តស់! មកដឹងអំពីចរិតលក្ខណៈលម្អិត និងវិបត្តិមួយចំនួន តាមរយៈខែកំណើត
តើអ្នកដឹងទេថា ខែកំណើតទាំង ១២ អាចបង្ហាញពីលក្ខណៈផ្ទាល់ខ្លួនរបស់មនុស្សម្នាក់ៗបានយ៉ាងច្បាស់ តើយើងជាមនុស្សបែបណា បុគ្គលិកលក្ខណៈដ៏ជ្រាលជ្រៅរបស់យើង និងជាមនុស្សប្រភេទណា? តស់! មកដឹងលម្អិតទាំងអស់គ្នា ថាតើត្រូវទៅនឹងអ្នកដែរឬទេ?
១. ខែមករា ៖ អ្នកដែលកើតក្នុងខែមករា គាត់គឺជាមនុស្សដែលមានទំនួលខុសត្រូវខ្ពស់ មានមហិច្ឆតា ចេះប្រុងប្រយ័ត្ន ស្គាល់តម្លៃរបស់វត្ថុ ក៏ជាមនុស្សដែលមានទំនុកចិត្តលើខ្លួនឯងខ្លាំងណាស់ ចូលចិត្តការប្រកួតប្រជែង ប៉ុន្តែមិនងាយបង្ហាញអារម្មណ៍ចេញមកក្រៅនោះឡើយ។
២. ខែកុម្ភៈ ៖ អ្នកដែលកើតក្នុងខែកុម្ភៈ គឺជាមនុស្សដែលរីករាយ និងសកម្មខ្លាំង។ តែងមានស្នាមញញឹមពោរពេញដោយថាមពលវិជ្ជមាន មានភាពច្នៃប្រឌិត មិនចូលចិត្តដើរតាមអ្នកដទៃ ស្រឡាញ់សេរីភាព ប៉ុន្តែមានផ្នែករឹងរូស និងប្រកាន់ខ្ជាប់នូវច្បាប់ទម្លាប់ និងវិន័យរបស់ខ្លួនឯងខ្លាំង។
៣. ខែមីនា ៖ អ្នកដែលកើតក្នុងខែមីនា គឺជាមនុស្សដែលមានចិត្តអាណិតអាសូរដល់ង្នកដទៃ ងាយស្រួលក្នុងការចុះសម្រុងជាមួយមនុស្សជុំវិញខ្លួន អាចសម្របខ្លួនទៅនឹងស្ថានភាពគ្រប់បែបយ៉ាងបានយ៉ាងល្អ។ លើសពីនេះ ពួកគេក៏ជាមនុស្សមានវិធីសាស្ត្រច្រើនចូលចិត្តសង្កេត ប៉ុន្តែចូលចិត្តវាយតម្លៃអ្នកដទៃដោយមិនដឹងខ្លួន។
៤. ខែមេសា ៖ អ្នកដែលកើតក្នុងខែមេសា គឺជាមនុស្សដែលមានថាមពលខ្ពស់។ មើលពិភពលោកក្នុងពន្លឺវិជ្ជមាន ចូលចិត្តរៀនពីអ្វីដែលថ្មីៗ ស្មោះត្រង់ និងឆ្លាតវៃ មានការចងចាំដ៏ល្អ ស្មោះត្រង់ទាំងស្រុងជាមួយមិត្តភក្តិ។ ប៉ុន្តែមនុស្សកើតក្នុងខែនេះ ក៏ជាមនុស្សងាយឆាប់ខឹង និងមានចិត្តឆេវឆាវខ្លាំង។
៥. ខែឧសភា ៖ អ្នកដែលកើតនៅក្នុងខែឧសភា ជាមនុស្សម្នាក់ដែលយកចិត្តទុកដាក់យ៉ាងខ្លាំង មានការប្រុងប្រយ័ត្នខ្ពស់ចំពោះខ្លួនឯង ហើយក៏ជាមនុស្សតឹងតែងណាស់ដែរ។ មិនបត់បែនច្រើន ស្រឡាញ់យុត្តិធម៌ មិនចូលចិត្តទាញយកប្រយោជន៍ពីអ្នកណាទេ ក៏មិនឱ្យគេដើរខ្សែលើខ្លួននោះដែរ។ ចរិតមួយទៀតរបស់មនុស្សខែនេះគឺ រឹងរូស មានះ ពេលសម្រេចចិត្តអ្វីមួយ តែងប្រើគំនិតផ្ទាល់ខ្លួនជាការផ្តោតសំខាន់។
៦. ខែមិថុនា ៖ អ្នកដែលកើតក្នុងខែមិថុនា គឺជាមនុស្សដែលមានការអត់ធ្មត់ច្រើន។ អាចរស់រានបានល្អ អាចស្ថិតនៅក្រោមសម្ពាធបានយ៉ាងងាយ ជាមនុស្សនិយាយត្រង់ និងមានប្រាជ្ញាខ្លាំង។ ទំនោរមើលទៅពិភពលោកដោយមនសិការ ជាជាងប្រើពាក្យ អារម្មណ៍ និងកម្លាំង។ ប៉ុន្តែអ្នកកើតខែនេះមិនសូវជាមានការប្រុងប្រយ័ត្ននោះឡើយ។
