- ការអភិវឌ្ឍន៍ខ្លួនឯង

កំហុស៩យ៉ាង ដែលអ្នកប្រហែលជាបានធ្វេី ក្នុងរយៈពេល១០នាទីដំបូង នៃថ្ងៃធ្វើការរបស់អ្នក

ប៉ុន្មាននាទីដំបូង នៃថ្ងៃធ្វើការរបស់អ្នក គឺមានសារៈសំខាន់ណាស់ ចំពោះផលិតភាពរបស់អ្នក សម្រាប់រយៈពេលប្រាំបីម៉ោងបន្ទាប់។

ប្រសិនបើអ្នកទៅ ការិយាល័យយឺតយ៉ាវ ឬ រវល់មើលអ៊ីម៉ែលជាច្រេីន អ្នកអាចងាយនឹងចុះចាញ់ និង មានការលំបាក ក្នុងការផ្តោតអារម្មណ៍ សម្រាប់ធ្វើការពេញមួយថ្ងៃ។

ការស្រាវជ្រាវពី Yu Han និង Shana Lebowitz បានរកឃើញថា មានលក្ខណៈពិសេសប្រាំបួនយ៉ាង ដែលមិនគួរធ្វើនៅក្នុងរយៈពេល ១០ នាទីដំបូងនៃការងារពេលព្រឹក។ បើមិនដូច្នោះទេ ផលិតភាពរបស់អ្នក នឹងថយចុះពេញមួយថ្ងៃ។ សូមពិនិត្យមើលអ្វី ដែលគួរជៀសវាង ដើម្បីលុបបំបាត់ហានិភ័យនៃការបរាជ័យ។

១. ទៅការិយាល័យយឺតយ៉ាវ

ការស្រាវជ្រាវចុងក្រោយបំផុតរបស់ Huffington Post បានរកឃើញថា៖ «ថៅកែមានទំនោរ មេីលទៅបុគ្គលិកដែលមកយឺតយ៉ាវ ជាមនុស្សដែលមិនសូវយកចិត្ដទុកដាក់ ហេីយផ្តល់ឱ្យពួកគេនូវ កម្រិតការងារទៀប ទោះបីជាបុគ្គលិកទាំងនោះ ចេញពីធ្វេីការវិញ យឺតក៏ដោយ។» វាមិនយុត្តិធម៌ទេ ប៉ុន្តែវាជាការពិត នាពេលបច្ចុប្បន្ននេះ។ ដូច្នេះសូមព្យាយាម ទៅការិយាល័យឱ្យបានឆាប់ តាមដែលអាចធ្វើទៅបាន។

២. មិនស្វាគមន៍មិត្តរួមការងាររបស់អ្នក

អ្នកអាចកំណត់ សម្លេងរីករាយសម្រាប់ខ្លួនអ្នក និង អ្នកដទៃ នៅជុំវិញអ្នក ដោយចំណាយពេលពីរបីនាទី ដើម្បីស្វាគមន៍ ឬ និយាយ ជាមួយសហសេវិករបស់អ្នក។

យោងតាមលោក Lynn Taylor៖ «ប្រសិនបើអ្នកជាមេដឹកនាំ ហើយអ្នកមិននិយាយថា «ស្វាគមន៍ ឬ សួរស្តី» ទៅក្រុមរបស់អ្នកទេ ការខ្វះជំនាញ ទំនាក់ទំនងល្អជាមួយអ្នកដទៃ អាចកាត់បន្ថយសមត្ថភាពបច្ចេកទេសរបស់អ្នក។»

សូម្បីតែ អ្នកមិនមែនជាអ្នកចាត់ចែងក៏ដោយ ការស្ងៀមស្ងាត់ពេក ធ្វើឱ្យមិត្តរួមការងាររបស់អ្នក មិនសូវចូលចិត្តអ្នកនោះទេ។

៣. ញុំកាហ្វេ

ប្រសិនបើ អ្នកមិនមែនជាមនុស្ស ដែលទម្លាប់ញុំកាហ្វេភ្លាមៗបន្ទាប់ពីភ្ញាក់ទេនោះ អ្នកប្រហែលជាមនុស្សដែល ញុំកាហ្វេភ្លាមៗពេលអ្នក ចូលទៅក្នុងការិយាល័យ។

