ដល់ពេលស្អាតហើយ! គន្លឹះសម្ងាត់ជួយសម្រស់ឱ្យស្អាតដោយប្រើតែដុំទឹកកក
ដុំទឹកកក ត្រូវបានគេដឹងថា មានអត្ថប្រយោជន៍ជាច្រើនសម្រាប់ផ្ទៃមុខឱ្យមុខស្រស់ស្អាត ថែមទាំងកម្ចាត់បញ្ហាលើផ្ទៃមុខទាំងអស់ផងដែរ។
ខាងក្រោមនេះជាអត្ថប្រយោជន៍ជាច្រើននៃការលាបទឹកកកលើផ្ទៃមុខប្រចាំថ្ងៃ ប៉ុន្តែយើងមិនដឹងនោះទេ។ គ្រាន់តែក្រឡេកមើលអត្ថប្រយោជន៍ និងបញ្ចូលទឹកកកជាទម្លាប់ថែរក្សាស្បែករបស់អ្នក ៖
១. ធ្វើឱ្យស្បែកភ្លឺភ្លាមៗ
ទឹកកកអាចជួយបន្តឹងសរសៃឈាមផ្ទៃមុខ និងបន្ធូរបន្ថយការរលាក។ ពិសេសវាថែមទាំងអាចកាត់បន្ថយភាពនឿយហត់នៅលើមុខរបស់អ្នក ធ្វើឱ្យលំហូរឈាមដំណើរការល្អ និងធ្វើឱ្យស្បែករបស់អ្នកភ្លឺថ្លា ។
២. អាចបំបាត់មុន
ការប្រើទឹកកកលើមុនអាចជួយកាត់បន្ថយការឡើងក្រហម និងរលាក ដោយធ្វើឱ្យចលនាលំហូរឈាមផ្ទៃមុខដំណើរការល្អ អាចបង្រួមរន្ធញើស ទប់ស្កាត់ការផលិតប្រេងច្រើនពេកលើផ្ទៃមុខ ល្អពិសេសសម្រាប់ការការពារ និងបំបាត់បញ្ហាមុនគ្រប់ប្រភេទ។
៣. ធ្វើឱ្យផ្ទៃមុខស្រូបយកផលិតផលសម្រស់កាន់តែល្អ
ការត្រដុសទឹកកកមុនពេលលាបផលិតផលថែរក្សាស្បែក អាចជួយឱ្យផលិតផលដែលអ្នកកំពុងប្រើជ្រាបចូលទៅដល់ស្រទាប់ជ្រៅនៃស្បែក និងស្រូបចូលបានកាន់តែល្អមានប្រសិទ្ធភាពខ្ពស់។
៤. កាត់បន្ថយការហើមនៅជុំវិញភ្នែក
ការយកទឹកកកមកលាបលើមុខជាប្រចាំអាចកាត់បន្ថយការហើម និងធ្វើឱ្យសរសៃឈាមរួមតួច ដែលវាមានប្រយោជន៍ក្នុងការកម្ចាត់បញ្ហាហើមនៅក្រោមភ្នែក។
៥. កាត់បន្ថយភាពចាស់
ភាពត្រជាក់នៃទឹកកក អាចជួយបង្រួមរន្ធញើសនៃស្បែក អាចកម្ចាត់បញ្ហាស្បែកកមុខចាស់ យារធ្លាក់ និងស្នាមជ្រីវជ្រួញ ថែមទាំងធ្វើឱ្យស្បែករបស់អ្នកមើលទៅរឹងមាំ មានសុខភាពល្អ និងក្មេងជាងវ័យ។
៦. ព្យាបាលការរលាកដោយកំដៅថ្ងៃ និងបញ្ហាកន្ទួលរមាស់
ការលាបទឹកកកគឺជាវិធីដ៏ល្អក្នុងការព្យាបាលការរលាកដោយពន្លឺព្រះអាទិត្យ ព្រោះការធ្វើបែបនេះអាចធ្វើឱ្យស្បែករបស់អ្នកធូរស្រាលដោយជួយឱ្យអ្នកកម្ចាត់ភាពក្រហម និងរលាកដោយសារការត្រូវពន្លឺព្រះអាទិត្យ។
# វិធីប្រើប្រាស់ដុំទឹកកកក ឱ្យបានត្រឹមត្រូវនៅក្នុងការថែរក្សាស្បែកមុខ
-ប្រើទឹកកក ជូត ឬត្រដុសថ្នមៗលើស្បែក ដោយការរុំដុំទឹកកកមួយចំនួនក្នុងក្រណាត់ស្អាតស្តើង ឬកន្សែងដៃ ហើយលាប ឬត្រដុសលើមុខរបស់អ្នក។
-យកដុំទឹកកកម៉ាស្សា និងជូតទឹកកកជាចលនារង្វង់តូចៗរយៈពេល ១នាទីដើម្បីទទួលបានលទ្ធផលល្អបំផុត។
-វិធីផ្សេងទៀត អ្នកអាចយក ទឹកប៉េងប៉ោះ ទឹកប្រទាលកន្ទុយក្រពើ ទឹកត្រសក់ ផលិតជាដុំទឹកក សម្រាប់លាបលើផ្ទៃមុខ វានឹងផ្តល់សារធាតុចិញ្ចឹមបន្ថែមដល់ស្បែកកាន់តែច្រើនទៀត។
# បម្រាម
-កុំលាបទឹកកកលើស្បែកច្រើនជាងម្តងក្នុងមួយថ្ងៃ។
-ប្រសិនបើអ្នកមានស្បែកងាយប្រតិកម្ម កុំយកដុំទឹកកកមកលាបលើមុខ តែជំនួសដោយការប្រើកន្សែងត្រជាក់ ល្អជាង
-កុំលាប ឬម៉ាស្សាដុំទឹកកកលើមុខលើសពីមួយនាទី
-មិនត្រូវត្រដុសក្រោមភ្នែកខ្លាំងពេកទេ ព្រោះវាជាតំបន់ងាយស្រួល។
-ប្រសិនបើអ្នកមានអារម្មណ៍ក្តៅក្រហាយ ឬមិនស្រួលនៅពេលដាក់ទឹកកក សូមបញ្ឈប់នីតិវិធី ហើយពិគ្រោះជាមួយវេជ្ជបណ្ឌិតប្រសិនបើចាំបាច់៕
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ Writers
Tel:
ព័ត៌មានថ្មីៗ
