ប្រពៃណាស់! អភិបាលស្រុកបន្ទាយស្រី ឃឹម ហ្វីណង់៖ ចាប់ពីពេលនេះតទៅ មេភូមិទាំងអស់នៅក្នុងស្រុកបន្ទាយស្រីយ៉ាងហោចចំណាយ ”មួយថ្ងៃក្នុងមួយខែម្តង” ដឹកនាំពលរដ្ឋ យុវជន និងសិស្ស ដើររើសសំរាម និងធ្វើការងារបរិស្ថានក្នុងភូមិរបស់ខ្លួនរៀងរាល់ខែ

2020-06-22

សៀមរាប៖ នៅមុននេះបន្តិចលោកអភិបាលស្រុកបន្ទាយស្រី ឃឹម ហ្វីណង់ បានបង្ហោះនៅលើទំព័រហ្វេសប៊ុកផ្លូវការរបស់លោកថា មេភូមិនៅស្រុកបន្ទាយស្រីទាំងអស់នឹងចំណាយពេលយ៉ាងហោចណាស់ មួយថ្ងៃក្នុងមួយខែដឹកនាំប្រជាពលរដ្ឋ សិស្សានុសិស្សដើររើសសំរាម និងធ្វើការងារបរិស្ថាននៅក្នុងភូមិរបស់ខ្លួនជារៀងរាល់ខែ។

ក្នុងនោះលោកអភិបាលក៏បានបន្ថែមថា អនាម័យ ភាពស្អាត និងការស្រលាញ់បរិស្ថាន ចាំបាច់ត្រូវកើតចេញពីទម្លាប់ និងការស្ម័គ្រចូលរួមយ៉ាងទូលំលាយពីសំណាក់បងប្អូនប្រជាពលរដ្ឋផ្ទាល់នៅក្នុងមូលដ្ឋាន ហើយទាមទារអោយមានការដឹកនាំ អប់រំ និងជម្រុញលើកទឹកចិត្តជាប្រចាំផងដែរ។

ជាចុងក្រោយលោកអភិបាលក៏បានលើកឡើងថា រដ្ឋបាលស្រុកក៏នឹងរៀបចំអោយមានការប្រលងប្រណាំង និងផ្តល់រង្វាន់លើកទឹកចិត្តជូនដល់“ភូមិស្អាត ភូមិគំរូ” ក្នុងចំណោមភូមិទាំង៣៦ ដើម្បីជម្រុញអោយមានការខិតខំប្រឹងប្រែងរបស់ភូមិនីមួយៗរឹតតែខ្លាំងផងដែរ។

ខាងក្រោមនេះគឺជាសារទាំងស្រុងរបស់លោកអភិបាលស្រុកបន្ទាយស្រី ឃឹម ហ្វីណង់៖

ចាប់ពីពេលនេះតទៅ មេភូមិទាំងអស់នៅក្នុងស្រុកបន្ទាយស្រីនឹងចំណាយពេលយ៉ាងហោចណាស់”មួយថ្ងៃក្នុងមួយខែម្តង” ដឹកនាំប្រជាពលរដ្ឋ ប្រជាការពារ យុវជន និងសិស្សានុសិស្ស ដើររើសសំរាម និងធ្វើការងារបរិស្ថាននៅក្នុងភូមិរបស់ខ្លួនជារៀងរាល់ខែ។

ក្រោយពីទទួលបានការឯកភាពជារួមមួយ នៅក្នុងកិច្ចប្រជុំគណៈបញ្ជាការឯកភាពស្រុកកាលពីព្រឹកមិញនេះ រដ្ឋបាលស្រុកបន្ទាយស្រីនឹងសម្របសម្រួលតាមដានការងារនេះជាប្រចាំ ដើម្បីធានាអោយបាននូវយន្តការអចិន្ត្រៃយ៍ថ្នាក់ភូមិមួយ ដើម្បីដោះស្រាយបញ្ហាបរិស្ថាននៅតាមទីសាធារណៈនៅក្នុងភូមិឃុំ និងប្រែក្លាយបន្ទាយស្រីអោយស័ក្តិសមជាស្រុកទេសចរណ៍មួយ។ សកម្មភាពនេះនឹងបំពេញអោយការផ្តល់សេវាប្រមូលសំរាមនៅក្នុងស្រុក ដែលនឹងចាប់ផ្តើមក្នុងពេលទន្ទឹមគ្នានៅក្នុងខែកក្តដានេះ ហើយក៏ជាផ្នែកមួយនៃយុទ្ធនាការ“២០២០ បន្ទាយស្រីស្អាត"ផងដែរ។
អនាម័យ ភាពស្អាត និងការស្រលាញ់បរិស្ថាន ចាំបាច់ត្រូវកើតចេញពីទម្លាប់ និងការស្ម័គ្រចូលរួមយ៉ាងទូលំលាយពីសំណាក់បងប្អូនប្រជាពលរដ្ឋផ្ទាល់នៅក្នុងមូលដ្ឋាន ហើយទាមទារអោយមានការដឹកនាំ អប់រំ និងជម្រុញលើកទឹកចិត្តជាប្រចាំផងដែរ។ រើសសំរាម ជម្រះស្មៅ ដាំផ្កា ដាំដើមឈើ និងរៀបចំអោយមានសណ្តាប់ធ្នាប់របៀបរៀបរយ! ប្រសិនបើយើងនាំគ្នាធ្វើវាបន្តិចម្តងៗ ហើយធ្វើវាជាប្រចាំ និងធ្វើអោយបានគ្រប់ៗភូមិ ខ្ញុំជឿថាយើងនឹងអាចផ្លាស់ប្តូរឥរិយាបថរបស់បងប្អូនប្រជាពលរដ្ឋនៅតាមមូលដ្ឋាន បណ្តុះផ្នត់គំនិតស្រលាញ់បរិស្ថាន និងកែប្រែមុខមាត់របស់បន្ទាយស្រី អោយរឹតតែមានសោភ័ណភាពបន្ថែមទៀត។

រដ្ឋបាលស្រុកក៏នឹងរៀបចំអោយមានការប្រលងប្រណាំង និងផ្តល់រង្វាន់លើកទឹកចិត្តជូនដល់“ភូមិស្អាត ភូមិគំរូ” ក្នុងចំណោមភូមិទាំង៣៦ ដើម្បីជម្រុញអោយមានការខិតខំប្រឹងប្រែងរបស់ភូមិនីមួយៗរឹតតែខ្លាំងផងដែរ។
#២០២០បន្ទាយស្រីស្អាត