ឈានដល់វ័យម្ភៃជាងហើយ អ្នកអាចអត់មានស្នេហា អត់មានសង្សារ តែដាច់ខាត មិនអាចអត់ប៉ុន្មានចំណុចនេះទេ
គ្រប់គ្នាប្រហែលជាគិតថា ឈានដល់ភាពជាយុវវ័យ ធំដឹងក្ដីសមល្មមនឹងមានស្នេហា មានសង្សារហើយ ប៉ុន្តែផ្ទុយទៅវិញ រឿងស្នេហា ឬសង្សារនេះ បែបវាអាចអូសទាញ ទាក់ចិត្តបានតែក្មេងៗ ឬស្ទាវដែលមិនគិតគូរពីជីវិតទៅថ្ងៃមុខ ឬអនាគតដែលវែងឆ្ងាយតែប៉ុណ្ណោះ។ ប៉ុន្តែសម្រាប់យើងដែលឈានចូលអាយុម្ភៃឆ្នាំឡើងហើយនោះ រឿងស្នេហា ឬការដែលមានសង្សារ វាគ្រាន់តែជារឿងបន្ទាប់បន្សំ ព្រោះអ្វីដែលយើងគួរមាន ឬខំសន្សំ គឺរឿងទាំងប៉ុន្មានខាងក្រោមនេះទេ។
១. ការងារល្អ មុខរបរនឹងធឹង
ឈានដល់វ័យម្ភៃឆ្នាំ អាចនិយាយបានថា អ្នកបញ្ចប់ការសិក្សាហើយ ដូច្នេះ វាក៏សមល្មមដល់ពេលដែលអ្នកត្រូវស្វែងរកការងារ ឬគួរមានមុខរបរដែលអាចទទួលបានចំណូលបានខ្លះ អ្នកត្រូវតែអាចរកលុយចាយបានដោយខ្លួនឯង តិច ឬច្រើនវាក៏ប្រសើរជាងលាដៃសុំលុយម៉ាក់ប៉ា។ វ័យប៉ុណ្ណេះ សម័យនេះគេមិនហៅថាក្មេងទៀតទេ អ្នកខ្លះគេអាចរកលុយ មានការងារ មានមុខរបរ មានចំណូលតាំងពីគេនៅសិក្សាម្ល៉េះ ដូច្នេះហើយ កុំបណ្ដែតបណ្តោយឱ្យខ្លួនមមាញឹក ឬរវល់ព្រោះតែរឿងស្នេហា ឬរឿងខូចចិត្តដោយសារតែអ្នកណាទៀតអី។
២. សល់លុយកាក់ ទ្រព្យជាប់ខ្លួនខ្លះ
ដូចដែលថាអ៊ីចឹង បើយើងមានការងារល្អ មានមុខរបរផ្ទាល់ខ្លួនយើងប្រាកដជាមានលុយ គប្បីអាចសល់បានទ្រព្យតូចតាចខ្លះ តួយ៉ាងដូចជារបស់របរប្រើប្រាស់ដែលយើងប្រើខ្លួនឯង គួរតែយើងទិញដោយលុយ ដែលរកបានដោយកម្លាំងញើសឈាមខ្លួនឯង។ ព្រោះថាអ្នកខ្លះ គាត់អាចសល់លុយទិញឡាន ទិញផ្ទះ ដាក់ឈ្មោះខ្លួនឯង និងមានហាងដែលកើតពីកម្លាំងញើសឈាមខ្លួនឯងទៀត នេះហើយដែលគេហៅថា ទ្រព្យផ្ទាល់ខ្លួន។
៣. មានគោលដៅជីវិតច្បាស់លាស់
អ្នកត្រូវតែមានគោលដៅច្បាស់ ដឹងថាខ្លួនត្រូវការអ្វី ចង់បានអ្វីជាពិសេសនោះគឺមហិច្ឆតា អាចកំណត់នូវអ្វីដែលជាគោលដៅពិតប្រាកដ ដែលយើងកំពុងតែព្យាយាមត្រួសត្រាយ និងហែលឆ្លងទៅរក។ រឹតតែសំខាន់គឺ នៅពេលដែលយើងដឹងថា យើងចង់បាន ឬត្រូវការអ្វីនោះ យើងប្រាកដជាដឹងថាយើងគួរធ្វើអ្វី ដើម្បីសម្រេចគោលដៅនោះហើយ។
៤. មានចិត្តនឹងន មានឯករាជ្យ
យុវវ័យត្រូវមានចិត្តនឹងន មានឯករាជ្យ មិនមែនឈាមរាវ គិតតែដើរលេង ប្រព្រឹត្តខ្លួនផ្ដេសផ្ដាសនោះទេ វាសំខាន់ណាស់គឺ ចិត្តគំនិតរបស់យើង ត្រូវមានឯករាជ្យមួយដ៏ត្រឹមត្រូវ មិនមែនឯករាជ្យក្នុងការដើលើផ្លូវខុសនោះឡើយ។ មនុស្សខ្លះ ចង់បានឯករាជ្យ ដើម្បីតែចង់បង្ហាញថា ខ្លួនធំដឹងក្ដី ធ្វើអ្វីៗតាមតែទំនើងចិត្ត នោះគឺខុសហើយ។ មនុស្សឯករាជ្យ គឺដើរលើផ្លូវខ្លួនឯង ជាផ្លូវដែលវិជ្ជមាន មិនមែនចាំតែដើរតាមអ្វីដែលគេបង្គាប់បញ្ជា ឬធ្វើអ្វីដែលខុសគន្លងនោះឡើយ។
៥. មានពេលវេលាប្រឡូកក្នុងសង្គមបានច្រើន
ច្បាស់ណាស់ថា យើងគប្បីស្គាល់សង្គមខាងក្រៅ ជាពិសេសគឺ សាងទំនាក់ទំនងល្អៗជាមួយមនុស្សជុំវិញខ្លួន ដើម្បីសិក្សា ឈ្វេងយល់ពីមនុស្សទាំងអស់។ ការប្រឡូកក្នុងសង្គម យើងនឹងបានដឹងពីអ្វីដែលថ្មីៗ ដើម្បីអភិវឌ្ឍខ្លួនឯងឱ្យកាន់តែមានការរីកចម្រើនបន្ថែមទៀត។
ឈានដល់ពេញវ័យ ធំដឹងក្ដី វ័យចាស់ទុំគ្រប់គ្រាន់ ក៏មិនត្រូវទៅពាក់ព័ន្ធក្នុងរឿងស្នេហាផ្ដេសផ្ដាសនោះឡើយ គួរផ្ដោតលើអនាគត ការធ្វើការ រកស៊ី បង្កើនចំណូល។ ប៉ុន្តែបើអ្នកអាចមានមនុស្សល្អ ឬជាដៃគូជីវិតពិតប្រាកដ អ្នកគួរតែថែរក្សាឱ្យបានល្អផងដែរ តែបើមិនទាន់មានទេ កុំចេះតែសាងទំនាក់ទំណងផ្ដេសផ្ដាសមិនច្បាស់លាស់ ព្រោះវានាំឱ្យខាតពេលវេលា ខាតទាំងអារម្មណ៍ថែមទៀតផង៕
អត្ថបទ ៖ ភី អេក / ក្នុងស្រុករក្សាសិទ្ធ
អំពីអ្នកសរសេររបស់យើង៖
Tel:
ព័ត៌មានថ្មីៗ
