សុំចិត្តចុះ! ចាំពេលដែលអ្នកអាចយល់ច្បាស់ពីខ្ញុំសិន ចាំអ្នកចូលមកជីវិតរបស់ខ្ញុំ
យល់ពីខ្ញុំសិន ចាំស្រឡាញ់ខ្ញុំ ស្គាល់ខ្ញុំឱ្យច្បាស់សិន មុននឹងចូលមកក្នុងជីវិតរបស់ខ្ញុំ ពេលខ្លះខ្ញុំក៏ហត់ ខ្ញុំមិនចង់បកស្រាយអ្វីច្រេីនឡើយ គេចង់គិតបែបណាក៏ស្រេចតែចិត្តចុះ ខ្ញុំមិនអាចទៅតម្រូវតាមចិត្តអ្នកបាន១០០ភាគរយនោះឡើយ បេីសូម្បីខ្ញុំខ្លួនឯងតម្រូវចិត្តខ្លួនឯងមិនបានរហូតផងនោះ។
ស្រឡាញ់តែមិនយល់ពីគ្នា អ្នកចង់ឱ្យខ្ញុំធ្វេីអ្វី ខ្ញុំត្រូវតែបំពេញតាមចិត្តអ្នក ពេលខ្ញុំធ្វេីដូចចិត្តអ្នក អ្នកក៏ញញឹម ពេញចិត្ត យេីងក៏គ្មានរឿងឈ្លោះប្រកែកគ្នា ប៉ុន្តែនៅពេលដែលខ្ញុំមានហេតុផល តម្រូវតាមចិត្តអ្នកមិនបាន អ្នកក៏ខឹង អ្នកក៏ថាធុញនឹងហេតុផលរបស់ខ្ញុំណាស់ សម្រេចទៅអ្នកស្រឡាញ់ខ្ញុំ ឬអ្នកស្រឡាញ់ខ្លួនឯងឱ្យប្រាកដទៅ?
អ្នកផ្សេងមិនយល់ពីខ្ញុំ ខ្ញុំក៏មិនខ្វល់ តែមនុស្សខ្ញុំស្រឡាញ់ក៏មិនយល់ពីខ្ញុំបែបនេះ ឱ្យខ្ញុំរំពឹងអីទៀត តើឱ្យអ្នកណាមកលេីកទឹកចិត្តខ្ញុំពេលខ្ញុំមានបញ្ហា។ និយាយតាមត្រង់ចុះ ខ្ញុំហត់នឹងបញ្ហាផ្ទាល់ខ្លួនហេីយ ត្រូវមកហត់នឹងមនុស្សខ្លួនឯងស្រឡាញ់មិនយល់ចិត្តទៀត ស្នេហាដែលមិនយល់ពីគ្នាគ្មានថ្ងៃទៅមុខរួចឡើយ។
បេីមិនយល់ចិត្តគ្នាហេីយ ប្រាកដជាមានរឿងឱ្យឈ្លោះគ្នាមិនលស់ថ្ងៃទេ ឈ្លោះយូរៗទៅក៏ហត់ចិត្តទាំងសងខាង ដូច្នេះបេីស្រឡាញ់គ្នាត្រូវរៀនយល់ពីគ្នា កុំយល់តែអារម្មណ៍ខ្លួនឯង រៀនស្រឡាញ់គ្នាបែបចាស់ទុំ ទេីបស្នេហាបានគង់រវង្សយូរអង្វែង តើបើយើងចាប់ផ្ដើមឡើងហើយ តែបែរជាមិនយល់ពីគ្នា មិនទាំងស្គាល់គ្នាច្បាស់ផងនោះ វាក៏គ្មានហេតុផលអ្វី ដែលត្រូវបន្តទៀតនោះដែរ ខ្ញុំហត់នឿយជាមួយនឹងទំនាក់ទំនងបែបហ្នឹង រឹតតែមិនចង់មានស្នេហាបែបហ្នឹងនោះឡើយ៕
អត្ថបទ ៖ អេដមីន ហត់/Knongsrok
ព័ត៌មានថ្មីៗ
