សម្ដេចតេជោផ្ញើសារអបអរជ័យជម្នះ៥-០របស់U22កម្ពុជាលើU22ទីម័រខាងកើត
ពិតជាមិនគួរឲ្យជឿដែលក្រុមជម្រើសជាតិកម្ពុជា U22 បានយកឈ្នះក្នុងការប្រកួតទី២ លើក្រុមជម្រើសជាតិទីម័រខាងកើត ដោយលទ្ធផល ៥ទល់០ ក្នុងវិញ្ញាសារបាល់ទាត់បុរស ពូល A នៃព្រឹត្តិការណ៍ SEA Games លើកទី៣០ ប្រទេសហ្វីលីពីនខណៈការប្រកួតទើបចប់នាមុននេះបន្តិច។
ក្រុមជម្រើសជាតិកម្ពុជា U22 រកគ្រាប់បាល់ដោយកីឡាករ រុឹង ប៊ុនហៀង ២គ្រាប់ ខណៈ កែវ សុខផេង, ស៊ិន កក្កដា និង សៀង ចន្ធា រកបានម្នាក់១គ្រាប់បង្គ្រប់លទ្ធផល៥ទល់០ឈរកំពូលតារាងពូល A បណ្ដោះអាសន្ន។
ក្រោយបញ្ចប់ការប្រកួត ប្រមុខរាជរដ្ឋាភិបាលនៃព្រះរាជាណាចក្រកម្ពុជា សម្តេចអគ្គមហាសេនាបតីតេជោ ហ៊ុន សែន បានបង្ហោះសារចូលរួមអបអរ និងជូនពរដល់ក្រុមគោព្រៃវ័យ២២ឆ្នាំកម្ពុជា តាមរយៈគេហទំព័របណ្តាញសង្គម Facebook ផ្លូវការរបស់លោកដោយមានខ្លឹមសារដើមទាំងស្រុងដូចខាងក្រោមនេះ៖
សូមកោតសរសើរដល់ក្រុមបាល់ទាត់ក្រុមជម្រើសជាតិយុវជនអាយុក្រោម ២២ឆ្នាំកម្ពុជា បានទទួលជ័យជម្នះលើកដំបូង ក្នុងចំណោម ២ប្រកួតនៅស៊ីហ្គេម(SEA GAMES) លើកទី៣០ នាប្រទេសហ្វីលីពីនហើយ បន្ទាប់ពីបានយកឈ្នះក្រុមជម្រើសជាតិ U22 ទីម័រខាងកើត ដោយលទ្ធផល ៥-០ មុននេះបន្ដិចនៅកីឡដ្ឋាន Rizal Memorial នាទីក្រុងម៉ានីល ប្រទេសហ្វីលីពីនដើម្បីឡើងឈរកំពូលតារាងពូល A បណ្ដោះអាសន្ន។
អរគុណបងប្អូនប្រជាពលរដ្ឋ និងកូនក្មួយយុវជន ដែលគាំទ្រវិស័យកីឡា ជាពិសេសក្មួយៗដែលបានចូលរួមទស្សនានៅតាមទូរទស្សន៍។
សូមជូនពរកីឡាបាល់ទាត់កម្ពុជា ទទួលបានជោគជ័យជាបន្តបន្ទាប់ទៀត៕
ព័ត៌មានថ្មីៗ
