ផ្ដើមអាជីពការងារ ។ ប្រសិន បើមិនយល់ពីវិធីគ្រប់គ្រងពេលវេលា យើងអាចខ្ជះខ្ជាយពេលវេលាច្រើនក្នុងមួយថ្ងៃៗ ដោយ ទទួលធ្វើការងារច្រើនក្នុងពេលតែមួយ ឬផ្ដោតអារម្មណ៍ខ្លាំងពេកទៅលើកិច្ចការមិនចាំបាច់។ លើសពីនេះ ពេលខ្លះអ្នកអាចមានអារម្មណ៍ថា ត្រូវការពេលវេលាលើសពី ២៤ម៉ោងក្នុងមួយថ្ងៃ ដើម្បីបំពេញការងារឱ្យបានល្អ និងទាន់ពេល។ ដូច្នេះតើធ្វើ យ៉ាង ម៉េច ទើប អាច គ្រប់គ្រងពេលវេលា បានល្អ?
យោងតាម We Forum បានប្រាប់ពី ទម្លាប់ទាំង១៤ ដែល នឹងជួយអ្នកដោះស្រាយវិបត្តិគ្រប់គ្រងពេលវេលាយ៉ាងមានប្រសិទ្ធភាព៖
១. វេលាមិនខ្វះទេ ៖ មែនទែនទៅ ពេលវេលារបស់យើង មានច្រើនគ្រប់គ្រាន់រួចទៅហើយ។ ប្រសិនបើអ្នកមិនអាចធ្វើកិច្ចការអ្វីមួយទាន់ពេលកំណត់ មិនមែនមកពីមិនមានពេលធ្វើនោះទេ។ ប៉ុន្តែដោយសារអ្នកមិនបានគិតថា ការងារនោះជាការងារបន្ទាន់ ហើយមិនផ្ដល់អាទិភាពសំខាន់សម្រាប់វា។
២. មរមាញឹកពេក ពេលនឹងដើរលឿន ៖ យើងអាចបង្កើតចន្លោះខ្លះក្នុងកាលវិភាគ និងមិនគួរកំណត់គោលបំណងជាក់លាក់ខ្លាំងពេកទេ ព្រោះការងារទាំងអស់មិនប្រាកដថា បញ្ចប់ទៅដោយរលូនដោយគ្មានឧបសគ្គឡើយ។ ហេតុនេះ ការដាក់កាលវិភាគឱ្យខ្លួនឯងមរមាញឹក និងគោលបំណងជាក់លាក់ខ្លាំងពេក គឺងាយប្រឈមនឹងការធ្វើមិនទាន់។៣. សង្កេតអារម្មណ៍ ហើយចាប់ឱកាស ៖ មានថ្ងៃខ្លះយើងមិនមានអារម្មណ៍ធ្វើការទាល់តែសោះ ខណៈថ្ងៃខ្លះទៀត យើងអាចធ្វើការបាន ១២ម៉ោងក្នុងមួយថ្ងៃដោយមិននឿហត់។ ហេតុនេះ ត្រូវចេះចាប់ឱកាសធ្វើការឱ្យបានច្រើន នៅពេលមានអារម្មណ៍ស្រស់ស្រាយ។
៤. ធ្វើសកម្មភាពផ្ដល់ប្រយោជន៍ទាំងអាជីព និងជីវិតផ្ទាល់ខ្លួន ៖ លោក គ្រីស្ដ គីលឡេប៊ូ (Chris Guillebue) បានលើកឡើងថា «កំណត់គោលដៅវិជ្ជាជីវៈ និងជីវិតផ្ទាល់ខ្លួនឱ្យស៊ីគ្នា អ្នកនឹងទទួលប្រយោជន៍ជាអតិបរមា» ។ ឧទាហរណ៍៖ ប្រសិនបើអ្នកមិនមានបំណងទៅរស់នៅ ឬធ្វើជំនួញនៅប្រទេសជប៉ុនទេ មិនចាំបាច់រៀនភាសាជប៉ុនឡើយ ផ្ទុយទៅវិញអ្នកគួររៀនជំនាញ ឬវគ្គខ្លីជួយបង្កើនបទពិសោធន៍ការងាររបស់អ្នកល្អជាង។
៥. សម្រាកខ្លះ ដើម្បីបង្កើនផលិតភាពការងារ ៖ ការប្រឹងប្រែងធ្វើការខ្លាំង ត្បិតថាផ្ដល់ផលិតភាពការងារខ្ពស់ ប៉ុន្តែមានពេលខ្លះ ក៏មិនបានគេងគ្រប់គ្រាន់ដែរ។ បើទោះជាផលិតភាពការងារខ្ពស់គឺជារឿងល្អ អ្នកក៏ត្រូវចំណាយពេលខ្លះ ដើម្បីសម្រាក និងលំហែកាយខ្លះផងដែរ។ មិនដូច្នេះទេ អ្នកនឹងមានអារម្មណ៍ថា នឿយហត់អស់កម្លាំងខ្លាំង ជាមួយគ្នានេះ ផលិតភាពការងាររបស់អ្នកក៏ធ្លាក់ចុះផងដែរ។
