មិនមែនជា Super Women ក៏មិនមែនជា Super Mommy អីដែរ តែរាល់ថ្ងៃនេះ ធ្វើការមិនចាញ់មនុស្សប្រុសឡើយ ដោយសារតែភាពថា តួនាទី និងទំនួលខុសត្រូវ
មនុស្សស្រីស្ទើរតែ ៨០%ហើយ ដែលរឹងមាំខ្លាំង អាចធ្វើអ្វីៗបានគ្រប់យ៉ាងដោយខ្លួនឯង មិនដែលគិត រឹតតែមិនដែលខ្វល់ថានោះជាការងារមនុស្សស្រី ឬមនុស្សប្រុស អ្វីដែលនាងអាចធ្វើបាន នាងប្រាកដជាធ្វើ ព្រោះមានការងារខ្លះ បើនាងមិនធ្វើទេ គឺគ្មានអ្នកណាធ្វើឡើយ ហើយក៏គ្មានអ្នកណាជួយនាងនោះដែរ។
ឆាកជីវិតមនុស្សស្រី គឺមានកិច្ចការងារជាច្រើនដែលត្រូវទទួល និងរ៉ាប់រង ដោយមិនខ្វល់ថាឈឺ ឬជាទេ គឺត្រូវតែធ្វើ ការងារខ្លះទុក្ខចោលមិនបាន អាចនិយាយបានថា វាជាតួនាទីរបស់នាង ហើយក៏ជាទំនួលខុសត្រូវដ៏ខ្ពស់បំផុតដែលមិនអាចទុកចោល ឬទម្លាក់ចុះបានឡើយ។
ជីវិតមនុស្សស្រីពោរពេញទៅដោយបញ្ហា និងសម្ពាធជាច្រើនដែលត្រូវរ៉ាប់រង ពេលដែលមានប្ដី មានកូន ត្រូវមើលថែប្ដីផង កូនផង ឪពុកម្ដាយខ្លួនឯងផង នៅត្រូវធ្វើខ្លួនឱ្យសក្តិសមជាប្រពន្ធល្អ ជាកូនប្រសារល្អ មើលថែឪពុកម្ដាយក្មេកថែមទៀត ថាទៅមើលហត់នឿយ លំបាកយ៉ាងណា អ៊ីចឹងបានគេថា មនុស្សស្រីមានដៃ១០០មិនខុសមែន។
តាមពិត ទស្សនៈជាច្រើនតែងលើកឡើងថា មនុស្សស្រីជាភេទទន់ខ្សោយ តែនាងបែរជាត្រូវរ៉ាប់រងការងារជាច្រើនដោយខ្លួនឯង មិនដែលគិតថាហត់នឿយអ្វីទាំងអស់ ឱ្យតែអាចធ្វើបាន នាងនឹងធ្វើឱ្យអស់ពីលទ្ធភាពមិនខានទេ។
វាជាការពិត ដែលគេថាមនុស្សស្រីជាភេទទន់ខ្សោយ ព្រោះនាងគ្រាន់តែជាមនុស្សស្រីធម្មតាម្នាក់តែប៉ុណ្ណោះ មិនមែនជា Super Women ហើយក៏មិនមែនជា Super Mommy អីដែរ តែនាងអាចធ្វើកិច្ចការងារជាច្រើនទាំងក្នុងផ្ទះ និងក្រៅផ្ទះ ចេញក្រៅរកលុយ ហើយនៅមើលថែ យកចិត្តទុកដាក់នឹងកូនចៅក្នុងផ្ទះថែមទៀត ដែលជឿថា មនុស្សប្រុសតិចណាស់ ដែលអាចធ្វើបានដូចជានាង។
មនុស្សស្រីខ្លះ អាចនឹងមិនមានកម្លាំងកាយគ្រប់គ្រាន់ ក្នុងការរ៉ាប់រងការងារច្រើនតែម្នាក់ឯងនោះឡើយ តែការដែលអាចឱ្យនាងធ្វើបានសឹងតែគ្រប់យ៉ាងពេញមួយថ្ងៃៗនោះ គឺមកពីនាងមានកម្លាំងចិត្ត និងកម្លាំងគំនិត ដែលជម្រុញឱ្យនាងហ៊ានច្បាំង ពុះពារ ជាមួយនឹងបញ្ហា ការលំបាកទាំងឡាយបាន។ បើនិយាយពីកម្លាំងកាយ មនុស្សស្រីមិនអាចប្រៀបនឹងមនុស្សប្រុសបានទេ តែចំពោះមនុស្សប្រុសខ្លះ មិនមានសូម្បីតែកម្លាំងកាយ គ្មានទាំងកម្លាំងគំនិត គ្មានសូម្បីតែកម្លាំងចិត្តក្នុងការផ្ដល់ និងជួយដល់ប្រពន្ធរបស់ខ្លួន ដូច្នេះមនុស្សស្រី មានតែរ៉ាប់រងម្នាក់ឯងនឹងហើយ៕
អត្ថបទ ៖ មនុស្សចុងក្រោយ / ក្នុងស្រុកសូមរក្សាសិទ្ធិ
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ PECH PHEARUN
Tel:
ព័ត៌មានថ្មីៗ