ប៉ុន្តែការស្រាវជ្រាវបានបង្ហាញថា៖ ពេលវេលាដ៏ល្អបំផុតដើម្បីញុំកាហ្វេ គឺបន្ទាប់ពីម៉ោង ៩:៣០ នាទីព្រឹក។ នេះដោយសារតែភាព ស្ត្រេសអ័រម៉ូន(stress hormone cortisol) ដែលធ្វើនិយ័តកម្មថាមពលជាទូទៅ មានកម្រិតខ្ពស់ រវាងម៉ោង ៨ និង ៩នាទី ព្រឹក។ នៅពេលដែលអ្នកញុំកាហ្វេ អំឡុងពេលនេះ រាងកាយចាប់ផ្តើមផលិតតិចតួច ហេីយវាអាស្រ័យទៅលើជាតិកាហ្វេអ៊ីន។

នៅពេលកម្រិត cortisol របស់អ្នកចាប់ផ្តើមថយចុះនៅម៉ោង ៩:៣០ ព្រឹក អ្នកប្រហែលជាត្រូវការកាហ្វេអ៊ីន ដេីម្បីអោយវាកើនឡើងវិញ។

៤. ឆ្លើយគ្រប់អ៊ីមែលទាំងអ្នករបស់អ្នក

នៅពេលដែលអ្នកទៅដល់ កន្លែងធ្វេីការរបស់អ្នក អ្នកនឹងចងចាប់ផ្តេីមមេីល អ៊ីមែលទាំងអ្នករបស់អ្នក ដែលបានផ្ញេីរមកពេញ១យប់។

ប៉ុន្តែបើយោងតាមលោក Michael Kerr ជាវាគ្មិនអាជីវកម្មអន្តរជាតិ និង ជាអ្នកនិពន្ធនៃ «You Can’t Be Serious! Putting Humor to Work» បាននិយាយថា៖ «រយៈពេល ១០ នាទីដំបូង នៃថ្ងៃធ្វើការ គួរតែត្រូវបានចំណាយយ៉ាងឆាប់រហ័ស ក្នុងការស្វែងរក និង កំណត់អ៊ីមែលដែលជាអាទិភាព។» វិធីនេះ អ្នកអាចដឹងថា តេីមានអ្វីបន្ទាន់ដែលត្រូវធ្វេីមុន ហើយបង្កើតផែនការ ដើម្បីឆ្លើយអ៊ីមែលដែលនៅសល់ នាពេលក្រោយ។

លោក Kerr បានប្រាប់គេហទំព័រ Business Insider ថា៖ «ការពិនិត្យអ៊ីម៉ែល អាចក្លាយជាភារកិច្ចមួយ ដែលធ្វើឱ្យអ្នកមានអារម្មណ៍ថា អ្នកកំពុងសម្រេចអ្វីមួយ ហេីយវានឹងក្លាយជារឿងដ៏គ្រោះថ្នាក់ ប្រសិនបេីអ្នកមិនកំណត់សកម្មភាពអាទិភាព។»

៥. ធ្វើការយ៉ាងលំបាកដោយមិនមានផែនការនៅក្នុងចិត្ត

លោក Taylor បានណែនាំថា ឱ្យប្រាកដថាអ្នកមានផែនការ ធ្វើការនៅថ្ងៃនោះ ឬ អត់។ នេះរួមបញ្ចូលទាំង ការកត់ត្រានូវ អ្វីដែលជាអាទិភាពបំផុត និង អ្វីដែលត្រូវតែធ្វេី ជារៀងរាល់ថ្ងៃ បន្ទាប់មកពិនិត្យមើលកាលវិភាគរបស់អ្នក។

សូមពិនិត្យមើលថាតើ ព្រឹត្តិការណ៍អ្វីខ្លះដែលអ្នកប្រហែលជាបានគ្រោងទុក និង ថាតើអ្នកត្រូវការរៀបចំ សម្រាប់ការខល ឬ សន្និសីទណាមួយ។ បើមិនដូច្នោះទេ អ្នកអាចត្រូវរាំងស្ទះ នៅពេលដែលអ្នកទទួលបាន ការរំលឹកថា ១០នាទី ទៀតសម្រាប់កិច្ចប្រជុំក្រុមមួយ ហើយអ្នកកំពុងលេងនៅពាក់កណ្តាល នៃការសរសេរសំណើគម្រោង។

