មិនថាប្ដីប្រពន្ធ ឬសង្សារទេ ទោះឈ្លោះគ្នាប៉ុនណា ក៏មិនងាយបែកគ្នាដែរ បើគ្មានអ្នកទី ៣ ចូលមកជ្រៀតជ្រែក
មនុស្សស្រឡាញ់គ្នា មានទំនាក់ទំនងជាមួយគ្នា រស់នៅជាមួយគ្នា រមែងមានការឈ្លោះទាស់ទែង ខ្វែងគំនិត ខឹង អន់ចិត្តនឹងគ្នាខ្លះហើយ វាជារឿងធម្មតានោះទេ។ ប៉ុន្តែ ការឈ្លោះទាស់ទែងគ្នាយ៉ាងណា ក៏មិនងាយនឹងបែកបាក់ ឬនិយាយពាក្យថាបែកចែកផ្លូវគ្នានោះដែរ យ៉ាងច្រើន អត់និយាយគ្នាមួយថ្ងៃពីរថ្ងៃក៏ត្រឡប់មកត្រូវរ៉ូវគ្នាវិញហើយ លើកលែងតែក្នុងទំនាក់ទំនងនោះ មានអ្នកទី២ ទី៣ ចូលមកជ្រៀតជ្រែក ឱ្យយោបល់អ៊ីចេះ ឱ្យយោបល់អីចុះ ទោះរឿងបន្តិចបន្តួចសោះក៏អាចឱ្យបែកបាក់ប្រេះឆាបានដែរ។
មនុស្សយើងពេលខ្លះ បើទោះជាជឿជាក់ ឬស្រឡាញ់គ្នាខ្លាំងយ៉ាងណាក៏ដោយ តែបើមានអ្នកមកចាក់ចេកចាក់ស្ករ ឬក៏ចាំលួងលោមយកចិត្តហើយនោះ ប្រាកដជាចិត្តទន់ ភ្លេច ឬអាចកាន់តែខឹង និងស្អប់ដៃគូរបស់ខ្លួនបានយ៉ាងងាយ ព្រោះគិតថា អ្នកដែលចូលមកនេះ គេល្អជាដៃគូរបស់ខ្លួន គេចេះលួងលោម គេចេះយកចិត្ត តែភ្លេចគិតថា តាមពិត គេកំពុងតែមានចេតនា បំបែកបំបាក់ស្នេហា ឬគ្រួសាររបស់ខ្លួនទៅវិញទេ ភ្លេចថា គេកំពុងតែមកដុតបញ្ឆេះ ឱ្យទំនាក់ទំនងនេះ កាន់តែរកាំរកូសជាងមុន។
អ៊ីចឹងបានចាស់ៗតែងផ្ដាំថា រឿងក្នុងគ្រួសារ កុំចេះតែយកទៅប្រាប់អ្នកក្រៅអី ព្រោះមនុស្សយើង បើកាលណាចេញក្រៅ និយាយចុះនិយាយឡើង វានឹងកាន់តែវែងឆ្ងាយ កំហឹងក្លាយជាកំហុស កំហុសនាំឱ្យមានទោសៈ បង្កឱ្យបែកបាក់ទំនាក់ទំនង ព្រោះតែពាក្យគេ មាត់ចាបមាត់ព្រាប ជាពិសេសនោះគឺ អ្នកទី៣ ដែលចាំតែឆ្លៀតឱកាសធ្វើតួជំនួស ដណ្ដើមយកមនុស្សរបស់យើងទៅ៕
អត្ថបទ ៖ ភី អេក
ក្នុងស្រុករក្សាសិទ្ធ
ព័ត៌មានថ្មីៗ
