សុំបញ្ឈប់ការចលាចល មិនមែនតែកម្ពុជាទេ រោងចក្រធំៗក្រៅដីចិនខ្លះក៏បិទទ្វារដែរ ដោយសារហេតុផលនេះ
នាថ្ងៃទី ០៩ ខែកុម្ភៈ ឆ្នាំ ២០២០ អ្នកនាំពាក្យក្រសួងការងារលោក ហេង សួរ បានបង្ហើបថានៅក្នុងខែមិនាខាងមុខ អាចនឹងមានរោងចក្រកាត់ដេរមួយចំនួននៅកម្ពុជា ត្រូវព្យួរការងារកម្មករដោយសារខ្វះក្រណាត់ ក្រោយលែងមានការបញ្ជូនក្រណាត់ដែលជាវត្ថុធាតុដើមចេញពីប្រទេសចិន។ នេះបើតាមការចុះផ្សាយដោយគេហទំព័រក្នុងស្រុកមួយ។
ឆ្លើយតបនឹងរឿងរ៉ាវនេះក៏បានធ្វើឲ្យអ្នកប្រើប្រាស់បណ្តាញសង្គមខ្លះបានបង្ហាញការព្រួយបារម្ភ ថាអាចកើតឡើងដោយសារបញ្ហាផ្សេង ប៉ុន្តែបើយើងក្រឡេកទៅមើលបញ្ហារួមរបស់សកលលោក គឺមិនមែនតែកម្ពុជានោះទេ ដោយឡែកសូម្បីតែរោងចក្រផលិតយានយន្តនិងរោងចក្របច្ចេកវិទ្យាមួយចំនួនធំខ្លះក៏បានផ្អាកដំណើរការចង្វាក់ផលិតកម្ម និងខ្លះប្រឈមនឹងការបិទទ្វារជាបណ្តោះអាសន្នផងដែរ។
តាមការចុះផ្សាយរបស់សារព័ត៌មាន BBC និង TheVerge បានឲ្យដឹងថាផលិតកម្មយានយន្តនិងវិស័យបច្ចេកវិទ្យា គឺរងផលប៉ះពាល់ដោយសារការផ្ទុះនូវវីរុសកូរ៉ូណានេះខ្លាំងបំផុត។
សម្រាប់វិស័យបច្ចេកវិទ្យារោងចក្រ Foxconn ដែលជាដៃគូផ្គត់ផ្គង់គ្រឿងបន្លាស់និងរៀបចំដំឡើង iPhone ឲ្យ Apple ក្នុងប្រទេសចិនមកទល់ពេលនេះមិនទាន់បានបើកដំណើរការនៅឡើយ បើត្បិតពិធីបុណ្យចូលឆ្នាំចិនបានកន្លងហួសទៅយូរមកហើយក្តី។ ហេតុផលនេះបានធ្វើឲ្យចង្វាក់ផលិតកម្ម iPhone សេរ៊ីក្រោយ ដែលជឿថា iPhone 9 និងផលិតកម្ម iPhone សេរ៊ីទំនើបកំពុងមានលក់លើទីផ្សារមានភាពយឺតយ៉ាវ ញាំងឲ្យនាំផលខាតបង់មិនចេះតិចលានដល់ក្រុមហ៊ុនយក្សអាមេរិក។
ការិយាល័យនៅប្រទេសជាប់ចិនដីគោករបស់ក្រុមហ៊ុន Google មាននៅហុងកុងនិងតៃវ៉ាន់ មកទល់បច្ចុប្បន្នក៏នៅបិទទ្វារ មិនទាន់ចាប់ដំណើរការជាថ្មីដូចគ្នា ស្របពេលដែលក្រុមហ៊ុន Tesla បានចេញសារប្រាប់អតិថិជនទុកជាមុន ថាការដឹកជញ្ជូនចេញរថយន្ត Model 3 ក៏នឹងត្រូវបានពន្យារពេល។
កាលពីសប្តាហ៍មុនក្រុមហ៊ុន Hyundai របស់ប្រទេសកូរ៉េខាងត្បូង គឺជាក្រុមហ៊ុនផលិតយានយន្តដ៏ធំបំផុតមួយក្នុងលោក និងក្រៅប្រទេសចិន ដែលបានផ្អាកដំណើរចង្វាក់ផលិតកម្ម ព្រោះខ្វះខាតគ្រឿងបង្គំដែលដឹកចេញពីប្រទេសចិន។
ដោយឡែកក្រុមហ៊ុន Suzuki ឯណោះវិញ ក៏កំពុងដុតដៃដុតជើងស្វែងរកក្រុមហ៊ុនផ្គត់ផ្គង់ផ្សេងទៀតក្រៅពីប្រទេសចិន ដែលឆ្លើយតបទៅនឹងការព្រួយបារម្ភខ្លាចប៉ះពាល់ដល់តម្រូវការទីផ្សារធំក្នុងប្រទេសឥណ្ឌា៕
ព័ត៌មានថ្មីៗ
