កូនៗទើបរៀនចប់ទីថ្នាក់ទី១២គួរយល់ដឹង! នេះគឺរាល់ជំនាញទាំង៨ដែលទទួលបានប្រាក់បៀវត្សច្រើននៅកម្ពុជា
ការជ្រើសជំនាញសិក្សាឱ្យត្រូវនឹងទេពកោសល្យពីកំណើត គឺជារឿងសំខាន់បំផុតក្នុងការបណ្ដុះបណ្ដាលឱ្យខ្លួន ក្លាយជាមនុស្សពោរពេញដោយសមត្ថភាព។ ប៉ុន្តែការជ្រើសរើសជំនាញ ដែលត្រូវនឹងសមត្ថភាព បូកបន្ថែមនឹងឱកាសការងារដែលមានប្រាក់បៀវត្សខ្ពស់ ក្រោយបញ្ចប់ការសិក្សា គឺកាន់តែល្អ។ ខាងក្រោមនេះ គឺជាជំនាញដែលមានទីផ្សារការងារច្រើននិងប្រាក់ចំណូលច្រើននៅកម្ពុជាសព្វថ្ងៃ៖
១. ស្ថាបត្យករ
ការវិនិយោគទុននឹងនាំឲ្យមានកំណើននៃការសាងសង់អគារនៅក្នុងប្រទេសកម្ពុជា។ ការលូតលាស់ផ្នែកសំណង់និងទាមទារឲ្យមានតម្រូវការផ្នែកវិស្វករ គូសប្លង់ រចនាប្លង់ និងតុបតែងនៅក្នុងអគារ។ ស្ថាបត្យករ ត្រូវតែមានវិជ្ជាជីវៈត្រឹមត្រូវ ព្រោះរាល់ការសម្រេចចិត្តរបស់ស្ថាបត្យករ គឺទាក់ទងដល់សុវត្ថិភាពសាធារណៈ។ការងារនេះអាចរកប្រាក់ចំណូលបានចាប់ពី ២០០ ទៅ១៥០០ ដុល្លារ ក្នុងមួយខែ។
២. វិស្វករសំណង់ស៊ីវិល
ជំនាញនេះនិស្សិតត្រូវសិក្សា និង រៀបចំសំណង់ស្ថាប័នឯកជន និង សាធារណៈ ដូចជាហេដ្ឋារចនាសម្ព័ន្ធ (ផ្លូវថ្នល់, ផ្លូវដែក, ធារាសាស្ត្រ និងប្រព័ន្ធសំអាតទឹក) ស្ពាន និង សំណង់។ ក្រោយបញ្ចប់ការសិក្សា អាចមានឱកាសក្នុងការចូលរួមគម្រោងវិនិយោគធំៗ របស់ក្រុមហ៊ុនឯកជននានា ក្នុងការត្រួតពិនិត្យលក្ខណៈបច្ចេកទេសសាងសង់។ ចំណែកឯកម្រៃ គឺទទួលបានជាកញ្ចប់ ក្នុង១គម្រោងមួយៗ។
៣. វិស្វករអគ្គិសនី
អ្នកបញ្ចប់ការសិក្សាវិស្វករអគ្គិសនីនឹងមានជំនាញនិងចំណេះដឹងសំខាន់សម្រាប់ធ្វើការក្នុងវិស័យអគ្គិសនី អេឡិចត្រូនិចនិងកុំព្យូទ័រ ។ ចំណែកតម្រូវការធនធានមនុស្ស គឺមានច្រើន រីឯអ្នកសិក្សាមិនសូវមាន។ ដូច្នេះហើយទើបអ្នកដែលធ្វើការក្នុងវិស័យនេះ ទទួលបានប្រាក់បៀវត្សខ្ពស់។
៤. អ្នកជំនាញផ្នែកលក់ និងទីផ្សារ
ការងារនេះបច្ចុប្បន្នមិនត្រឹមតែមានការពេញនិយមនៅក្នុងប្រទេសកម្ពុជា ប៉ុន្តែ ការងារនេះនឹងឆ្លើយតបទៅនឹងតម្រូវការនៃការនាំចូលនៃផលិតផល ដែលទាមទារឲ្យមានជំនាញផ្នែកលក់ និងទីផ្សារ។
៥.អ្នកទំនាក់ទំនងសាធារណៈ
ការកើនឡើងនៃអ្នកចំណូលស្រុកនៃជនបរទេស មកវិនិយោគ ឬទំនាក់ទំនងការងារការទូតនៅក្នុងប្រទេសកម្ពុជា ដូច្នេះ ភ្នាក់ងារនៃអ្នកទំនាក់ទំនងសាធារណៈពិតជាការងារសំខាន់ ដើម្បីធានាថាទំនាក់ទំនងនឹងទទួលបានប្រសិទ្ធភាព។
៦. អ្នកជំនាញខាងផ្នែកព័ត៌មានវិទ្យា
ជាការងារដែលកំពុងតែពេញនិយម និងឆ្លើយតបទៅនឹងតម្រូវការទីផ្សារជាការងារពិសេស ការកើនឡើងនូវបច្ចេកវិទ្យាក្នុងយុគសម័យទំនើប ដែលធ្វើឲ្យមានតម្រូវការអ្នកជំនាញនេះ។
៧.គណនេយ្យករ ឬ ហិរញ្ញវត្ថុ
ជាការងារស្នូលនៅក្នុងក្រុមហ៊ុន ដែលតម្រូវឲ្យមានចំណេះដឹងពាក់ព័ន្ធនឹងការគ្រប់គ្រងចំណូលចំណាយ និងថវិកាឲ្យបានហ្មត់ចត់ និងរបាយការណ៍ហិរញ្ញវត្ថុ។ការវិនិយោគពីសំណាក់បណ្តាប្រទេសនានានៅក្នុងតំបន់មាន ការកើនឡើង តាមបណ្តាធនាគារនានានៅក្នុងប្រទេសកម្ពុជាត្រូវការឲ្យមានតួនាទីទាំងនេះ ជាចាំបាច់។
៨.វិស្វកម្មមេកានិច
វិស្វករមេកានិចមានសមត្ថភាពបង្កើតម៉ាស៊ីនទាំងតូច ទាំងធំជាច្រើន ដូចជារថយន្ត មនុស្សយន្ត ម៉ាស៊ីនផលិតអគ្គិសនី ទូរទឹកកក ម៉ាស៊ីនត្រជាក់ និងម៉ាស៊ីនដ៏ទៃជាច្រើនទៀត។ ជាពិសេសមានឱកាសការងារដូចជាធ្វើការនៅ រោងចក្រផលិតគ្រឿងយន្តឬម៉ាស៊ីន ធ្វើការនៅក្នុងក្រុមហ៊ុនប្រឹក្សាយោបល់ផ្នែកមេកានិច ធ្វើការជាអ្នកលក់បច្ចេកទេស ធ្វើការជាអ្នកត្រួតពិនិត្យនៅក្នុងរោងចក្រដែលទាក់ទងនឹងម៉ាស៊ីន អាចក្លាយជាអ្នកគ្រប់គ្រង ឬជាសាស្ត្រាចារ្យ។ល៕
អំពីអ្នកសរសេររបស់យើង៖ PECH PHEARUN
Tel:
ព័ត៌មានថ្មីៗ
