កីឡាករ Spurs មួយរូប ថា Messi ធ្លាប់ហៅខ្លួនឲ្យទៅលេងនៅ Barcelona
ការចាកចេញរបស់ Lionel Messi ពីក្លឹប Barcelona បានធ្វើឲ្យពិភពបាល់ទាត់មានការភ្ញាក់ផ្អើលជាខ្លាំង តែតារាឆ្នើមអាហ្សង់ទីនក៏បានរកឃើញទ្រនំថ្មីរបស់ខ្លួនភ្លាមៗនៅប៉ុន្មានថ្ងៃបន្ទាប់ជាមួយនឹងក្លឹបបារាំង Paris Saint-Germain។
ធ្លាប់មានដំណឹងថា Messi ចាកចេញ ព្រោះដោយសារសុំក្លឹបឲ្យទិញ Cristian Romero មិនបាន ដល់ឥឡូវសាមីខ្លួនខាងខ្សែការពាររបស់ក្លឹប Tottenham Hotspur ចេញមកបកស្រាយហើយ រឿង M10 ធ្លាប់ចង់ឲ្យខ្លួនទៅ Barcelona គឺវាជាការពិត។
និយាយប្រាប់ Radio AM 550 ខ្សែការពារឆ្នើមរបស់ជម្រើសជាតិអាហ្សង់ទីននិយាយ៖ "ជាការពិតដែល Messi ចង់បានខ្ញុំទៅក្រុមរបស់គាត់ គឺទៅចូលរួមនៅ Barcelona ហើយទៅមើល PSG ពេលនេះបានកសាងក្រុមមួយដ៏អស្ចារ្យ តែខ្ញុំក៏រាងសោកស្តាយបន្តិចដែរ ដែលគាត់ចាកចេញ ព្រោះខ្ញុំចង់ឃើញគាត់នៅទីនោះរៀងរហូត ចុងក្រោយខ្ញុំមានតែជូនពរឲ្យគាត់ជួបតែរឿងល្អ ព្រោះគាត់ជាមនុស្សល្អម្នាក់ ហើយសង្ឃឹមថាគាត់អាចឈ្នះគ្រប់យ៉ាងជាមួយកីឡាករអាហ្សង់ទីនដទៃទៀតនៅទីនោះ"។
គួរឲ្យដឹងដែរថា Romero គឺជាកីឡាកររបស់ក្លឹប Atalanta ទេ តែទើបត្រូវបានក្លឹប Spurs ចរចាខ្ចីជើងមួយរដូវកាល មុនរយៈពេល ៤ ថ្ងៃនៃការប្រកាសចែកផ្លូវរបស់តារាឆ្នើមវ័យ ៣៤ ឆ្នាំពីក្លឹប Barcelona៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
