មេរៀនខ្លះៗអំពីជីវិតប្ដីប្រពន្ធ ជូនចំពោះស្វាមីភរិយាទាំងឡាយ គួរតែអាន ហើយគិតពិចារណាទាំងអស់គ្នា!
ជីវិតប្ដីប្រពន្ធ គ្រាន់តែនិយាយវាជាពាក្យដែលស្រួលនិយាយ ស្រួលស្ដាប់ ស្រួលសរសេរណាស់ តែការប្រើប្រាស់ជីវិតជាប្ដីប្រពន្ធ វាមិនងាយស្រួលដួចដែលយើងគិតនោះឡើយ។ គ្រប់ជីវិតគូទាំងអស់ គឺសុទ្ធសឹងតែត្រូវឆ្លងកាត់បញ្ហា រឿងរ៉ាវគ្រប់សព្វបែបយ៉ាង គ្មាននរណាអាចចៀសផុតបានឡើយ។ ខាងក្រោមនេះ ជាមេរៀនជីវិតខ្លះៗ ដែលប្ដីប្រពន្ធទាំងឡាយគួរតែចំណាយពេលវេលាអានឱ្យបានចប់ ខុសត្រូវអី គួរតែអាន ហើយគិតពិចារណាទាំងអស់គ្នា ៖
១. ទោះបីអ្នកដទៃស្រឡាញ់រាប់អានអ្នកប៉ុនណា ក៏មិនប្រាកដថា គេអាចស្រឡាញ់ លះបង់ដើម្បីអ្នក ដូចប្ដីប្រពន្ធអ្នកនោះឡើយ។
២. ប្រពន្ធគឺប្រពន្ធ មិនសំខាន់ទេថាអ្នកជាអ្នកណា យសសក្តិប៉ុនណា សំខាន់អ្នកគឺជាប្ដី ជាមេគ្រួសារ អ្នកត្រូវថែរក្សា មើលការខុសត្រូវ នឹងផ្ដល់សុភមង្គលដល់គ្រួសារមួយនេះ។
៣. កុំយកប្ដីប្រពន្ធយើង ទៅប្រៀបជាមួយអ្នកនេះ ឬអ្នកនោះ ព្រោះមនុស្សមិនដូចគ្នាទេ គេល្អបែបគេ ប្ដីប្រពន្ធយើងល្អបែបប្ដីប្រពន្ធយើង។
៤. ប្ដីពូកែរកស៊ី ប្រពន្ធពូកែរកសុខ ប្ដីប្រពន្ធចេះជួយគ្នារៀបចំដាក់ទុក តទៅថ្ងៃមុខប្រាកដជារីកចម្រើន។
៥. ការសាងគ្រួសារមួយមិនពិបាកទេ សំខាន់ឱ្យតែអ្នកចេះជឿជាក់គ្នា មានពេលវេលាឱ្យគ្នា ចេះគោរពគ្នា និងស្មោះត្រង់ លះបង់ចំពោះគ្នា។
៦. ភរិយាគ្រប់រូប តែងចង់បានការយកចិត្តទុកដាក់ពីស្វាមី ចំណែកឯប្ដី តែងចង់បានការគោរព និងភក្ដីពីប្រពន្ធ។
៧. ខុសត្រូវ ក៏នៅតែជាប្ដីប្រពន្ធ សំខាន់ចេះអត់ឱន និងចេះកែប្រែគ្នាទៅវិញទៅមក។
៨. ជីវិតប្ដីប្រពន្ធ ពេលមានបញ្ហាកុំអាងតែឈ្លោះទាស់ទែង ការខ្វែងគំនិតគ្នាមិនមែនជាបញ្ហាទេ តែបញ្ហានៅត្រង់ថា យើងមិនព្រមស្ដាប់ មិនព្រមសម្របតាមគ្នា។
៩. ប្ដីប្រពន្ធមួយថ្ងៃ ប្ដីប្រពន្ធមួយជីវិត រួមគំនិត រួមការគិត រួមចិត្តតែមួយ ជួយគ្នា មើលថែគ្នា ទើបជីវិតអាពាហ៍ពិពាហ៍ មានក្ដីសុខ និងសុភមង្គល។
