មនុស្សស្រីរឹងមាំ មិនមែនព្រោះតែពូកែទ្រាំនោះទេ តែជាមនុស្សស្រីដែលហ៊ានប្រឈមមុខ ហើយហ៊ានដើរចេញ
នៅក្នុងជីវិតមនុស្សស្រី មិនថាក្នុងរឿងស្នេហា ការងារ ឬទំនាក់ទំនងណាផ្សេងនោះឡើយ មិនសំខាន់ទេថា នាងមានកម្លាំងក្នុងការទ្រាំបានយូរដល់ពេលណានោះទេ តែអ្វីដែលអាចបង្ហាញពីភាពខ្លាំង និងរឹងមាំរបស់នាងនោះគឺ ការដែលនាងហ៊ានប្រឈមុខជាមួយនឹងរឿងគ្រប់យ៉ាង ហើយក៏ហ៊ានដើរចេញ នៅពេលដែលអស់ភាពអំណត់។
ការប្រឈមមុខ គឺជាចំណុចខ្លាំងបំផុត ដែលបង្ហាញពីសមត្ថភាពរបស់នាង មានន័យថា នាងមានគំនិត នាងមានការតាំងចិត្ត ហើយនាងមានកម្លាំងកាយគ្រប់គ្រាន់ ជាពិសេសនោះគឺ នាងមានភាពក្លាហាក្នុងការប្រឈមមុខ ជាមួយនឹងរឿងរ៉ាវ និងបញ្ហាគ្រប់បែបយ៉ាងបានដោយមិនគេចវេស មិនកំសាក មិនខ្លាចរអានោះឡើយ នេះហើយទើបជាភាពខ្លាំងដ៏ពិតប្រាកដ។
ចំណុចទី២គឺ ការហ៊ានសម្រេចចិត្តដើរចេញពីមនុស្ស ឬកន្លែងដែលមិនដែលឱ្យតម្លៃនាង ហ៊ានចាកចេញពីមនុស្សដែលមិនដែលគោរព និងស្រឡាញ់នាង មិនមែនការទ្រាំធ្វើឆ្កែធ្វើឆ្មា ទ្រាំនឹងការប្រមាថមើលងាយធ្វើបាប ទ្រាំនឹងការបំផ្លាញ ទ្រាំនឹងការឈឺចាប ទើបហៅថាមនុស្សស្រីរឹងមាំនោះឡើយ។
មនុស្សស្រីដែលរឹងមាំពិត គឺនាងមានចិត្តដាច់ស្រេច មិនអាឡោះអាល័យ មិនងប់ងល់ជាមួយនឹងមនោសញ្ចេតនាបែបល្ងង់ខ្លៅ នាងហ៊ានចាកចេញ នាងហ៊ានទទួលយកការពិត ហើយបើកចិត្តឱ្យទូលាយ ហ៊ានរស់នៅដោយខ្លួនឯង នេះហើយជាភាពរឹងមាំ និងចំណុចខ្លាំងរបស់នាង។ មិនមែនអាងអីយំ អាងអីសម្ងំឈឺចាប់ ខូចចិត្ត ស៊ូទ្រាំ ហើយគិតថាខ្លួនរឹងមាន មានកម្លាំងគ្រប់គ្រាន់ក្នុងការរ៉ាបរងគ្រប់យ៉ាងនោះឡើយ៕
អត្ថបទ ៖ ភី អេក
ក្នុងស្រុករក្សាសិទ្ធ
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖
Tel:
ព័ត៌មានថ្មីៗ
