ស្រស់ស្រាយណាស់ ជាមួយ រមណីយដ្ឋាន អន្លង់ក្របី ស្រុករុក្ខគិរី ខេត្តបាត់ដំបង
ថ្ងៃសម្រាក និងលំហែអារម្មណ៍ជិតមកដល់ហើយ សម្រាប់អ្នកដែលមានបំណងធ្វើដំណើរកម្សាន្តតាមខេត្ត ប្រាកដជាចង់រកទីកន្លែងដើរលេងថ្មីៗប្លែកៗ សម្រាប់លំហែអារម្មណ៍ និងបន្ធូរភាពតានតឹងហើយមែនទេ? ដោយក្នុងនោះ ខេត្តបាត់ដំបង ក៏ជាខេត្តគោលដៅទេសចរណ៍ដ៏ពេញនិយមមួយដែរ។
សម្រាប់ខេត្តបាត់ដំបង ប្រសិនជាលោកអ្នកបានទៅដើរកម្សាន្តកុំភ្លេចឈាងទៅកម្សាន្តរមណីយដ្ឋានបែបធម្មជាតិមួយកន្លែងមានឈ្មោះ ថា « រមណីយដ្ឋាន អន្លង់ក្របី » ឱ្យសោះ។ ដោយរមណីយដ្ឋានមួយនេះមិនសូវមានអ្នកស្គាល់ប៉ុន្មាននោះទេ ថែមទាំងមានទេសភាពស្រស់បំព្រង ទឹកហូរថ្លាឈ្វេងមើលឃើញដល់បាត គ្រាន់តែទៅដល់ក៏មានអារម្មណ៍ថាស្រស់ស្រាយដែរ។
ដោយការធ្វើដំណើរទៅកាន់រមណីយដ្ឋានមួយនេះ មិនសូវជាពិបាកប៉ុន្មាននោះទេ ហើយអាចធ្វើដំណើរដោយម៉ូតូក៏បាន ឡានក៏បានយ៉ាងងាយស្រួល ហើយចុះធ្វើដំណើរដោយថ្មើរជើងតែប៉ុន្មាននាទីនឹងទៅដល់ទឹកជ្រោះមួយនោះជាមិនខាន។
ដោយ រមណីយដ្ឋាន អន្លង់ក្របី មានទីតាំងនៅក្នុងស្រុករុក្ខគិរី ខេត្តបាត់ដំបង ដោយធ្វើដំណើរជិះចេញពីបាសាក់ ជិះកាត់ព្រៃ កាត់ចំការ ប្រមាណជា ១០ គីឡូ ៕
ប្រភពរូបភាព : Kheng Nita
រក្សាសិទ្ធិដោយ៖ ក្នុងស្រុក
ព័ត៌មានថ្មីៗ
