អាហារទាំង៧មុខនេះ ជួយឱ្យបត់ជើងស្រួល ជួយសម្រួលពោះវៀនសម្រាប់អ្នកដែលពិបាកបន្ទោរបង់!
បញ្ហានៃការទល់លាមក គឺជារឿងទូទៅដែលមនុស្សជាច្រើនតែងតែជួប។ នេះគឺដោយសារតែ ពោះវៀនធ្វើការយឺត ឬការថយចុះនៃប្រព័ន្ធរំលាយអាហារ។ លើសពីនេះទៅទៀត របបអាហារដែលមានជាតិសរសៃតិចក៏អាចធ្វើឱ្យទល់លាមកផងដែរ។ ដូច្នេះការជ្រើសរើសអាហារមួយចំនួនដែលអាចជួយសម្រួលដល់ពោះវៀនឱ្យមានដំណើរការល្អគឺពិតជាមានសារៈសំខាន់ខ្លាំងណាស់។
តោះមកមើលអាហារ៧មុខ ដែលជួយជំរុញដល់ចលនាពោះវៀន និងជួយព្យាបាលការទល់លាមកបានយ៉ាងល្អដូចខាងក្រោមនេះ៖
១) ផ្លែប៉ោម៖ ផ្លែប៉ោមជាអាហារជួយជំរុញដល់ការបន្ទោរបង់។ ព្រោះវាជាប្រភពដ៏ល្អនៃជាតិសរសៃ ដោយផ្លែប៉ោមតូចមួយផ្លែផ្តល់ជាតិសរសៃដល់ទៅ ៣.៦ ក្រាម។ ផ្លែប៉ោមក៏មានជាតិសរសៃរលាយមួយប្រភេទដែលហៅថា pectin ដែលត្រូវបានគេស្គាល់យ៉ាងច្បាស់ថាមានប្រសិទ្ធភាពជួយបង្កើនល្បឿនរំលាយអាហារនៅក្នុងពោះវៀនធំ។ កាត់បន្ថយការទល់លាមក និងកែលម្អសុខភាពពោះវៀន ដោយការបង្កើនចំនួនបាក់តេរីមានប្រយោជន៍។ លើសពីនេះ ផ្លែប៉ោមក៏អាចប្រើជាអាហារបំប៉នសុខភាពបានផងដែរ ព្រោះវាផ្តល់ថាមពល និងមានកាល់ឡូរីទាប។ សាកល្បងយកផ្លែប៉ោមមួយផ្លែដាក់ជាមួយទឹកដោះគោជូរ ឬលាយទទួលទាននៅក្នុងសាឡាត់ ឬបន្លែផ្សេងៗទៀតដើម្បីឱ្យមានរសជាតិឈ្ងុយឆ្ងាញ់។
២) ផ្លែព្រូន ឬតំណាប់ព្រូន៖ មិនត្រឹមតែមានរសជាតិឆ្ងាញ់ប៉ុណ្ណោះទេ វាក៏ត្រូវបានគេប្រើជាថ្នាំបញ្ចុះលាមកតាមបែបធម្មជាតិផងដែរ ព្រោះវាជាផ្លែឈើដែលជួយដល់ការរំលាយអាហារ។ ក្នុងនោះដែរ ផ្លែព្រូន ៤ ផ្លែត្រូវបានគេរកឃើញថា មានជាតិសរសៃ ២ ក្រាម ហើយក៏សម្បូរទៅដោយវីតាមីន A និងប៉ូតាស្យូមដែលរាងកាយត្រូវការផងដែរ។ ផ្លែព្រូនក៏មានផ្ទុកសារធាតុ sorbitol ដែលវាដើរតួជាថ្នាំបញ្ចុះលាមកបានយ៉ាងល្អ។
៣) ផ្លែគីវី៖ ជាអាហារដែលជួយដល់ការបន្ទោរបង់ ព្រោះវាសម្បូរទៅដោយជាតិសរសៃ។ មិនតែប៉ុណ្ណោះផ្លែគីវីជាអាហារដ៏ល្អសម្រាប់ជំរុញចលនាពោះវៀនឱ្យមានដំណើរការល្អ។ គីវីទំហំមធ្យមមួយផ្លែមានផ្ទុកជាតិសរសៃ ២ ក្រាម។ ការទទួលទានផ្លែគីវីជាប្រចាំអាចជួយសម្រួលពោះវៀន រំញោចពោះវៀន និងជួយបំបាត់ការទល់លាមកបានយ៉ាងមានប្រសិទ្ធភាព។
