ចំណាំមើល! គូស្នេហ៍ភាគច្រើន ច្រើនតែឈ្លោះទាស់គ្នា ព្រោះតែរឿតតិចតួច តូចតាចតែប៉ុណ្ណោះ
ជារឿងដែលតែងតែកើតឡើងជាញឹកញាប់ ចំពោះទំនាក់ទំនងគូស្នេហ៍ជាច្រើន ដែលតែងតែឈ្លោះទាស់ ខឹង ងរងក់ អន់ចិត្តដាក់គ្នា តែសួរថា តើពួកគេឈ្លោះគ្នា អន់ចិត្តនឹងគ្នា ចេះតែមានបញ្ហានឹងគ្នាព្រោះតែរឿងអ្វី? គឺអត់មានអីទេ ភាគច្រើន គឺព្រោះតែរឿងតិចតួចតែប៉ុណ្ណោះ តែមកពីពួកគេតែងតែគិត និងយល់ខុសគ្នា។
១. មនុស្សស្រី ចូលចិត្តគិត លម្អិតចំពោះរឿងតូចតាច
ភាគច្រើននៃមនុស្សស្រី ចូលចិត្តណាស់ អាខាងខឹង អន់ចិត្ត គិតច្រើន ខ្វាយខ្វល់ ជាពិសេស គ្រាន់តែរឿងតូចតាច បន្តិចបន្តួចសោះ ក៏អាចធ្វើឱ្យនាងដឹកយំតែម្នាក់ឯងដែរ។ ខឹងគេ អន់ចិត្តនឹងគេ ចង់ឱ្យគេមកលួង ដល់ពេលគេមិនលួង គេមិនខ្វល់ បែរជាមានគំនិតគិតថា គេមិនបារម្ភ មិនស្រឡាញ់ខ្លួនឯងទៅវិញ។
ហើយវាក៏ជាទម្លាប់របស់មនុស្សស្រីដែរ ដែលចូលចិត្តខឹង រករឿងព្រោះតែរឿងបន្តិចបន្តួច តែមិននិយាយឱ្យចំៗទៅកាន់ដៃគូឡើយ គឺសុខចិត្តសម្ងំអន់ចិត្តតែម្នាក់ឯង ក៏ព្រោះតែចរិតបែបនេះហើយ ដែលធ្វើឱ្យគូស្នេហ៍ប្រែជាស្ងៀមស្ងាត់ មិនសូវខ្វល់ ហើយដល់ពេលគេសួរនាំមែនទែនទៅ បែរជានិយាយថា "អត់មានអីទេ" នេះហើយជាចរិតធម្មជាតិរបស់មនុស្សស្រី។
មនុស្សស្រីណា ក៏ដូចមនុស្សស្រីណាដែរ តែបើសួរអំពីបញ្ហាឱ្យច្បាស់លាស់ទៅ គឺអត់មានអីទេ តែមកពីខ្លួននាងចូលចិត្តគិតច្រើនតែម្នាក់ឯង ខ្វាយខ្វល់តែឯង ទើបបង្កើតបានទៅជាការខឹង ងរងក់ អន់ចិត្ត ឈ្លោះគ្នាអត់អំពើ។ ធ្វើបែបហ្នឹង ទើបទំនាក់ទំនងកាន់តែពិបាកស្រោចស្រង់។
២. មនុស្សប្រុស មិនសូវរវល់ មិនខ្វាយខ្វល់ ព្រោះគិតថា វាជារឿងតិចតួច
ជឿថា នៅពេលដែលសង្សារ ឬដៃគូខឹង រករឿង ឈ្លោះទាស់ ឬអន់ចិត្ត មនុស្សប្រុសភាគច្រើន គឺអត់ដឹងអីទេ ព្រោះមនុស្សស្រីពេលខឹង ឬអន់ចិត្ត ចូលចិត្តទុកគូស្នេហ៍ដូចជាគ្រូទាយ ឱ្យគូស្នេហ៍គិតមើល ទាយមើល ថានាងខឹង ឬអន់ចិត្តព្រោះតែរឿងអ្វី?
ប៉ុន្តែចរិតជាក់ស្ដែងរបស់មនុស្សប្រុសភាគច្រើន ជាពិសេសគឺមនុស្សប្រុសស្មោះ គឺមិនចេះសុំាញុំា ឬយកចិត្តទុកដាក់ចំពោះរឿងតិចតួច ដែលគូស្នេហ៍ខឹងនោះឡើយ ពេលក៏ រឿងខ្លះ គេមិនដឹងទាល់តែសោះ ជួនកាលរឿងនោះ គ្រាន់តែជារឿងអចេតនា ឬភ្លេចភ្លាំងមួយគ្រា ក៏អាចធ្វើឱ្យមនុស្សស្រីយកទៅគិតច្រើនតែម្នាក់ឯងបានដែរ។
ជារឿយៗ មនុស្សប្រុស តែងតែសួរនាំគូស្នេហ៍ពីបញ្ហាដែរ តែសួរពេលណា នាងតែងតែនិយាយថា "អត់អីទេ! អត់ខឹងទេ! អត់មានរឿងអីទេ!" តែធាតុពិតក្នុងចិត្តខឹងគេចង់ឆេះហើយ ហើយក្ដៅថែមមួយកម្រិតទៀត គឺពេលមនុស្សប្រុសសួរបែបហ្នឹង ខ្លួនមិននិយាយប្រាប់គេទេ បែរជាគិតថា មនុស្សប្រុសមិនដឹងកំហុស ខុសហើយបែរជាធ្វើដូចគ្នារឿងអ្វីទៀត។
តាមពិតទៅ មនុស្សបើស្រឡាញ់គ្នា កុំទុកដៃគូដូចជាគ្រូទាយអី គួរតែទុកដៃគូជាគ្រូពេទ្យ គ្រូទាយ ទាយមិនដែលត្រូវគ្រប់រឿងទេ តែបើជាគ្រូពេទ្យ ប្រាប់កន្លែងឈឺឱ្យច្បាស់ៗមក ស្រួលដាក់ថ្នាំឱ្យត្រូវ ដឹងតែជាឆាប់ មិនបាច់ ត្រូវទៅសម្ងំកើតទុក្ខ ឈឺចាប់ចុកតែម្នាក់ឯងនោះឡើយ។
មនុស្សប្រុសភាគច្រើន ធ្វើខុសទាំងមិនដឹងកំហុស ខុសទាំងមិនដឹងអ្វីសោះ ហើយក៏ត្រូវខុសមួយតង់ទៀត នៅពេលដែលសួរមនុស្សស្រី ហើយនាងប្រាប់ពីមូលហេតុ ស្របពេលនោះ មនុស្សប្រុសក៏បន្ថែមថា "អីគេ! គ្រាន់តែរឿងប៉ុណ្ណឹងសោះ" ចំណុចនេះហើយ ដែលធ្វើឱ្យមនុស្សស្រីកាន់តែខឹង ព្រោះមនុស្សប្រុស ចូលចិត្តទុករឿងដែលមនុស្សស្រីគិតថាធំដុំ ធ្វើជារឿងតូចតាច តិចតួច ដូចគ្មានរឿងអ្វីនេះឯង៕
អត្ថបទ ៖ មនុស្សចុងក្រោយ / pHknongsrok
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖
Tel:
ព័ត៌មានថ្មីៗ