១០. ជាប្ដីប្រពន្ធ ចង់ចាញ់ឈ្នះគ្នាទៅណា គ្រួសារតែមួយ ក្រោមដំបូលផ្ទះតែមួយ ចាញ់ឈ្នះហើយក៏មិនបានចំណេញលុយអីដែរ។
១១. ខ្ជិលទាំង៣ ដែលនាំឱ្យជីវិតប្រពន្ធប្ដី មានក្ដីសុខ សុភមង្គល គឺ ខ្ជិលឈ្លោះប្រកែក ខ្ជិលប្រកែប្រកាន់ ខ្ជិលប្រចណ្ឌហួសហេតុ។
១២. ប្ដីប្រពន្ធយើង ខិតខំ ប្រឹងប្រែង ជ្រោមជ្រែងក្នុងគ្រួសារយើង កុំខ្វល់ពីសម្ដីរបស់អ្នកដទៃច្រើនពេក ពេលខ្លះពាក្យគេ បានត្រឹមតែធ្វើឱ្យយើងមានបញ្ហាក្នុងគ្រួសារប៉ុណ្ណេាះ។
១៣. ក្នុងនាមជាស្វាមី អ្នកត្រូវប្រព្រឹត្តខ្លួនចំពោះភរិយា ឱ្យដូចដែលអ្នកមាន ម្ដាយជាស្រី មានបង មានប្អូន មានកូនជាស្រី ទើបគប្បី និងថ្លៃថ្នូរ។
១៤. ស្វាមីទាំងឡាយ កុំសប្បាយ ឬរវល់តែជាមួយការងារ រហូតធ្វើឱ្យកូន និងភរិយា មានអារម្មណ៍ថា ឯកា។
១៥. ទូកពឹងច្រវា ស្វាមីអស្ចារ្យពឹងភរិយា គ្រួសារសុខសាន្តធូរធារ ព្រោះមានភរិយា ចេះចាត់ចែង រៀបចំទុកដាក់ គ្រួសារផុតទុក្ខលំបាក ព្រោះអ្នកទាំងពីរនាក់ ចេះសាមគ្គីគ្នា។
១៦. ប្រពន្ធស្ងៀមស្ងាត់ ទើបប្ដីចេះខ្លាចរអា តែបើប្រពន្ធគិតតែពីរករឿង ស្រែកឡូឡា មនុស្សប្រុសណាក៏គេធុញ គេសាវាដែរ។
១៧. បានជួបមនុស្សល្អៗ នោះជាភ័ព្វសំណាងរបស់អ្នក តែបានជួបដៃគូជីវិតល្អ នោះជាកុសលបុណ្យ ព្រេងសំណាងពីជាតិមុន។
១៨. មិនមែននៅសុខៗក៏បានជួបគ្នា ក្លាយជាប្ដីប្រពន្ធនឹងគ្នាឡើយ ទាល់តែមាននិស្ស័យ មានបុណ្យរួមគ្នា ទើបមនុស្សពីរនាក់អាចមកជួបគ្នាបាន។
១៩. ជីវិតប្ដីប្រពន្ធ គឺជាប់ចំណង៥ប្រការ មិនមែនដូចសង្សារ ចង់បែកក៏បែក រករឿងឈ្លោះគ្មានហេតុផលនោះឡើយ ក្លាយជាប្ដីប្រពន្ធនឹងគ្នាហើយ គឺត្រូវទ្រាំ អត់ធ្មត់ សង្កត់ចិត្តចេះគិតពីគ្នា។
២០. ចិត្តប្រពន្ធទាំងឡាយ មិនដែលចង់បានអ្វីពីប្ដីលើសលប់នោះឡើយ នាំសុំត្រឹមតែអ្នកឱ្យតម្លៃនាង និងចងចាំថ្ងៃពិសេសៗក្នុងជីវិត
នាង និងហ៊ានលហបង់ដើម្បីគ្រួសារ។
