សារមន្ទីរភូមិអាស៊ី ខេត្តកំពង់ធំ កំពុងដាក់តាំងបង្ហាញឧបករណ៍ប្រើប្រាស់ជាតិពន្ធុវិទ្យា ក្នុងការរួមចំណែកថែរក្សា និងអភិរក្សវប្បធម៌ប្រពៃណីខ្មែរ
ដើម្បីរួមចំណែកការពារ អភិរក្ស សម្បត្តិវប្បធម៌ប្រពៃណីខ្មែរ ប្រជាជនខ្មែរមួយចំនួនធំតែងតែចូលរួមរួមចំណែក នៅក្នុងការថែរក្សាមរតកជាតិ ដែលបានបន្សល់តាំងពីជំនាន់មុន មករក្សាទុក ឬបង្កើតជាទីកន្លែងសារមន្ទីរមួយសម្រាប់ខេត្ត និងតំបន់រៀងៗខ្លួនទាំងជនជាតិខ្មែរ និងជនជាតិភាគតិច។
នៅក្នុងនោះដែរ សម្រាប់ខេត្តកំពង់ធំ ក៏មានរៀបចំ សារមន្ទីរ ដើម្បីតាំងបង្ហាញឧបករណ៍ប្រើប្រាស់ជាតិពន្ធុវិទ្យាផងដែរ ដើម្បីឱ្យកូនខ្មែរជំនាន់ក្រោយបានសិក្សាយល់ដឹងបន្ថែមទៀត ដោយក្នុងនោះ ជាតិពន្ធុ គឺសំដៅដល់អត្តសញ្ញាណរបស់ក្រុមមនុស្សដែលមានទំនាក់ទំនងនឹងគ្នាដោយការបូកបញ្ចូលគ្នានៃវប្បធម៌សាសនាភាសាប្រវត្តិសាស្រ្ត និងទីតាំងភូមិសាស្រ្តដោយឡែកៗ។
តាមរយៈគណនីហ្វេសប៊ុក Chhim Chhouden បានសរសេររៀបរាប់ថា៖ « រីករាយដែលបានក្លាយជាចំណែកមួយនៃការចូលរួមថែរក្សា និងអភិរក្សវប្បធម៌ ប្រពៃណីខ្មែរ។ យើងអាចចូលរួមថែរក្សាទាំងអស់គ្នា ដោយប្រាជ្ញា ស្មារតី កំលាំងចិត្ត កំលាំងកាយ ការលើកទឹកចិត្ត ការចូលរួមតាមវិធីផ្សេងៗដែលយើងអាចធ្វើទៅបាន។ នេះជាសារមន្ទីរភូមិអាស៊ី ដែលកំពុងដាក់តាំងបង្ហាញឧបករណ៍ប្រើប្រាស់ជាតិពន្ធុវិទ្យា។ នេះជាការរួមចំណែកដោយប្រើប្រាស់ជំនាញវិជ្ជាជីវៈដែលខ្ញុំមានខាងប្លង់ បូករួមការតុបតែងលម្អ សម្រាប់ការងារអភិរក្ស។ អរគុណដល់ចាស់ព្រឹទ្ធាចារ្យ លោកគ្រូអ្នកគ្រូ សិស្សានុសិស្ស ប្រជាពលរដ្ឋទាំងទីក្រុង និងជនបទដែលជួយជ្រុំជ្រែងឲ្យសារមន្ទីរនេះកកើតឡើង។ ចូលទស្សនាដោយសេរី ទីតាំងក្នុងខេត្តកំពង់ធំ ក្រោយសារមន្ទីរខេត្តប្រហែល ៥០០ម៉ែត្រ »៕
ព័ត៌មានថ្មីៗ
