ប្លែកមែន! កូនក្រមុំឆ្នាំ ២០២២ លេងលើកបណ្ណាការហែរជំនូនទៅដណ្តឹងកូនកំលោះទៅវិញ
កាលពីថ្ងៃទី ១៣ ខែមីនា ឆ្នាំ២០២២ នេះមង្គលការមួយកន្លែងស្ថិតនៅក្នុងប្រទេសថៃបានបង្កភាពភ្ញាក់ផ្អើលជាខ្លាំងទាំងក្នុងប្រទេស និងក្រៅប្រទេស ដោយស្ត្រីជាកូនក្រមុំបែរជាក្លាយទៅជាភាគីដែលហែរបណ្ណាការមកដណ្តឹងខាងប្រុសខុសពីទំនៀមទម្លាប់ដើមដែលមានតែភាគីខាងប្រុសតែប៉ុណ្ណោះដែលមកដណ្តឹងខាងស្រី ។ ហើយអ្វីកាន់តែភ្ញាក់ផ្អើលទៀតនោះគឺ ថ្លៃបណ្ណាការដែលកូនក្រមុំហែរមកដណ្តឹងខាងប្រុស មានតម្លៃដល់ទៅ ១២លានបាត ដែលមានតម្លៃប្រហែលនឹងចំនួន ៤០ម៉ឺនដុល្លារឯណោះ ។
ពិធីមង្គលការដ៏ចម្លែកនេះ មានកូនក្រមុំមានឈ្មោះថា Pitchaya Phanomai ហៅក្រៅថា Bai Liu អាយុ ៣៣ឆ្នាំ និងកូនកំលោះលោក Panupong Thephachantharak ហៅក្រៅ Nikki អាយុ ៣៣ឆ្នាំ ដោយអ្នកទាំង២ គឺជាអ្នកដែលនៅក្នុងខេត្ត Khon Kaen ដូចគ្នា ។ តាមការបកស្រាយពីភាគីកូនក្រមុំបានឱ្យដឹងថា ការពិតទៅថ្លៃបណ្ណាការតម្លៃជាង ១២លានបាត រួមបញ្ចូលទាំងលុយ ២លានបាត គ្រឿងអលង្ការ និងមាសតម្លៃ ៥សែនបាត ប័ណ្ណកម្មសិទ្ធិដីធ្លីនៅស្រុក Ubonrat ខេត្ត Khon Kaen ផ្ទៃដី ៥រ៉ៃ ស្មើជាង ៥ មួយម៉ឺនបាត រថយន្ត BMW 3 Series ពណ៌ក្រហម តម្លៃ 2.8 លានបាត ផ្ទះ 1 ខ្នង ដីនៅភូមិ ផាភិរម្យ តំលៃ 7 លានបាត ដោយថ្លៃសរុបបណ្ណាការទាំងនេះការពិតជាកម្លាំងញើសឈាមរបស់កូនកំលោះកូនក្រមុំទាំង២ដែលបានសាងរួមគ្នា ក្រោយពីឆ្លងកាត់ឧបសគ្គ ក្តៅត្រជាក់ និងប្រឹងប្រែងរួមគ្នាអស់រយៈពេល ៨ឆ្នាំប៉ុណ្ណោះ។
ចំពោះមូលហេតុដែលនាំឱ្យមានការកើតឡើងនូវក្បួនដង្ហែរមកសុំភាគីខាងប្រុស ខុសពីទំនៀមទម្លាប់ថៃ នោះ គឺមកពីខាងភាគីកូនក្រមុំចង់បង្កភាពភ្ញាក់ផ្អើលដល់កូនកំលោះ ក្រោយពីធ្លាប់មានគំនិតចង់រៀបការសាងអនាគតជាមួយគ្នាជាយូរមកហើយតែមិនទាន់មានឱកាស ហើយក៏ដើម្បីនាំមកនូវភាពសប្បាយរីករាយដល់សាច់ញាតិទាំងសងខាងផងដែរ ពិសេសការបង្កើតភាពភ្ញាក់ផ្អើលនៃពិធីរៀបការនេះ កូនក្រមុំ ក៏បានស្នើសុំ និងពិគ្រោះជាមួយសាច់ញាតិទាំងសងខាងមិនមានការជំទាស់អ្វីនោះទេ។
ត្បិតតែជាពិធីដែលខុសត្រង់ពិធីហែរជំនូនបណ្ណាការ តែពិធីមង្គលការទាំងមូលនៅតែប្រារព្ធតាមបែបប្រពៃណីរបស់ថៃដដែល ដោយគ្រាន់តែប្តូរពីបុរសបង្ហាញសេចក្តីស្រឡាញ់មកជាស្ត្រី មកជាស្ត្រីដែលបង្ហាញសេចក្តីស្រឡាញ់ទៅកាន់បុរសជំនួសវិញ។ គូស្នេហ៍ប្តីប្រពន្ធទាំង២នាក់នេះ ត្រូវបានគេដឹងថាគូមានទំនាក់ទំនងស្នេហាជាមួយគ្នា ៨ឆ្នាំហើយ ហើយក៏ត្រូវឆ្លងកាត់ឧបសគ្គជាមួយគ្នា រហូតដល់មានអាជីវកម្មភោជនីយដ្ឋាននៅខនកែន រួមទាំងអាជីវកម្មផ្សេងៗទៀតរួមគ្នាសុទ្ធតែទទួលបានភាគជោគជ័យរួមគ្នា។
សម្រាប់រាល់ថ្លៃបណ្ណាការ ដែលបានហែរបង្ហាញ វាមិនសំខាន់នោះទេ ដែលសំខាន់វាបានបង្ហាញពីការតស៊ូ និងក្តីស្រលាញ់ដែលមានឱ្យគ្នាកន្លងមក ។ ម្យ៉ាងវិញទៀត កូនក្រមុំក៏បានរៀបរាប់ថា សម័យកាលបានផ្លាស់ប្តូរច្រើនហើយ មិនចាំបាច់ត្រូវតែជាបុរសនោះទេដែលជាអ្នកលើកថ្លៃបណ្ណាការដណ្តឹងស្ត្រីនោះ ស្ត្រីក៏អាចធ្វើបានដែរ តែអ្វីដែលសំខាន់បំផុតគឺស្នេហា ព្រោះពួកគេស្រឡាញ់គ្នា ហើយក្រុមគ្រួសារទាំងសងខាងក៏មិនជំទាស់ដែរ។ អ្វីគ្រប់យ៉ាងដែលគ្រប់គ្នាយល់ថាស័ក្តសម ហើយធ្វើហើយសប្បាយចិត្ត ទាំងនោះហើយចាត់ទុកថាជាថ្ងៃល្អបំផុត និងរីករាយបំផុតទៅបានហើយ៕
ដោយ៖ ក្នុងស្រុក (ហាមកូពីដោយគ្មានការអនុញ្ញាតិ)
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ Writers
Tel:
ព័ត៌មានថ្មីៗ