២១. ស្វាមី ត្រូវស្រឡាញ់ប្រពន្ធ្ឱ្យច្រើនៗ មានតែប្រពន្ធយើងទេ ដែលនៅក្បែរ មើលថែយើងរហូតដល់ចាស់រៀងខ្លួន។
២២. ទម្លាប់មនុស្សស្រី តែងតែរអ៊ូរទាំដាក់ប្ដីមិនឈប់តែមិនថាថ្ងៃ ឬយប់ នាងមិនដែលឈប់បារម្ភពីប្ដីឡើយ។
២៣. ជីវិតប្ដីប្រពន្ធ ក្រលំបាក អត់ធ្មត់តស៊ូជាមួយគ្នា ពេលមានបានធូរធារ កុំភ្លើតភ្លើនជ្រើមជ្រួលប៉បង់គ្នាឱ្យសោះ។
២៤. មិនថាប្ដី ឬប្រពន្ធ កុំយកបញ្ហាខាងក្រៅ ចូលមកក្នុងផ្ទះ កុំចេះតែជះកំហឹងដាក់មនុស្សក្នុងផ្ទះ តែរឿងខាងក្រៅ អាចយកមកពិភាក្សាជាមួយប្ដីយើង ប្រពន្ធយើងបាន។
២៥. ភ្លើងក្រៅកុំយកចូលក្នុងផ្ទះ បញ្ហានៅក្នុងផ្ទះកុំចេះតែយកប្រាប់អ្នកក្រៅ ប្ដីប្រពន្ធនៅជាមួយគ្នា ត្រូវចេះពិភាក្សាគ្នាថាគួរធ្វើបែបណា មិនមែនអាងអីប្រាប់គេ ខឹងអីបញ្ចេញផុសក្នុងហ្វេសប៊ុគឡើយ។
២៦. មតិយោបល់អ្នកក្រៅផ្ទះ ១០០ម៉ាត់ ក៏មិនស្មើនឹងយើងចេះបើកចិត្តស្ដាប់ហេតុផល ប្ដីយើង ប្រពន្ធយើងនោះដែរ។
២៧. អ្នកខាងក្រៅគេបានតែនិយាយ តែអ្វីដែលសំខាន់ គឺប្ដីប្រពន្ធយើងជាអ្នកសម្រេច បញ្ហាច្រើន ឬតិច មិនត្រូវគេចវេះយករួចខ្លួនទេ។
២៨. ជីវិតប្ដីប្រពន្ធ អាចមិនផ្អែមល្អែមគ្រប់ពេលទេ តែជាជីវិតដៃគូ ដែលតែងតែនឹកនា ខ្វល់បាម្ភពីគ្នាគ្រប់វេលា នេះហើយជាជីវិតដែលកក់ក្ដៅ។
២៩. សំខាន់ប្ដីប្រពន្ធយើងបានសុខ កុំខ្វល់ពាក្យចាក់រុកពីអ្នកណា។
៣០. ប្ដីក៏ខំ ប្រពន្ធក៏ប្រឹង ឱ្យតែចេះជួយគ្នាបែបហ្នឹង ជីវិតគូមួយនេះមិនលំបាកវេទនាឡើយ។
៣១. មិនថារៀបការនៅអាយុណា មិនថានៅលីវ ឬមានគូទេ គឺដូចតែគ្នា សុខ និងទុក្ខលាយឡំគ្នា តែសំខាន់គឺ ការចេះប្រើជីវិតរបស់យើង។
៣២. មនុស្សចាំនិន្ទាមានច្រើនណាស់ មនុស្សឆ្លៀតឱកាសក៏មិនខ្វះដែរ មនុស្សពូកែតែមើលបំណាំ ចាំសើចចំអកគ្រួសារយើងក៏ច្រើន តែសំខាន់ យើងកុំខ្វល់ យើងត្រូវចេះខិតខំប្រឹងប្រែងដើម្បីគ្រួសារយើង៕
អត្ថបទ ៖ ភី អេក
ក្នុងស្រុករក្សាសិទ្ធិ
ព័ត៌មានថ្មីៗ