៤) គ្រាប់ Flaxseed៖ បន្ថែមពីលើអត្ថប្រយោជន៍ចំពោះសុខភាពផ្សេងៗ គ្រាប់ Flaxseed ក៏មានសារធាតុជំរុញការរំលាយអាហារផងដែរ។ ដោយសារតែវាមានជាតិសរសៃខ្ពស់ និងមានសមត្ថភាពជំរុញចលនាពោះវៀនឱ្យមានដំណើរការទៀងទាត់ គ្រាប់ Flaxseed ១ស្លាបព្រាកាហ្វេមានផ្ទុកជាតិសរសៃរហូតដល់ទៅ ៣ក្រាម។ ការទទួលទានគ្រាប់ Flaxseed ១ស្លាបព្រាកាហ្វេសជារៀងរាល់ថ្ងៃសម្រាប់រយៈពេល ១២ សប្តាហ៍ អាចជួយកែលម្អការទល់លាមក រួមទាំងការរំលាយអាហារបានយ៉ាងល្អ និងជួយសម្រកទម្ងន់បានផងដែរ។
៥) ទឹកដោះគោជូរ៖ ផលិតផលទឹកដោះគោជាច្រើន រួមទាំងយ៉ាអួរនេះផងដែរ មានមីក្រូសរីរាង្គដែលហៅថា probiotics ដូច្នេះហើយវាជាអាហារដ៏ល្អសម្រាប់ជំរុញដល់ការបញ្ចេញចោល។ វាធ្វើឱ្យ សុខភាពប្រព័ន្ធរំលាយអាហារមានភាពប្រសើរឡើង ធ្វើឱ្យលាមកទន់ អាចជួយព្យាបាលការទល់លាមក។ ការទទួលទានទឹកដោះគោជូរ ១៨០ មីលីលីត្រ ជារៀងរាល់ព្រឹករយៈពេល 2 សប្តាហ៍ អាចធ្វើឱ្យពោះវៀនមានចលនាល្អប្រសើរឡើងចំពោះអ្នកដែលមានការទល់លាមករ៉ាំរ៉ៃ។ ទឹកដោះគោជូរ អាចបរិភោគសម្រាប់អាហារពេលព្រឹក ឬធ្វើទឹកក្រឡុកលាយជាមួយគ្រាប់ Flaxseed ដើម្បីបង្កើនជាតិសរសៃទ្វេដង។
៦) កាហ្វេ៖ ក៏ជាអាហារដែលជំរុញការកន្ត្រាក់នៃសាច់ដុំក្នុងពោះវៀនធំ ជួយឱ្យយើងបញ្ចេញលាមកមកបានល្អ។ កាហ្វេមានអត្ថប្រយោជន៍ចំពោះសុខភាពជាច្រើនទៀតដូចជា ធ្វើឱ្យឈាមរត់បានប្រសើរ ជួយក្នុងការចងចាំ និងធ្វើឱ្យលំហាត់ប្រាណកាន់តែមានប្រសិទ្ធភាព។ វាក៏សំបូរទៅដោយសារធាតុប្រឆាំងអុកស៊ីតកម្ម និងជំរុញចលនានៅក្នុងពោះវៀនធំ។ កាហ្វេជាភេសជ្ជៈដ៏ល្អមួយដែលអាចជួយអ្នកបានយ៉ាងល្អ។ គួរពិសាកាហ្វេខ្មៅភ្លាមៗនៅពេលអ្នកក្រោកពីដំណេកនៅពេលព្រឹក។
៧) ដំឡូងជ្វា៖ បន្ថែមពីលើការផ្តល់នូវវីតាមីន និងសារធាតុរ៉ែជាច្រើន វាក៏ជាអាហារដែលជួយដល់ការបន្ទោរបង់ផងដែរ។ ដោយសារតែវាមានជាតិសរសៃច្រើនដែលអាចជួយបង្កើនភាពទៀងទាត់នៃការបញ្ចេញចោល។ ដំឡូងជ្វាជាមធ្យមមួយមើមមានជាតិសរសៃ ៤ ក្រាម ហើយជាតិសរសៃដែលមាននៅក្នុងដំឡូងជ្វាភាគច្រើនគឺមិនរលាយ។ ហើយមានច្រើនប្រភេទទៀត ដូចជា សែលុយឡូស លីកនីន និងសារជាតិ pectin។ ដោយហេតុនេះទើបវាជួយជំរុញពោះវៀនឱ្យមានដំណើរការល្អ។ អ្នកអាចចម្អិនវាញ៉ាំតាមវិធីផ្សេងៗគ្នាដូចជា ដុត ចៀន ឬស្ងោរ ទៅតាមរូបមន្តដែលអ្នកចូលចិត្ត៕
ព័ត៌មានថ្មីៗ
