ប្រលោមលោក «សែងសុរិយា» ចំណងដៃថ្មីពីកវីនិពន្ធទន្សាយ អ្នកគ្រូម៉ៅ សំណាង ត្រៀមចេញលក់ឆាប់ៗហើយ!
ភ្នំពេញ៖ សែងសុរិយា ចំណងជើងរឿងថ្មីដែលនឹងត្រូវចេញផ្សាយឆាប់ៗនេះ របស់កវីនិពន្ធអ្នកគ្រូ ម៉ៅ សំណាង ដែលមានឈ្មោះហៅក្រៅថា «ទន្សាយ»។ ស្នាដៃថ្មីសម្រាប់ឆ្នាំ ២០១៩នេះ ត្រូវបានអ្នកគ្រូបញ្ជាក់ថា ទើបតែបានសរសេរបញ្ចប់ប្រមាណជាងពីរសប្ដាហ៍មុននេះតែប៉ុណ្ណោះ តែទាំងរូបភាព និងចំណងជើងពិតជាគួរឱ្យទាក់ទាញ មែនទែន ។
សម្រាប់ប្រិយមិត្តដែលនិយមចូលចិត្តអានសៀវភៅប្រលោមលោក ប្រាកដណាស់សុទ្ធតែស្គាល់អ្នកនិពន្ធទន្សាយ តាមរយៈប្រលោមលោកជាច្រើនដូចជា ទេវរូបខ្មៅ រលកបោកខ្សាច់ ចម្រៀងស្នេហ៍អតីតកាល វាលអាល័យស្នេហ៍ និងប្រលោមលោកជាច្រើនរយក្បាលទៀតសុទ្ធតែដក់ក្នុងបេះដូងអ្នកអានជាច្រើននាក់ ទោះបីប៉ុន្មានឆ្នាំមុន អ្នកគ្រូបានផ្អាកក្នុងការចេញផ្សាយសៀវភៅប្រលោមលោកក៏ដោយ។
គួរបញ្ជាក់ផងដែរថា ក្រោយចេញផ្សាយសៀវភៅរឿង ប្រលោមចិត្ត របស់អ្នកគ្រូម៉ៅ សំណាង កាលពីឆ្នាំ២០១៨ កន្លងទៅ ហើយនៅតែទទួលបានការគាំទ្រខ្លាំងពីប្រិយមិត្តជាច្រើន អ្នកគ្រូបានប្រកាសចេញផ្សាយប្រលោមលោកថ្មីរឿង «សែងសុរិយា» នេះសម្រាប់ឆ្នាំ ២០១៩ និងគ្រោងចេញផ្សាយមួយក្បាលទៀតក្រោមចំណងជើងថា «ទន្សាយជានរណា?»
សម្រាប់ស្នាដៃរឿង «សែងសុរិយា» របស់អ្នកគ្រូម៉ៅ សំណាង នឹងធ្វើការចេញលក់ក្នុងពេលឆាប់ៗនេះ ដោយសៀវភៅជីវិត ហើយចាប់ផ្ដើមបើកទទួលការកក់ចាប់ពីថ្ងៃនេះ រហូតដល់ថ្ងៃទី ៥ ខែសីហា ឆ្នាំ២០១៩ ក្នុងតម្លៃ ២៤០០០រៀល ឬ ៦ដុល្លារ ដោយទាក់ទងទៅកាន់ ទំព័រហ្វេសបុក ទំព័រជិវិត។ សម្រាប់តម្លៃធម្មតាដែលមិនបានកក់ គឺមានតម្លៃ ២៨០០០រៀល ឬ ៧ដុល្លារ៕
ព័ត៌មានថ្មីៗ