៧. ខែកក្កដា ៖ អ្នកដែលកើតក្នុងខែកក្កដា ជាមនុស្សរសើប ប្រកាន់ខ្ជាប់ច្បាប់ទម្លាប់ខ្លាំង ក៏ជាមនុស្សម្នាក់ដែលមើលពីខាងក្រៅទៅដូចកោងកាចខ្លាំង តែធាតុពិតមានចិត្តស្លូតបូត មានចិត្តសប្បុរស និងចូលចិត្តជួយអ្នកដទៃ។ ប៉ុន្តែពេលខ្លះ មានអារម្មណ៍មិនស្ថិតស្ថេរឡើយ។
៨. ខែសីហា ៖ អ្នកដែលកើតក្នុងខែសីហា គឺជាមនុស្សដែលមានទំនុកចិត្តខ្ពស់លើខ្លួនឯង។ ពោរពេញដោយភាពជឿជាក់ គាត់ក៏ជាមនុស្សដែលពូកែជម្នះ មានភាពជាអ្នកដឹកនាំ ហើយកម្រនឹងចុះចាញ់អ្នកណាម្នាក់ណាស់។ លើសពីនេះពួកគេក៏ជាមនុស្សដែលមានគោលដៅជីវិតច្បាស់លាស់ ប៉ុន្តែឆាប់ខឹង និងមិនសូវពួកែចេះអត់ធ្មត់ប៉ុន្មានទេ ក៏មិនចូលចិត្តឱ្យអ្នកណាមករិះគន់គេនោះដែរ។
៩. ខែកញ្ញា ៖ អ្នកដែលកើតក្នុងខែកញ្ញា គឺជាមនុស្សដែលមានមន្តស្នេហ៍ អាចទាក់ទងមនុស្សគ្រប់កម្រិត ពូកែទំនាក់ទំនង ចេះរៀបចំ និងតម្រង់ទិសលម្អិតខ្ពស់។ មនុស្សទាំងនេះក៏ចូលចិត្តចំណាយពេលធ្វើអ្វីដែលខ្លួនចូលចិត្ត មិនខ្វល់ពីក្រសែភ្នែក និងសម្ដីអ្នកដទៃឡើយ ហើយក៏ជាប្រភេទដែលមានពិភពផ្ទាល់ខ្លួនដែរ។
១០. ខែតុលា ៖ អ្នកដែលកើតក្នុងខែតុលា គឺជាមនុស្សដែលចេះអាណិតអាសូរអ្នកដទៃ ចូលចិត្តស្របជាមួយអ្នកដទៃ មិនចូលចិត្តឈ្លោះប្រកែកគ្នា ស្រឡាញ់សន្តិភាព មានសុជីវធម៌ និងរួសរាយរាក់ទាក់ ចូលចិត្តចូលប្រឡូកក្នុងសង្គម។ ប៉ុន្តែក៏ជាមនុស្សងាយប្រែប្រួល ឆាប់ធុញ អារម្មណ៍មិនស្ថិតស្ថេរទេ។
១១. ខែវិច្ឆិកា ៖ អ្នកដែលកើតក្នុងខែវិច្ឆិកា គឺជាមនុស្សដែលតែងតែប្រុងប្រយ័ត្ន ឆ្លាតវៃ មានប្រាជ្ញាខ្លាំង ហើយស្រឡាញ់ភាពត្រឹមត្រូវ និងយុត្តិធម៌។ អ្នកទាំងនេះក៏ជាមនុស្សដែលចូលចិត្តគិត និយាយអី ធ្វើហ្នឹង។ រួមទាំងការបង្ហាញខ្លួនឯងដោយផ្ទាល់ និងត្រង់ ពេលខ្លះ សម្ដីត្រង់ធ្វើឱ្យប៉ះពាល់អារម្មណ៍អ្នកជុំវិញដោយមិនដឹងខ្លួន។
១២. ខែធ្នូ ៖ អ្នកដែលកើតក្នុងខែធ្នូ គឺជាមនុស្សរីករាយក្នុងការរៀនពីអ្វីដែលថ្មី។ ចូលចិត្តជូនខ្លួនឯងទៅកន្លែងដែលមិនធ្លាប់ស្គាល់ ជាមនុស្សមានគំនិតសុទិដ្ឋិនិយម មានគំនិតច្នៃប្រឌិត ប៉ុន្តែមានចំណុចខ្សោយមួយគឺ ខ្វះការអត់ធ្មត់ ងាយខឹង ឆេវឆាវ រឿងតិចតួចក៏ធ្វើឱ្យប៉ះពាល់អារម្មណ៍បានដែរ៕
ព័ត៌មានថ្មីៗ