៦. ធ្វេីការងារងាយស្រួលបំផុតជាមុន

ការស្រាវជ្រាវបង្ហាញថា៖ ថាមពលនិងឆន្ទៈរបស់អ្នក នឹងថយចុះ ទៅតាមពេលវេលា ពេញមួយថ្ងៃ ដូច្នេះវាជាគំនិតល្អ ក្នុងការប្រញាប់ និងបញ្ចប់ការងារសំខាន់ៗរបស់អ្នកជាមុន។

មនុស្សខ្លះហៅយុទ្ធសាស្ត្រនេះថា៖ eating the frog ផ្អែកលើសម្រង់របស់ Mark Twain៖ « បរិភោគសត្វកង្កែបមួយក្បាលនៅពេលព្រឹក ហើយគ្មានអ្វីដែលអាក្រក់ជាងនេះ នឹងកើតឡើងចំពោះអ្នក ពេញមួយថ្ងៃ។ »

៧. ធ្វេីកិច្ចការច្រើនក្នុងពេលតែមួយ

ដោយសារតែ អ្នកមានថាមពលច្រើន នៅពេលព្រឹក អ្នកអាចមានអារម្មណ៍ថា អ្នកអាចធ្វើអ្វីៗបានរាប់លាន ក្នុងពេលតែមួយ។

ប៉ុន្តែការស្រាវជ្រាវបានលើកឡើងថា ការធ្វើកិច្ចការច្រើន អាចប៉ះពាល់ដល់ការបំពេញមុខងាររបស់អ្នក ហើយវានឹងល្អប្រសើរជាង ក្នុងការធ្វើរឿងមួយនៅពេលតែមួយ។

ផ្ទុយទៅវិញ សូមកំណត់សម្លេងវិជ្ជមាន ដោយផ្តោតលើភារកិច្ចតែមួយ សម្រាប់រយៈពេល ១០ នាទីដំបូង។

៨. រស់នៅលើគំនិតអវិជ្ជមាន

ប្រហែលជាអ្នកអាច មានគ្រោះថ្នាក់តិចតួច នៅពេលធ្វេីដំណេីរ ឬ ប្រហែលជាអ្នកបានឈ្លោះគ្នាជាមួយដៃគូរបស់អ្នក កាល់ពីយប់។ សូមកុំឱ្យបទពិសោធន៍ទាំងនោះ បង្វែរអ្នកពីកិច្ចការ ដែលចាំបាច់ត្រូវធ្វើនៅថ្ងៃនេះ។

លោក Taylor បានផ្ដល់អនុសាសន៍ថា អ្នកអាចបែងចែកដោយដាក់គំនិតអវិជ្ជមានទាំងនោះ នៅក្នុងប្រអប់ៗ ដាច់ដោយឡែក នៅពេលអ្នកចាប់ផ្តើមសប្តាហ៍ថ្មីរបស់អ្នក។ ហេីយប្រសិនបើ វាចាំបាច់ អ្នកអាចចូលមើលពួកវា ឡើងវិញនៅពេលក្រោយ។

៩. មានការប្រជុំ

កិច្ចប្រជុំពេលព្រឹក អាចជាការបាត់បង់ធនធានរបស់អ្នក។ នេះបើយោងតាមលោកស្រី Laura Vanderkam ជាអ្នកនិពន្ធ What the Most Successful People Do Before Breakfast ថា៖ ពេលព្រឹកព្រលឹម គួរត្រូវបានបម្រុងទុក សម្រាប់ភារកិច្ចដែលត្រូវការការផ្តោតអារម្មណ៍ និង ការប្រមូលផ្តុំគួរឱ្យកត់សម្គាល់ ដូចជាការសរសេរ។

ប្រសិនបើអ្នកមានការពិភាក្សា នៅពេលអ្នកជួបជុំ ជាមួយចៅហ្វាយ និង អ្នករួមការងាររបស់អ្នក ត្រូវប្រាកដថា ពួកគេបានកំណត់ពេលវេលា សម្រាប់ថាមពលទាបដូចជាពាក់កណ្តាលពេលរសៀល លុះត្រាតែអ្នកដឹងថាការពិភាក្សានោះ ត្រូវការថាមពលខួរក្បាលច្រើន។

 

ប្រភព៖ businessinsider