៦. ធ្វើការច្រើនពេលតែមួយ នាំឱ្យបាត់ស្មារតីផ្ចង់អារម្មណ៍ ៖ តាមការសិក្សាបង្ហាញថា ខួរក្បាលមនុស្សដំណើរការល្អ នៅពេលមានការ កំណត់កិច្ចការដែលត្រូវធ្វើជាក់លាក់ និងមានការចែងចែកត្រឹមត្រូវ។ ប្រសិនបើគេទទួលការងារច្រើនក្នុងពេលតែមួយ ខួរក្បាលរបស់នឹងឆាប់អស់កម្លាំង ហើយពិបាកផ្ចង់អារម្មណ៍ផងដែរ។
៧. ផលិតភាពការងារមិនអាស្រ័យលើចំនួនម៉ោងធ្វើការ ៖ ការអង្គុយនៅតុធ្វើការងារច្រើនម៉ោង មិនប្រាកដថាអ្នកមានផលិតភាពការងារខ្ពស់នោះទេ។ ធ្វើអ្វីដែលអ្នកអាចធ្វើបាន ឱ្យបានច្រើនតាមលទ្ធភាព ប្រសើរជាងអង្គុយនៅតុធ្វើការរហូតដល់យប់។៨. កុំបែកអារម្មណ៍ ៖ ប្រសិនបើអ្នកកំពុងបំពេញការងារ ហើយផ្អាកធ្វើការដើម្បីគិតរឿងផ្សេង មានន័យថាអ្នកកំពុងតែពន្យឺតល្បឿនធ្វើការខ្លួនឯង។
៩. មិនទុកសារអ្នកដទៃចោល ៖ វាជារឿងល្អ នៅពេលដែលអ្នក ឆ្លើយតបសារជាមួយអ្នកដទៃបានលឿន ហើយចំណាយពេលត្រឹមតែ២ ឬ៣នាទីទៅលើសកម្មភាពនេះ។
១០. ធ្វើគម្រោងធំ ត្រូវបែងចែកជាផ្នែកតូចៗ ៖ ដើម្បីធ្វើគម្រោងធំមួយលឿន និងមានប្រសិទ្ធភាព ត្រូវបែងចែកគម្រោងនោះជាផ្នែកតូច ដើម្បីងាយស្រួលគ្រប់គ្រង និងកំណត់ថា តើអាចចាប់ផ្ដើមពីចំណុចណាមុន។
១១. កំណត់ការងារអាទិភាព ៖ ការធ្វើបញ្ជីកិច្ចការប្រចាំថ្ងៃគឺ មានសារៈសំខាន់ ប៉ុន្តែអ្នកត្រូវកំណត់ពីកិច្ចការអាទិភាព ដែលអ្នកត្រូវធ្វើឱ្យបានត្រឹមត្រូវ ហើយប្រើថាមពលធ្វើវាឱ្យលឿនបំផុតតាមដែលអាចធ្វើទៅបាន។
១២. ផ្ទេរការងារខ្លះឱ្យអ្នកដទៃ ៖ ដើម្បីធ្វើការឱ្យប្រកបដោយប្រសិទ្ធភាព មិនត្រូវបារម្ភពីចែករំលែកការងារឱ្យអ្នកដទៃធ្វើនោះទេ។ លោក ចន ម៉ាកវ៉ែល (Jonh Maxwell) អ្នកនិពន្ធជនជាតិអាមេរិកដ៏ល្បីបាននិយាយថា «ប្រសិនបើអ្នកដទៃអាចធ្វើការងារបាន ៨០% នៃគុណភាពការងារអ្នក ផ្ទេរកិច្ចការនោះឱ្យគេធ្វើចុះ។»១៣. រស់នៅក្នុងពេលបច្ចុប្បន្ន ៖ បញ្ឃប់ការខ្វល់ខ្វាយពីអនាគត ហើយផ្ដាច់ខ្លួនពីភាពជោគជ័យ និងបរាជ័យក្នុងអតីតកាល ។ បន្ទាប់មក ផ្ដោតលើការងារនៅចំពោះមុខអ្នក ដោយធ្វើវាឱ្យបានល្អបំផុត។
១៤. ចេះកត់ត្រា ៖ កុំស្មានថា អ្នកអាចចងចាំរាល់ព័ត៌មានល្អៗ ដែលអ្នកធ្លាប់ស្ដាប់ អាន និងមើលឱ្យសោះ។ ឆ្លៀតពេលខ្លះ ដើម្បីកត់ត្រាវាទុក ដើម្បីការពារការភ្លេចភ្លាំង ដែលកើតមានជាប្រចាំ។
សរុបមក ការពង្រឹងសមត្ថភាពក្នុងការគ្រប់គ្រងពេលវេលាឱ្យបានល្អ គឺទាមទារការយល់ដឹង និងការអនុវត្តយ៉ាងម៉ត់ចត់បំផុត។ ជាពិសេស ត្រូវមានការផ្ដោតអារម្មណ៍ខ្ពស់ ចេះបែងចែកការងារអាទិភាព គ្រប់គ្រងខ្លួនឯងឱ្យបានល្អ ដឹងថាការងារណាគួរចែកឱ្យអ្នកដទៃធ្វើ និងចេះកត់ត្រាជាប្រចាំ៕
ព័ត៌មានថ្មីៗ
