ឃើញរូបក៏ស្រស់ស្រាយដែរ! ខានទៅលេងគិរីរម្យយូរ ដឹងអត់ថាឧទ្យានជាតិមួយនេះប្រែរូបរាងយ៉ាងណាហើយ?
ឧទ្យានជាតិព្រះសុរាម្រិតកុសុមៈគីរីរម្យ ដែលគ្រប់គ្នាស្គាល់ថាជា ឧទ្យានជាតិគិរីរម្យ (Kirirom National Park) ជាឧទ្យានជាតិ ដែលស្ថិតនៅចំងាយ ១១២គមពីរាជធានីភ្នំពេញ តាមបណ្តោយផ្លូវជាតិលេខ៤ ស្ថិតនៅក្នុងភូមិដំរីផុត ឃុំគិរីរម្យ ស្រុកភ្នំស្រួច ខេត្តកំពង់ស្ពឺ ។
ឧទ្យានជាតិគិរីរម្យ គឺជារមណីយដ្ឋានធម្មជាតិមួយដ៏ល្បី ក្នុងចំណោមរមណីយដ្ឋានឧទ្យានជាតិធំៗដទៃទៀតនៅក្នុងប្រទេសកម្ពុជា ដែលមានកេរ្ដិ៍ឈ្មោះល្បីល្បាញខ្លាំងតាំងពីកាលក្នុងសម័យសង្គមរាស្ត្រនិយមមកម្ល៉េះ។
រមណីយដ្ឋានឧទ្យានជាតិនេះ សំបូរទៅដោយទេសភាពល្អប្រណិតលំអដោយដើមស្រល់ដុះពីធម្មជាតិនៅលើ ខ្ពង់រាបគិរីរម្យ ជ្រោះទឹកធ្លាក់ជាច្រើន ជម្រកសត្វស្លាប និងសត្វម្រឹគីម្រឹគាជាច្រើនរស់នៅ។
នៅរៀងរាល់ចុងសប្ដាហ៍មានភ្ញៀវទេសចរណ៍ពីក្រុងភ្នំពេញជាច្រើនតែង នាំគ្នាទៅសម្រាកលំហែរកាយកម្សាន្តលេងជាមួយនឹងសម្រស់ធម្មជាតិ ដ៏ស្រស់ត្រកាលនៅទីនោះផង ហើយក៏ជាកន្លែងទទួលទានអាហារដ៏ឈ្ងុយឆ្ងាញ់ផងដែរ។
អាហារក្នុងស្រុកជាច្រើនប្រភេទត្រូវបានអ្នកស្រុកលក់សម្រាប់ ភ្ញៀវជាតិ និងសម្រាប់ជនបរទេសផងដែរ ក៏មានធ្វើលក់ថ្មីនៅតាមក្យុសនាដងស្ទឹងនឹងអូរនៅទីនោះ ដែលមានតម្លៃសមរម្យអាចទទួលយកបាន។
បច្ចុប្បន្នតំបន់ឧទ្យានជាតិគិរីរម្យ មានតំបន់ទេសចរណ៍សំខាន់ៗ សម្រាប់ភ្ញៀវជាតិ និងអន្តរជាតិចូលទស្សនា និងលេងកម្សាន្តសប្បាយជាច្រើន ក្នុងនោះមានរមណីយដ្ឋានទឹកជ្រោះភ្នំ ដំណាក់ចាស់ ដំណាក់ថ្មី តំបន់ស្រះស្រង់ តំបន់ទឹកធ្លាក់ ជ្រោះអូរតាហ៊ុយ តំបន់ចំការតែ ភ្នំថ្មដា តំបន់ល្អាងភ្នំ រមណីយដ្ឋានទឹកធ្លាក់អូរច្រាក ឬហៅថា ទឹកធ្លាក់ចំបក់ ដែលតាំងនៅផ្នែកខាងជើងនៃតំបន់ឧទ្យានជាតិគិរីរម្យ ស្ថិតនៅក្នុងភូមិសាស្ត្រឃុំចំបក់ ស្រុកភ្នំស្រួច ខេត្តកំពង់ស្ពឺ ជាពិសេសនៅគិរីរម្យក៏ចាប់ផ្តើមមានរីហ្សតសសម្រាប់សម្រាកលំហែកាយ និងបោះតង់យ៉ាងច្រើនដើម្បីបម្រើអារម្មណ៍ និងសេចក្តីត្រូវការសម្រាប់មនុស្សសម័យថ្មីនេះផងដែរ។
ដូច្នេះចង់ដឹងថាតើឧទ្យានគិរីរម្យកែប្រែមុខមាត់បែបណាហើយ សូមទស្សនារូបភាពខាងក្រោមទាំងអស់គ្នា ៖
ព័ត៌មានថ្មីៗ
