ផ្តាំប្រាប់តៗគ្នាផង! មានម្ដាយឪពុកអាយុចន្លោះប៉ុណ្ណេះ មិនចាំបាច់កុំឲ្យគាត់ចេញក្រៅឲ្យសោះ
គិតមកទល់ថ្ងៃទី ៩ មិនា ឆ្នាំ ២០២០ អ្នកបាត់បង់ជីវិតដោយសារវីរុសផ្លូវដង្ហើមថ្មី COVID-19 បានកើនឡើងដល់ ៣ ៨៩២ នាក់ហើយ ទន្ទឹមដែលអ្នកឆ្លងសរុបមានចំនួន ១១១ ៣៦៣ ករណី។
សារប្រុងប្រយ័ត្នត្រូវបានបន្លឺឡើងជាបន្តបន្ទាប់ ដែលដាស់តឿនជារឿយៗឲ្យពលរដ្ឋទូទាំងបណ្តាប្រទេសដែលកំពុងមានករណីឆ្លងចាំបាច់ត្រូវបង្កើនការប្រុងប្រយ័ត្ន និងថែរក្សាអនាម័យឲ្យបានដិតដល់ មិនថាតែការពាក់ម៉ាស ការទម្លាប់លាងដៃដោយសាប៊ូឬអាកុល។
យ៉ាងណាមិញតើអ្នកដឹងទេ បើតាមរបាយការណ៍ជាក់ស្ដែងអត្រានៃការស្លាប់អាចកើតឡើងខ្ពស់បំផុតសម្រាប់មនុស្សដែលមានប្រព័ន្ធភាពផ្សាំខ្សោយ ហើយនោះគឺជាមនុស្សវ័យចំណាស់ដែលមានអាយុខ្ទង់ ៧០ ឆ្នាំឡើងទៅ។
បច្ចុប្បន្នតួលេខជារួមអត្រានៃការស្លាប់គឺមាន ២,៣ ភាគរយ ពោលគឺអាចនិយាយថាមិនមែនសុទ្ធតែអ្នកឆ្លងត្រូវប្រឈមខ្ពស់នឹងការបាត់បង់ជីវិតនោះទេ ដរាបណាបានទទួលការព្យាបាលទាន់ពេលវេលាហើយមានប្រព័ន្ធភាពផ្សាំក្នុងខ្លួនរឹងមាំ គឺភាគរយច្រើននឹងអាចជាសះស្បើយ។
ផ្ទុយទៅវិញអ្នកដែលត្រូវប្រយ័ត្នខ្ពស់បំផុតគឺមនុស្សចំណាស់ដែលមានអាយុចន្លោះពី ៧០-៧៩ ឆ្នាំ មានអត្រាភាគរយអាចបាត់បង់ជីវិតដោយសារ COVID-19 ដល់ទៅ ៨ ភាគរយ ទន្ទឹមដែលមនុស្សមានអាយុលើស ៨០ ឆ្នាំ អាចមានអត្រាខ្ពស់ដល់ ១៤,៨ ភាគរយឯណោះ។
សារនេះហើយក៏ចង់ដាស់តឿនដល់អ្នករាល់គ្នាដែលមានឪពុកម្តាយមានវ័យចាស់ជរា ក្នុងអំឡុងពេលផ្ទុះនូវវីរុស COVID-19 សូមចាំបាច់មើលថែលោកទាំងពីរឲ្យបានដិតដល់ ហើយលើកទឹកចិត្តឲ្យលោកគួរនៅផ្ទះឲ្យបានច្រើននិងបន្តសម្អាតអនាម័យជាប្រចាំ។
គួររំឭកថាមកទល់ពេលបច្ចុប្បន្នការបាត់បង់ជីវិតជិត ៤ ០០០ នាក់ទូទាំងសកលលោក គឺមិនទាន់មានរបាយការណ៍នៃការស្លាប់កុមារអាយុក្រោម ៩ ឆ្នាំណាមួយនៅឡើយ ត្បិតបើការឆ្លងធ្លាប់កើតឡើងពិតមែននោះ ពោលមិនរាប់ជាក្តីព្រួយបារម្ភខ្លាំងដូចមនុស្សវ័យចំណាស់ទេ៕
ប្រែសម្រួល៖ Knongsrok | ប្រភព៖ Marketwatch
ព័ត៌មានថ្មីៗ
